Лащи новость лэ Лукастар 3:1-38
3 Сас 15-то бэрш, кала правияс о римско правителё о Тибе́риё. Андэ кодэва бэрш лэ барэдэрэса пэ область Иуде́я сас о По́нтиё Пила́то, лэ барэдэрэса пэ область Галиле́я сас о И́радо, лэ барэдэрэса пэ область Итуре́я и пэ область Траханити́да сас лэско ԥрал о Фили́по, ай лэ барэдэрэса пэ область Авилине́я сас о Лиса́ниё.
2 И инке тоди жувэлас о Кая́фа и барэ рашаса сас о А́на. И акэ андэ кодэя время лэ Иоаноса, лэ Захариястирэ шавэса, саво сас андэ пустыня, задя дума о Дэл и пэрэдя лэсти о алав.
3 И во ля тэ ԥирэл па всаворэ кодэла краёря, савэ сас паша лэн Ярда́но, и тэ ԥэнэн лэ манушэнди тэ каинпэ и тэ болдён, кай лэнго бэзэх тэ простийпэ.
4 Пала када пистросардя о Иса́я, саво пэрэдэлас и алава лэ Дэвлэстар: «Андэ пустыня ашундёл ӷромко ӷолосо: „Вужарэн о дром важ о Иегова! Вировнин важ лэстэ и дрома.
5 Зашон ԥувьяса всаворэ барэ ямы, зындярэн всаворэ плая и плаёра, стерэн о банго дром тэ авэл ворта и о вэрыто дром тэ авэл ровно.
6 И всаворэ мануша додиқэна кодэлэс, через кастэ о Дэл спасыя лэ мирос“».
7 Кала каринг о Иоано авэлас тэ болдёл фартэ бут миро, во ԥэнэнас лэсти: «Ядовити ӷадюки, ко ԥэндя тумэнди, кай тумэ можэте тэ обжан лэ Дэвлэско сындо?
8 Сыкавэн диласа, кай тумэ каинпэ. И на́ ԥэнэн пэсти: „Амаро дад — о Авраамо“. Ԥэнав тумэнди, кай о Дэл анда кадэла бара можэт тэ стерэл бэятонэн лэ Авраамости.
9 Паша ла виткатирэ корнёря ужэ пашлёл о товэр. Если пэ витка на барёл нисо лашо, ла сшынэна и сԥабарэна».
10 О миро пушэлас лэстар: «Со жэ амэнди тэ терас?»
11 Во ԥэнэнас: «Кодэлэстэ, кастэ исин запасно ӥда*, мэк дэл кодэлэсти, касти найсо тэ лэл пэр пэстэ, и кодэлэстэ, кастэ исин тэ хан, мэк терэл кадя жэ».
12 И мануша анда налоӷово тожэ авелэ тэ болдён и пушлэ лэстар: «Учителё, ай амэнди со тэ терас?»
13 Во ԥэндя лэнди: «На́ мангэн лэ манушэндар май бут, чем трэбуй».
14 Ай и воиноря пушэнас лэстар: «Ай амэнди со тэ терас?» Во ԥэндя лэнди: «Ни пэр кастэ на́ тасавэн, никас хохаимаса на́ дошалярэн и авэн лошалэ кодэлэсти, со тумэнди дэн важ тумари дила».
15 О народо аштярэлас, кай тэ авэл о Христос*, и всаворэ, кала диқэнас по Иоано, гиндонас: «Можэт, када во Христос?»
16 О Иоано ԥэнэнас лэнди: «Мэ болав тумэн паеса. Но жал кодэва, ко май зорало мандар, и мэ на ашав дажэ тэ росԥандав и пряшки пэ лэстирэ сандаля. Во лэла тэ болэл тумэн свынтонэ зорэса и ягаса.
17 Андо вас во ритярэл и лопата, савяса веин о зэрно. Во вужарэла о ҭан, кай мэлин о зэрно, и стидэла и пшэница андо складо. Ай и шулуха во сԥабарэла андэ вечно яг».
18 О Иоано бутэсти сытярэлас лэ мирос и росԥэнэнас лэнди и лащи новость.
19 Кадяжэ во лажаварэлас лэ Ирадос, саво сас барэдэр пэ область, важ кода, кай во жэнисайля пэ Ирадя́да, пэ пэстирэ ԥралэстири хулаи, и важ и вся лэстири найлащи дила.
20 Кочай о И́радо стердя инке ек вэрыто дила: во стодя лэ Иоанос андо баруно.
21 Кала болделя вся о народо, болделя и о Иисусо. Кала во мангэласпэ, ԥэрнаделя о нэбо
22 и пэр лэстэ змэкляпэ о свынто зор, саво дицэля сар ӷолубо. И па нэбо ашунделя ӷолосо: «Ту мэрно любимо Шаво. Мэ дав тути мэрни блаӷословения».
23 О Иисусо ля тэ росԥэнэн и лащи новость, кала лэсти сас варикай 30 бэрш. Во, сар виадинонас, саслэ Иосифоско шаво,о Ио́сифо — лэ Илиёско шаво,
24 о И́лиё — лэ Матфатоско шаво,о Матфа́то — лэ Левиёско шаво,о Ле́виё — лэ Мелхиёско шаво,о Ме́лхиё — лэ Янаёско шаво,о Яна́ё — лэ Ёсифоско шаво,
25 о Ёсифо — лэ Матафиёско шаво,о Мата́фиё — лэ Амососко шаво,о Амо́со — лэ Наумоско шаво,о Нау́мо — лэ Еслиёско шаво,о Если́ё — лэ Нагеёско шаво,
26 о Наге́ё — лэ Мафоско шаво,о Ма́фо — лэ Матафиёско шаво,о Мата́фиё — лэ Симиноско шаво,о Сими́но — лэ Ёсихоско шаво,о Ёсихо — лэ Ёдаско шаво,
27 о Ёда — лэ Янаноско шаво,о Яна́но — лэ Рисаёско шаво,о Риса́ё — лэ Зарававилёско шаво,о Зарава́вилё — лэ Шалтиелоско шаво,о Шалтие́ло — лэ Нириёско шаво,
28 о Ни́риё — лэ Мелхиёско шаво,о Ме́лхиё — лэ Адиёско шаво,о А́диё — лэ Касамоско шаво,о Каса́мо — лэ Елмадамоско шаво,о Елмада́мо — лэ Ироско шаво,
29 о И́ро — лэ Ешуаско шаво,о Ешу́а — лэ Елизероско шаво,о Елизе́ро — лэ Яримоско шаво,о Яри́мо — лэ Матфатоско шаво,о Матфа́то — лэ Левиёско шаво,
30 о Ле́виё — лэ Симёноско шаво,о Симёно — лэ Юдаско шаво,о Ю́да — лэ Ёсифоско шаво,о Ёсифо — лэ Ёнамоско шаво,о Ёна́мо — лэ Елякимоско шаво,
31 о Еляки́мо — лэ Миляёско шаво,о Миля́ё — лэ Минаёско шаво,о Мина́ё — лэ Матафаёско шаво,о Матафа́ё — лэ Нафаноско шаво,о Нафа́но — лэ Давидоско шаво,
32 о Давидо — лэ Есеёско шаво,о Есе́ё — лэ Аведоско шаво,о Аве́до — лэ Базоско шаво,о Ба́зо — лэ Салмоноско шаво,о Салмо́но — лэ Нахшоноско шаво,
33 о Нахшо́но — лэ Аминадавоско шаво,о Аминада́во — лэ Арниёско шаво,о А́рниё — лэ Хицроноско шаво,о Хицро́но — лэ Фаресоско шаво,о Фаре́со — лэ Иудаско шаво,
34 о Иу́да — лэ Иаковоско шаво,о Иа́ково — лэ Исакоско шаво,о Иса́ко — лэ Авраамоско шаво,о Авраамо — лэ Фараско шаво,о Фа́ра — лэ Нахороско шаво,
35 о Нахо́ро — лэ Сиругоско шаво,о Сиру́го — лэ Реуско шаво,о Ре́у — лэ Фалекоско шаво,о Фале́ко — лэ Евероско шаво,о Еве́ро — лэ Шэлахоско шаво,
36 о Шэла́хо — лэ Каинаноско шаво,о Каина́но — лэ Арфаксадоско шаво,о Арфакса́до — лэ Симоско шаво,о Си́мо — лэ Ноёско шаво,о Ноё — лэ Ламехоско шаво,
37 о Ламе́хо — лэ Мафусалоско шаво,о Мафуса́ло — лэ Енохоско шаво,о Ено́хо — лэ Яредоско шаво,о Яре́до — лэ Малилилоско шаво,о Малили́ло — лэ Каинаноско шаво,
38 о Каина́но — лэ Енососко шаво,о Ено́со — лэ Сифоско шаво,о Си́фо — лэ Адамоско шаво,о Адамо — лэ Дэвлэско шаво.
