Свынто тайна 21:1-27
21 Мэ додиқлэм нэво нэбо и нэви ԥув, важ кода кай о пурано нэбо и пурани ԥув будэр на сас, и на ашэля и моря.
2 Кадяжэ мэ додиқлэм о свынто форо, о Нэво Иерусалимо, саво змэкэлпэ па нэбо лэ Дэвлэстар. Во сас вурядо, сар и тэрни, сави ӷотово тэ диқэлпэ лэ тэрнэса.
3 Мэ ашундэм, сар варико па троно ӷромко ԥэндя: «Лэ Дэвлэстири катуна тердёл машкар и мануша, и во лэла тэ жувэл лэнца. Вонэ авэна лэстирэ народоса, и во авэла лэнца.
4 О Дэл виқосэла и ясва па лэндирэ яқа, и будэр нико на мэрэла, на лэла тэ умардёл бидатар и тэ ровэл, и будэр нисо на лэла тэ дуқал. Вся, состар сас ԥарэс, ужэ нинай».
5 Кодэва, ко бэшэл по троно, ԥэндя: «Мэ терав вся нэво!» — и инке ԥэндя: «Запистросар, важ кода кай кадэла алава чачунэ и лэнди исин патяимос».
6 Потом во ԥэндя манди: «Вся ашэля кадя, сар сас ԥэндо! Мэ А́льфа и Аме́га, пэрво и послиднё. Всаворэнди, ко камэл тэ пэл паи, мэ подарисарава паи котар, кай питяла о паи, саво дэл жызня.
7 Вся када дорэсэлапэ кодэлэсти, ко победия. Мэ ашава лэстирэ Дэвлэса, и во ашэла мэрнэ шавэса.
8 Ай всаворэ даранэ, найверущи, кодэла, кастири дила гряцаливо и мэлали, кодэла, ко умарэл, шалыийпэ*, драбатярэл, полэл аврэ дэвлэн и хохавэл, авэна шутэ андо ягано возэри, саво фартэ ԥабол. Када — дуйто смэрть».
9 Посли када авеля ек анда 7 анӷелоря — када лэндэ сас 7 чарэ, савэ сас ԥэрди 7 послидни биды, — и ԥэндя манди: «Авэн, мэ сыкавава тути ла тэрня, лэ Бакрорэстиря хулая́».
10 Лэ свынтонэ зорэса во пэрэандярдя ман по баро и вучо плай и сыкадя манди о свынто форо Иерусалимо, саво змэкэлпэ па нэбо лэ Дэвлэстар
11 и савэстар марэлас лэ Дэвлэстири стэма. Во свитияспэ кадя, сар ԥэнэса светийпэ кучутно бар, саво шолпэ пэ я́шма, вужи, сар хрусталё.
12 Кай о форо сас састи, вучи стина и 12 вороты, паша савэ тердёнас 12 анӷелоря. Пэ вороты сас пистромэ, сар ақарэн лэ Израилёстирэ 12 шавэн.
13 3 вороты сас пэ восточно риг, 3 вороты — пэ северно риг, 3 вороты — пэ южно риг, и 3 вороты — пэ западно риг.
14 И стина круӷом форо тердёлас пэ 12 бара, пэ савэ сас пистромэ, сар ақарэн лэ Бакрорэстирэ 12 апосталонэн.
15 Кодэва, ко дэлас дума манца, ритярэлас сомнакуни рувли, кай тэ измерий о форо, и вороты, ай кадяжэ и стина.
16 О форо сас квадратно: андо лунгимос во сас кацаво жэ, сар андо буӷлимос. Во измерисардя о форо ла рувляса, и вижыля 2 220 километроря; лэско лунгимос, о буӷлимос и о вучимос сас еқэндар.
17 О анӷело кадяжэ измерисардя и стина, лако вучимос сас 64 метроря. Во измерияс кадя, сар измерин и мануша.
18 Лэ форостири стина сас анда бар я́шма, ай о форо — анда сомнак, саво вужо, сар прозрачно стэкла.
19 О фундаменто тала стина сас вистодо анда разни кучутнэ бара. Пэрво бар — я́шма, дуйто — сапфи́ро, трито — халцэдо́но, штарто — изумру́до,
20 панчто — сардани́ксо, шовто — сердали́ко, сидьмо — хризали́то, восьмо — бери́ло, дивято — тапа́зо, дисято — хризапра́зо, адинацато — гяци́нто, двинацато — амети́сто.
21 Ай и 12 вороты — када 12 жэмчуӷоря; кажни вороты сас стердэ анда ек цыло жэмчужына. Лэ форостири ӷлавно вулица сас анда сомнак, саво вужо, сар прозрачно стэкла.
22 Мэ на диқлэм, кай андо форо тэ авэл и қандири. Лэстири қандири — о Баро Дэл о Иегова и о Бакроро.
23 Лэ форости на трэбуй сас, кай тэ светий о қам и о шон, важ кода кай во светияспэ лэ Дэвлэстиря бахтатар и лэстири лампа сас о Бакроро.
24 Андэ кадэва свето лэна тэ ԥирэн и народоря, и ла ԥувьятирэ царёря лэна тэ драго тэ дэн дума пала лэстэ.
25 Лэ форостирэ вороты десэ на ԥандадёна, ай и рят котэ на авэла.
26 И царёря авэна интя и лэ Дэвлэстар лэла тэ марэл лэндири стэма и патив.
27 Андэ кадэва форо на попэрэла нисо маӷримэ, и интя на зажана кодэла, ко терэл гряцаливо дила и хохавэл. Интя зажана кати кодэла, ко запистромэ андэ ла жызняко лил кай о Бакроро.
Сноски
^ Или «терэл билажавардимос».
