1, 2. а) Сар тэ полас кадэла алава, кай амэндэ исин миро? б) Со на дэл амэнди, кай амэндэ тэ авэл миро всаворэнца? (Диқэн и картинка англа статья.)

ВСАВОРЭ амэ камас, кай тэ авэл миро андэ амари жизня и фартэ тэ на пэрэживаем! Амэ благодарни лэ Иеговасти, кай во дэл амэнди пэско «миро», кай тэ авэл спокойно по ди, и када фэрий, кай тэ на авэн гиндоря, савэндар ԥарэс и тэ на пэрэживаем (Флп. 4:6, 7). Кадяжэ амэндэ исин «миро» лэ Иеговаса, важ кода кай дям алав, кай жуваса важ лэстэ, ай инке, важ кода кай во амаро друго (Рим. 5:1).

² Но время, кала о Дэл стерэла па вся ԥув, кай тэ авэл миро, инке англэ. Амэ жувас андэ кодэя время, пэ сави андэ Библия ԥэнэнпэ «послидни деса». Адес бут войны, и бут мануша андярэн пэс вэрыто аврэнца (2 Тим. 3:1—4). Христианоря трэбуй «тэ марэнпэ» лэ Сатанаса и кодэлэса, сости во сытярэл через и мануша (2 Кор. 10:4, 5). Но май фартэ амэ пэрэживаем пала амаро ери и родо, савэ най свидетеля. Амэндэ дуқал оди, кала вонэ дэкала асанпэ  кодэлэстар, андэр со амэ патяс, дошалярэн амэн, кай амэ розмарас и еря или ԥэнэн, кай отԥэнэнапэ амэндар, если амэ на отԥэнасапэ амаря вератар. Сар амэ пэс тэ андярас, кала против амэндэ жал о ери и о родо? И сар тэ пэрэандярас кадэва ԥаримос?

3, 4. а) Со может тэ авэл машкар и мануша через лэ Иисусости весть? б) Кала найвушэро тэ жас пала Иисусо?

³ О Иисусо ӷанэнас, кай через о чачимос, савэсти во сытярэлас, и мануша жана против ек еқаврэс. Кадяжэ кодэлэнди, ко пала лэстэ жанас, трэбуй тэ авэн смили, кай тэ на парашэн тэ кандэн лэ Дэвлэс, даже кала тасавэн важ и вера. Дэкала через када андэ еря может тэ на авэл миро. О Иисусо ԥэндя: «На гиндон, кай мэ авелэм тэ анав миро пэ ԥув. Мэ авелэм тэ анав най миро, ай о мечо. Мэ авелэм, кай о шаво тэ жал против пэско дад, и щей против пэсти дэй, и бори против пэсти сасуи. И лэстирэ ворогоса ашэла лэско ери» (Матф. 10:34—36).

⁴ Кала о Иисусо ԥэндя: «На гиндон, кай мэ авелэм тэ анав миро», во камля, кай и мануша, савэ лэс ашунэна, драго тэ полэн кода, со авэла, если вонэ закамэна тэ жан пала лэстэ. Через лэстири весть и мануша андо ери и о родо могут тэ на полэн ек аврэс. О Иисусо авеля тэ росԥэнэн о чачимос важ о Дэл, ай най тэ розмарэл и еря (Иоан. 18:37). Но во камэлас, кай лэстирэ ученикоря тэ ӷанэн, кай най вся время авэла вушэро тэ жан пала лэстэ, кала и другоря, о ери, о родо на прилэн о чачимос анда Библия.

5. Каринг со трэбуй сас тэ авэн готови кодэла, ко жанас пала Иисусо?

⁵ Кай тэ авэн лашэ андэ лэ Иисусостирэ яқа кодэла, ко жанас пала лэстэ, трэбуй сас тэ авэн готови, кай о ери, о родо жала против лэндэ (Матф. 10:38). О ери и о родо могли тэ приасанпэ лэ Иисусостирэ учениконэндар и даже тэ парашэн лэнца тэ дэн дума. Но кала вонэ жанас пала Иисусо, лэндэ ашэлас май бут, чем хасардэ. (Адиносар Марка 10:29, 30 *).

6. Пала со трэбуй тэ сэрас, кала о ери и о родо на камэн, кай амэ тэ служисарас лэ Иеговасти?

⁶ Даже если амаро ери, родо, на дэн амэнди тэ служисарас лэ Иеговасти, амэ всаек любисарас лэн. Но андэ кадэя же время амэ сэрас, кай трэбуй тэ любисарас лэ Иеговас и лэ Иисусос май бут, чем лэ ерес и лэ родос (Матф. 10:37). Амэ ӷанас, через кода, кай амэ любисарас пэстирэ чачен, о Сатана закамэла тэ стерэл вся, кай амэ тэ парашас тэ патяс лэ Иеговасти. Роздиқам, кай када может тэ авэл и со тэ терас, кай тэ пэрэандярас о ԥаримос, саво амэндэ исин, кала о ери и о родо жал против амэндэ?

7. Со трэбуй тэ терэн, если кай о хулай и хулаи най ек вера?

⁷ Андэ Библия ԥэнэнпэ, кай кодэлэндэ, ко женийпэ или жал миростэ «андэ лэнди жизня авэна нэвэ проблемы»  (1 Кор. 7:28). Андэ кодэва ери, кай лэ Иеговасти служий кати о хулай или хулаи, могут тэ авэн инке май бут проблемы. Но пэ када трэбуй тэ диқэн, сар о Иегова. О хулай или хулаи нэ могут тэ розжанпэ или тэ ужантар анда ери, если ек андар лэндэ пока на камэл тэ служий лэ Иеговасти (1 Кор. 7:12—16). Хоть о хулай, саво най свидетелё, на сытярэл лэ ерес кодэлэсти, со ԥэнэнпэ андэ Библия, и хулаи всаек трэбуй лэс тэ полэл, сар пэстирэ хулас. Кадяжэ, если андо ери кати о хулай служий лэ Иеговасти, во всаек трэбуй тэ любий пэстиря хулая май фартэ, чем пэстири жизня и драго тэ обжалпэ ласа (Эф. 5:22, 23, 28, 29).

8. Пала со авелоп драго тэ пушэн пэстар, если о хулай или хулаи камэн и варисо терэн, кай тумэ май мало тэ служин лэ Иеговасти?

⁸ Но со тэ терэн, если о хулай или хулаи камэн и варисо терэн, кай тумэ май мало тэ служин лэ Иеговасти? Ԥэнаса, о хулай амаря ԥэяко мангля ла тэ росԥэнэн важ о Дэл най, кала вой камэл, ай андэ варисавэ деса андо курко. Если и тумэндэ кадяжэ, пушэн пэстар: «Мэрно хулай или хулаи ԥэнэн манди, кай мэ тэ парашав тэ служисарав лэ Дэвлэсти? Если най, тоди могу мэ тэ терав кода, со во или вой мангэл?» Кала тумэ андярэна пэс годявэрнэс, када поможыя тумэнди, кай андо ери тэ на споринпэ (Флп. 4:5).

9. Сар и христианоря могут тэ сытярэн пэстирэ бэятонэн, кай вонэ тэ полэн лэ дадэс и ла да, савэ на служин лэ Иеговасти?

⁹ Андо ери, кай лэ Иеговасти служий кати ек анда родителя, тэ барярэн лэ бэятонэн может тэ авэл ԥарэс. Тумэнди трэбуй тэ сытярэн кадя, сар ԥэнэнпэ андэ библейско законо «Полэ лэ дадэс и ла да» (Эф. 6:1—3). Но со тэ терэс, если о хулай или хулаи на жувэн кадя, сар ԥэнэнпэ андэ Библия? Кала тумэ полэн пэстирэ хулас, тоди и тумарэ бэятцэ терэна кадяжэ. Хвалин пэстирэ хулас или хулая пала кода, сар во или вой пэс андярэн и най еқвар ԥэнэн, кай тумэ фартэ любин лэс или ла. На дэн дума англа бэятцэ  найдраго пала пэско хулай или пэсти хулаи. Ԥэнэн лэнди, кай кажно мануш трэбуй екжэно тэ витидэл тэ служий лэ Иеговасти чи най. Кала и бэятцэ драго пэс андярэн лэ дадэса или ла даса, савэнди всаек амари вера, через када вонэ могут тэ закамэн тэ служин лэ Иеговасти.

10. Сар и христианоря могут тэ росԥэнэн пэстирэ бэятонэнди пала Библия, если о хулай или хулаи на служин лэ Иеговасти?

¹⁰ Дэкала о хулай или хулаи, савэндэ най ек вера, могут тэ приԥэнэн, кай лэндирэ бэятцэ тэ терэн и праздникоря, савэ най лэ Дэвлэстар лэ Иеговастар. И кадяжэ сытярэн лэн авря верати, сави на сжалпэ ла Библияса. Дэсавэ хулая на мэкэн, кай лэндирэ жувля христианки, тэ росԥэнэн лэ бэятонэнди пала Библия. Но даже, кала када кадя, кадэла жувля трэбуй тэ терэн вся, пэ скати лэндэ хутилэла зор, кай тэ сытярэн пэстирэ бэятонэн, кай вонэ тэ ӷанэн о чачимос анда Библия (Деян. 16:1; 2 Тим. 3:14, 15). Но со, если о хулай амаря ԥэяко на мэкэл ла, кай вой тэ сытярэл лэ бэятонэн па Библия или тэ лэл лэн пэ собрания? Чаче, ла ԥэяти трэбуй тэ кандэл пэстирэ хулас. Но вой всаек виарақэла, кала тэ росԥэнэн лэ бэятонэнди, андэр со вой патял. Кадя вой поможыя лэ бэятонэнди тэ уӷанэн пала Иегова и пала лэско законо, андэ саво ԥэнэнпэ, со правильно, а со най (Деян. 4:19, 20). Трэбуй тэ сэрэн, кай авэла время, кала и бэятцэ екжэнэ трэбуй авэна тэ витидэн, тэ служин лэ Иеговасти чи най (Втор. 30:19, 20) *.

11. Васо тумэ можете тэ на ладин лэ родоса, саво най свидетелё?

¹¹ Кала тумэ кати линэ тэ сытён па Библия лэ Иеговастирэ свидетелёнэнца, может тумэ на росԥэнэнас пала када пэстирэнди. Но тумари вера ашэля май састи и тумэ лэ одеса полинэ, кай будэр на трэбуй тэ гаравэн, кай камэн тэ служин лэ Иеговасти (Мар. 8:38). Со тэ терэн, если через када тумаро родо на ля тумэн тэ полэл кадя, сар спэрва? Давайте роздиқаса, со поможыя амэнди тэ терас кадя, кай упалэ тэ ладисарас лэнца, но и тэ на парашас тэ кандас лэ Дэвлэс.

12. Васо амаро родо может тэ жал против амэндэ и со поможыя амэнди тэ полас лэс?

¹² Терэн вся, кай тэ полэн, со андо ди кай о родо, саво най свидетелё. Чаче, амэндэ может тэ авэл бари радость кодэлэстар, кай амэ уӷангля о чачимос анда Библия. Но амаро родо может тэ гиндой, кай амэн хохадэ или зацырдэ андэ секта. Вонэ могут тэ гиндон, кай амэ лэн будэр на любисарас, важ кода кай парашэлям лэнца тэ терас и праздникоря. Вонэ даже могут тэ даран, кай амэн марэла о Дэл. Терэн вся, кай тэ полэн, васо тумаро родо кадя пэрэживает. Драго виашунэн лэн (Прит. 20:5). О апостоло Павло терэлас вся, кай тэ полэл разнонэ манушэн, кай тэ росԥэнэн лэнди пала лащи весть. Када может тэ поможый и амэнди (1 Кор. 9:19—23).

13. Сар трэбуй тэ дас дума лэ родоса, савэндэ амэнца най ек вера?

¹³ Лэ родоса дэн дума драго. Андэ Библия ԥэнэнпэ: «Мэк тумари дума вся время авэл ковли» (Кол. 4:6). Трэбуй тэ  мангас лэ Иеговас, кай во тэ дэл амэнди свято духо, кай амэ драго тэ обжаспэ лэ родоса. На трэбуй тэ спорисавас лэнца, тэ доԥэнас, кай вся, андэр со вонэ патян, када хохаимос. Если вонэ пэстирэ алавэнца и пэстиря диласа терэн амэнди дуқанэс, амэ можем тэ сытювас кай и апостолоря. О Павло пистросардя: «Кала амэн дэн амрая, амэ ԥэнас, кай лэндэ тэ авэл лашимос, кала амэн ӷонин важ и вера, на холявас, кала хохавэн пар мэндэ, амэ ԥэнас лэнди лашэ алава» (1 Кор. 4:12, 13).

14. Со может тэ авэл кодэлэстар, кай амэ драго пэс андярас?

¹⁴ Андярэн пэс драго. Хоть тэ дэс дума драго, када фартэ важно, амари дила ԥэнэн май бут, чем и алава. (Адиносар 1 Петра 3:1, 2, 16 *). Мэк тумаро родо диқэл пэр тумэндэ и полэл, савэ бахталэ еря кай лэ Иеговастирэ свидетеля. Ай кадяжэ мэк о родо полэл, васо жувэн и свидетеля, сар андярэн лэ Дэвлэско законо, и сар диқэн пала пэстирэ бэятцэ. Но даже, если амаро родо на прилэла о чачимос анда Библия, амэндэ андо ди авэла радость кодэлэстар, кай амэ вужэ андэ лэ Дэвлэстирэ яқа.

15. Со тэ терас май англал, кай тэ на спорисавас?

¹⁵ Диқэн май дур. Май англал погиндон, через со может тэ авэл споро и сар андэ кадэя время тумэ лэна пэс тэ андярэн (Прит. 12:16, 23). Акэ, со росԥэнэн ек ԥэй анда Австралия: «Мэрнэ састрэсти на чалёлас, кай амэндэ лэ хуласа най кацави вера, сар лэстэ. Сар инке на позвонисардям лэсти, амэ мангасаспэ, кай о Иегова тэ поможый амэнди тэ зритярас пэс, если во ԥэнэна варисо кацаво, со может тэ холярэл амэн». Амэ май англал гиндосардям, пала со ласа тэ дас дума, кай тэ на спорисавас мэрнэ састрэса. Инке амэ терасас вся, кай тэ на дас дума фартэ бут время пала кода, со ԥэнэнпэ андэ Библия и кай амари дума тэ на пэрэжал андо споро».

16. Со тэ терас, кай тэ на дошалярас пэс, кала зажал о споро амарэ родоса?

¹⁶ Амэнди на трэбуй тэ гиндосарас, кай амэндэ вся время вижала тэ на спорисавас амарэ родоса, савэ най свидетеля. Кала зажал о споро лэнца, амэ можем тэ дошалярас пэс андэ када. Амэ фартэ любисарас чачен и на камас лэн тэ холярас. Если тумэндэ андо ди исин кацаво, на домэкэн, кай и любовь каринг о родо тэ авэл май бари, чем любовь каринг о Дэл. Через када, амаро родо полэла, пэ скати важно важ амэндэ тэ терас кода, со ԥэнэнпэ андэ Библия. Амэнди трэбуй тэ сэрас, кай амэ нэ можем нахально тэ за цырдас амарэ родос, кай вонэ тэ патян андо Иегова. Мэк вонэ диқэн, саво лашимос амэнди анэн кода, кай амэ служисарас лэ Иеговасти. Амаро Дэл Иегова камэл, кай амаро родо, сар и амэ, тэ витидэн, тэ служин лэсти чи най (Ис. 48:17, 18).

17, 18. Со тэ терэн, кай тэ на дуқал оди, кала тумаро чачо ашадя лэ Иеговас?

¹⁷ Кала и старейшиноря ԥэндэ, кай  варико анда амаро родо будэр най лэ Иеговаско свидетелё или во екжэно на закамля тэ ашэлпэ андэ организация када, сар шури андо ди. Со тэ терас, кай амэндэ кадя фартэ тэ на дуқал оди?

¹⁸ Гиндон кати пала служения лэ Иеговасти. Адинон и Библия кажно дес. Сар инке на жылэ пэ собрания адинон, со трэбуй важ и собрания, авэн пэр латэ, росԥэнэн пала Дэл и мангэнпэ лэсти, кай во тэ дэл тумэнди зор (Иуды 20, 21). Но тумэнди может тэ здэлпэ, кай тумэ када терэн важ кода, кай кадя присытелэ, ай гиндон пала авэр, кала бэшэн пэ собрания. Со тэ терэн, если оди на парашэл тэ дуқал? На умэкэн и вас! На парашэн тэ служин лэ Дэвлэсти. Када дэла тумэнди зор тэ пэрэандярэн кадэва ԥаримос. Вспомните, сар ԥарэс сас по ди кодэлэстэ, ко пистросардя 73 Псалом. Важ кода кай во най правильно гиндояс, во умэкля и вас. Кала во зажыля андэ лэ Дэвлэско храмо, кати тоди во парудя пэстирэ гиндоря (Пс. 73:16, 17). Важ када и май дур на парашэн тэ служин и тэ кандэн лэ Иеговас.

19. Со амэ терас, кала о Иегова на ашавэл кадя важ о грехо?

¹⁹ Кандэн, кала о Иегова на ашавэл кадя важ о грехо. Кала о Иегова на ашавэл кадя важ о грехо, кадэлэстар спэрва может тэ дуқал оди, но прожала время и када анэна лашимос всаворэнди, кадяжэ кодэлэсти, ко стердя о грехо. (Адиносар Евреям 12:11 *). О Иегова приԥэнэн, кай амэ «будэр тэ на дас дума» кодэлэнца, ко стердя о грехо, но на каийпэ (1 Кор. 5:11—13). Важ кода, сар бы ԥарэс амэнди тэ на авэл, амэ на ласа, кала када на трэбуй, тэ дас дума лэ родоса, саво будэр най свидетелё. На ласа када тэ терас ни па телефоно, ни па письморя, ни через смс, ни через электронно почта, или через социальни сети.

20. Со амэнди трэбуй тэ аштярас?

²⁰ Вся время аштярэн. Кала амэ любисарас, тоди амэ «вся время аштярас», кай кодэла, ко ашадэ лэ Иеговас, варикала ринапэ каринг лэстэ (1 Кор. 13:7). Если тумэ диқэн, кай тумаро чачо мануш парудёлпэ, мангэнпэ, кай кала во адиной и Библия, лэстэ тэ авэл зор и тэ прилэл кода, со ԥэнэн о Иегова: «Рисав каринг мандэ» (Ис. 44:22).

21. Со тэ терэн, если о чачимос анда Библия андя андэ тумаро ери «най миро, ай о мечо»?

²¹ О Иисусо ԥэндя, кай амэ трэбуй май фартэ тэ любисарас лэс, чем варикас. Если амэ кадя на тераса, тоди амэ на аваса лашэ андэ лэстирэ яқа. Ай инке, во патялас, кай лэстирэ ученикоря авэна смили, кай тэ на парашэн тэ кандэн лэ Иеговас, даже кала о ери и о родо жала против лэндэ, через лэндири вера. Если о чачимос анда Библия андя андэ тумаро ери «най миро, ай о мечо», патян лэ Иеговасти, и во поможыя тумэнди тэ пэрэандярэн кадэва ԥаримос (Ис. 41:10, 13). Мэк тумэндэ авэла драго по ди кодэлэстар, кай о Иегова и о Иисусо абурон тумэнца, и кай вонэ дэна тумэнди лашимос важ тумари састи вера.