Андо ери о хулай и хулаи полэн ек еқэс и дэн алав, кай никала на росжанапэ. И вонэ зритярэн пэско алав. Кадэлэса вонэ фэрин пэско ери. Кажно андар лэндэ патял, кай авэр авэла преданно кодэлэ алавэсти, дажэ если андэ лэндири жызня авэла ԥаримос.

Исин еря, савэ жувэн вмести кати через кода, кай даран кодэлэстар, со ԥэнэна о миро. Но пэ бутэстэ май фэдэр, кала андо ери на росжанпэ через кода, кай любин и стон патив ек пэ еқэстэ.

БИБЛЕЙСКО ПРИНЦЫПО. «О хулай на трэбуй тэ ашавэл ла хулая» (1 Коринфянам 7:11).

«Если тути куч тиро ери, ту на лэса тэ ритярэс и холи. Ту на домэкэса тэ прожал бут время, кай тэ простис или тэ прижандёс, кай екжэно дошало. Важ тутэ и проблемы, када най и плая, савэ ни сар на обжаса, ай кати бароро, саво трэбуй тэ пэрэуштавэс» (Майко).

Кала исин ԥаримос, о хулай или и хулаи, савэ на стон патив ек пэ еқэстэ и лэндэ нинай любовь, моӷут тэ гиндон: «Амэ на поджас ек еқэсти, важ када амэнди трэбуй тэ розжаспэ».

«Бут мануша англа кода, сар тэ жэнинпэ или тэ жан миростэ гиндон, кай если со, вонэ мэкэна ек еқэс. Кала и мануша гиндон англа кода, сар инке на стидэ о ери, кай росжанапэ, када сыкавэл, кай лэндэ ужэ нинай ни любовь, ни патив каринг ек еқэстэ» (Джен).

ПУШ ПЭСТАР

Сар тумэ споринпэ

• Ровэспэ ту пэ кода, кай тумэ жэнисайлэ?

• Гиндос ту пала аврэстэ?

• Ԥэнэс ту: «Мэ ужавтар тутар!» или «Виарақава пэсти кодэлэс, ко лэла ман тэ полэл»?

Если пэ дэсавэ или дажэ пэ ек анда кадэла вопросоря ту ԥэндян «да», када сыкавэл, кай тути трэбуй май бут тэ пристос о зор, кай тэ любис пэстирэ манушэс и тэ стос патив пэр лэстэ.

ПОДЭН ДУМА ЕК ЕҚЭСА

• Полэн тумэ, кай ужэ най кадя трэбуй ек еқэсти? Если да, тоди васо?

• Со тэ терэн, кай тэ полэн и тэ на ашавэн ек еқэс?

СОВЕТОРЯ

• Ԥэнэн ек еқэсти пала кода, кай любин ек еқэс.

• Мэк паша тутэ авэла и карточка тирэ хуласти или хулаяти.

• Звонин и бишалэн сообщении, кала тумэ най вмести.

БИБЛЕЙСКО ПРИНЦЫПО. «Важ када лэн ужэ най дуй, ай вонэ ек тила. Вижал, кода, со о Дэл стидя, кай тэ авэл ек, о мануш нащи тэ роздилий» (Матфея 19:6).