Андо Дэл патян бут мануша. Но кала пушэс лэндар, ко када о Дэл, всаворэ ԥэнэн па пэстирятэ. Дэко гиндой, кай о Дэл сындомари, саво кати и аштярэл, кай тэ спушэл лэ манушэндар пала лэндирэ бэзэха. Авэр ԥэнэн, кай о Дэл всаворэн любий и вся простий. Ай варико гиндой, кай лэ Дэвлэсти всаек, со амэнца. Дицол, кай кажно па пэстирятэ полэл, ко када о Дэл. Важ када бут мануша ԥэнэн, кай тэ уӷанэс о чачимос пала Дэл нисар на вижала.

Трэбуй пала када тэ уӷанэс? Да, трэбуй. Сар ту лэса тэ уӷанэс, ко када о Дэл, када можэт тэ дэл тути помощь тэ полэс, васо жувэс (Деяния 17:26—28). Сар ту май драго уӷанэса лэ Дэвлэс, тоди во май фартэ лэла тэ любий тут и тэ поможый тути (Иакова 4:8). Кадяжэ, кода, кай ту ӷанэс о чачимос пала Дэл, можэт тэ дэл тути вечно жызня (Иоанна 17:3).

Сар тэ уӷанэс пала Дэл? Погиндосар пала кодэва, кас ту драго ӷанэс, например пала пэско лашо друӷо. Сар тумэ ашэлэ друӷонэнца? Ту уӷанглян, сар лэс ақарэн, саво во мануш, со во любий, ай со най. Кадяжэ ту уӷанглян, соса во залэлпэ и со во камэл тэ терэл англэ. Во ашэля тирэ друӷоса, важ кода кай ту май драго лэс уӷанглян.

Лэ Дэвлэс кадяжэ можно май драго тэ уӷанэс. Важ када подаса дума акэ пала со.

• САР АҚАРЭН ЛЭ ДЭВЛЭС?

• САВО ВО?

• СО ВО ТЕРЭЛ?

• СО ВО СТЕРЭЛА АНГЛЭ?

• СО ТУТИ МОЖЭТ ТЭ ДЭЛ КОДА, КАЙ ТУ ӶАНЭС ЛЭ ДЭВЛЭС?

Андэ кадэва журнало росԥэнэнпэ, со пала када пистромэ андэ Библия. Май англэ ту уӷанэса най кати, ко када о Дэл, но и саво лашимос авэла кодэлэстар, кай тутэ исин дружба лэса.