KA VAPSWALI
8: Xikombiso
LESWI TLHAMUXELAKA SWONE
Vapswali lava bekelaka vanavu xikombiso lexinene, va hanya hi leswi va swi dondzrisaka. Hi xikombiso, a wu nge laviseli leswaku n’wanaku a vulavula ntiyiso loko a same a ku twa u ku: “Mu byele leswaku a ni kone”, loko ku tlhasa mhunu lweyi a djulaka ku vulavula na wene.
“Vanyingi va li: ‘Yentxa leswi ni ku byelaka swone ku nga li leswi ni swi yentxaka.’ Kambe leswo a swi tizri ka vana. Va fana ni swipondji; va tekelela xin’wana ni xin’wana lexi hi xi hlayaka ni lexi hi xi yentxaka, naswone va swi vona loko hi nga swi yentxi leswi hi va dondzrisaka swone.”—David.
NSINYA WA NAWU WA BIBELE: ‘Wene u zrezraka ku nga yiviwe, wa yiva xana?—Ba-le-Roma 2:21
HA YINI SWI LI SWA LISIMA
Vana va tekelela leswi vapswali vavu va swi yentxaka ku tlula leswi yentxiwaka hi tintanga tavu. Leswo swi tlhamuxela leswaku hi wene u faneliki ku dondzrisa vanaku ndlela leyi va fanelaka ku hanya ha yone hi ku va bekela xikombiso lexinene.
“Hi nga ha byela n’wana ntxhumu wa kukazri hi ku phindhaphindha na hi yanakanya leswaku a nga hi twi, kambe siku ledzri hi taka yentxa leswi hi hlayiki leswaku a nga swi yentxi, a ta hi vutisa. Vana va swi tekela nhlokweni hinkwaswu leswi hi swi yentxaka, nambiloko hi vona ingiki a va swi voni”.—Nicole
NSINYA WA NAWU WA BIBELE: ‘A vutlhazri lebyi pfaka henhla . . . a byi na ku tiyentxisa [kumbe wukanganyisi].’—Yakob 3:17
LESWI U NGA SWI YENTXAKA
Tikambisise: Xana u hlalela swihungatiso wa muxaka muni? U mu khomisa ku yini nkataku ni vanaku? U ni vanghanu va matsrhamela muni? Xana wa va yanakanyela vambeni? Hi ku gomisa, xana u nga swi nyonxela leswaku vanaku va tekelela mahanyela ya ku?
“Mine ni nuna wanga a hi va sindzrisi vanezru ku yentxa leswi hine swi hi hlulaka.”—Christine.
Kombela ku dzrivaleliwa loko u yentxe swihoxo. Vanaku va swi tiva leswaku u mhunu lweyi a yentxaka swihoxo. Loko u yentxe xihoxo, u nga byela nkataku kumbe n’wanaku, u ku: “Ni dzrivalele.” Loko u yentxa tanu, u va dondzrisa ku dumbeka ni ku titsrongahata.
“Vanezru va dondzra swa kukazri loko hi pfumela swihoxo swezru hi va hi kombela ku dzrivaleliwa. Loko hi nga yentxi tanu, va ta tiyimelela loko va yentxa swihoxo.”—Robin.
“Tani hi vapswali, vana va dondzra swinyingi kwezru nakone mahanyela yezru i ya lisima hikusa va ma vona nkama hinkwawu. Mahanyela yezru ma fana ni buku ledzri tsrhamaka na dzri pfulekile ledzri va dondzraka ka dzrone minkama hinkwayu.”—Wendell
