Yesu a dondzrise leswaku hi fanela ku kondletela ku zrula. Kambe ka khambi dzrin’wana, a byele vapostola vake a ku: “Mi nga pimisi leswaku ni tise ku zrula misaveni; a ni tisanga ku zrula, kambe ni tise ku yavana. 35 Hikusa ni teli ku ta vanga ku yavana makazri ka djaha ni papayi wa dzrone, a makazri ka n’wana wa xisati ni mamana wake, ni le makazri ka n’wingi ni n’wingi wake.” (Mt 10:34, 35) Xana Yesu a a djula ku hlaya yini hi mazritu lawa?

Yesu a a nga djuli ku yava mindangu, kambe a a swi tiva leswaku mindangu a yi ta yavana hi kola ka leswi a a swi dondzrisa. Nakone lava a va ta teka xiboho xa ku landzrela Yesu va va va babatisiwa, a va fanela ku swi tiva leswaku xiboho xavu xi nga yentxa leswaku va nyenyiwa hi maxaka. Swi nga yentxeka a maxaka a ma ta va kaneta ma va ma zama ku va tsrhikisa ku landzra tindondzro ta Kriste.

A Bibele dzri hi kutxa ku va ‘ni ku zrula ni vhanu hinkwavu’. (Ro 12:18) Kambe minkama yin’wana, tindondzro ta Yesu ti nga ha byala “ku yavana” a mindangwini yin’wana. Hi ndlela yini? Ku nga yentxeka leswo loko mhunu a ndzruluka Mukriste kambe maxaka yake ma nga xi seketeli xiboho xake nambi ku va ma mu kaneta. Ka swiyimu leswo, hi nga hlaya leswaku a maxaka ya mhunu lweyo ma ndzruluke “valala” vake.— Mt 10:36.

Vakriste lava nga mindangwini leyi yavaniki hi tlhelo dzra wukhongoti, va nga ha kumana ni swiyimu leswi dzringaka ndlela leyi va va zrandzraka ha yone Yehovha na Yesu. Hi xikombiso, va nga ha sindzrisiwa ku patsreka ka minkhuvu leyi kalaka yi nga yamukeleki, xileswo va fanela ku hlawula leswaku va ta yingiseta mani. Yesu a te: “Lweyi a zrandzraka ngopfu papayi wake kumbe mamana wake ku tlula mine a nga fanekeli ku va mudondzrisiwa wanga.” (Mt 10:37) I ntiyiso leswaku Yesu a a nga hlayi swone leswaku vadondzrisiwa vake va fanela ku hambula maxaka yavu. Amatsrhan’wini ya leswo, a a va pfuna ku vona lweyi va fanelaka ku mu zrangisa a wuton’wini. Nambiloko maxaka yezru ma zama ku hi sivela ku tizrela Yehovha, hi ta tama hi ma zrandzra, kambe ku zrandzra Yehovha hi swone leswi hi fanelaka ku swi zrangisa.

I ntiyiso leswaku a swi nabyali ku lwisana ni ku kanetiwa hi maxaka. Nambitanu, valandzreli va Yesu a va fanelanga va dzrivala mazritu lama kumekaka ka Matewu 10:38 lama liki: “Lweyi a nga zrwalikiki mhandzri yake ya nxanisa a ni landzrela a nga fanekeli ku va mudondzrisiwa wanga.” Hi mahlayela man’wana, Vakriste lava va kanetiwaka hi maxaka, va swi twisisa leswaku nkaneto lowo i xiyenge xa leswi humelelaka lava landzrelaka Yesu. Leswi va swi navelaka, i kuva hi ku famba ka nkama, maxaka wolawo ma dondzra xa kukazri ka mahanyela yavu ma va ma txintxa ma yamukela ntiyiso.—1Pe 3:1, 2.