Piwalo pya banja ya Beteli pisaphata basa m’madepartamentu akusiyana-siyana, mbatsalakana basa yakumwaza mphangwa mu dziko ibodzi peno m’madziko mazinji. Anango asatumikira m’misoka ya athumburuzi, kudhinda marevista, kuphataniza matsamba a mabukhu, kuphata basa m’mbuto inakoyerwa mabukhu, kugravari mphangwa zakubvesera na mavidyu, peno kutsalakana mabasa anango a mu cisa.

Komiti ya Filiali isayang’anira mabasa. Mathubo Akutonga anyindira Komiti ya Filiali mabasa anacitwa pa ofesi ya filiali ibodzi na ibodzi, Komiti ineyi isacitwa khundu na akulu a mpingo akuthema akukwana atatu peno azinji. Komiti ya filiali isadziwisa Mathubo Akutonga kuthambaruka kwa basa ya mu cisa cinaonera iwo na kulonga mipingizo inaoneka mu cisa cawo. Malipoti anewa asaphedza Mathubo Akutonga toera kusankhula kuti ndi mphangwa zipi zinafunika kudingwa m’mabukhu antsogolo, m’misonkhano yampingo, yakupambulika, na ya cisa. Aimiriri a Mathubo Akutonga asatumwa mwakukhonda phonya toera kacedzera mafiliali na kupereka citsogolero kuna Makomiti a Filiali toera kutsalakana mabasa awo. (Misangani 11:14) Programu yakupambulika kuphatanizambo nkhani ya muimiriri wa ofesi ikulu isacitwa toera kuwangisa abale anakhala mu cisa ca filiali.

Ciphedzo cisaperekwa kuna mipingo yapacisa. Abale akunyindirika pa ofesi ya filiali asaimirira kukhazikiswa kwa mipingo ipswa. Abale anewa asatsogolerambo basa ya apainiya, amisionaryo, ayang’aniri a cisa akuti asatumikira mu cisa ca filiali. Iwo asakhunganya misonkhano ya cisa na ya gawo, asatsogolera kumangwa kwa Nyumba za Umambo zipswa, asaonerera kutumizwa kwa mabukhu m’mipingo toera kukwanirisa pyakufuna pyawo. Mabasa onsene anacitwa pa ofesi ya filiali asaphedzera basa yakumwaza mphangwa kuti icitwe mu njira yakuthema.—1 Akorinto 14:33, 40, Chibverano Chachinchino.

• Makomiti a Filiali asaphedzera tani Mathubo Akutonga?

• Ndi mabasa api asatsalakanwa pa ofesi ya filiali?