Amwazi mphangwa azinji asaphatisira JW Library^® toera kukhunganyika misonkhano, pontho asaona kuti ndi pyakukhonda nentsa toera kugumana nsolo ubodzi na ubodzi wa pfundziro. Mbwenye Ncenjezi wa pfundziro kazinji kene usakhalambo na misolo inango yakuti ndi yakufunika kuna ife. Mphapo munagumana tani misolo ineyi mbamuphedzeka nayo mukuphatisira JW Library?

• Pantsi pa nsolo ubodzi na ubodzi wa pfundziro ya Ncenjezi, pana khundu yakuti “Mphangwa Zinango.” Pantsi pa khundu ineyi, pfinyani link yakuti “Misolo inango inagumanika mu revista ino.” Mungapita pa khundu ineyi, munaona kuti misolo ya pfundziro iri na numero. Natenepa pfinyani nsolo unango unafuna imwe kuleri wakuti nee ndi wa pfundziro.

• Pa khundu yakutoma ya JW Library pali na khundu yakuti “Novidades,” pa khundu ineyi munakwanisa kubhaxari marevista mapswa a Ncenjezi. Fungulani revista idabhaxari imwe, pontho onani misolo yonsene toera mukwanise kuileri.