Marta, mbeni wali so ayeke Témoin ti Jéhovah na Guatemala, ayeke manda yanga ti kodro ti Kekchi, tongaso si lo fa tënë ti Nzapa na azo so ayeke tene yanga ti kodro ni so. Mbeni lâ, lo bâ mbeni koli so alondo na hôpital ayeke sigi. Gï na bango lo, Marta atene na bê ti lo so koli so alondo na kete kodro ti Kekchi, mbeni kodro so ahoto ayeke dä mingi, na so aTémoin ti Jéhovah ayeke gue ka kâ mingi ape ti fa tënë. Lo gue na terê ti koli ni na lo sara tënë na lo, atâa so lo de ti hinga yanga ti Kekchi nzoni kue ape.

 Marta ahunda ti manda Bible na koli ni. A nzere na lo na lo yeda, me lo tene na Marta so lo yeke na nginza ti payé lo ndali ni ape. Marta atene na lo so aTémoin ti Jéhovah ayeke manda Bible ka na azo senge senge. Lo tene na lo so ni peut ti iri lo na téléphone ti tene ala sara étude ni, na même azo ti sewa ti lo kue apeut ti duti dä. Koli ni angbâ ayeda. So koli ni ayeke tene Espagnol nga lo peut ti diko ni kue, Marta amû na lo Mbeti Nzapa ti fini dunia na yanga ti Espagnol. Lo mû nga na lo Bible afa nyen biani? na yanga ti Kekchi. Na yenga so aga na peko ni, Marta akomanse ti manda Bible na koli ni na wali ti lo nga na amolenge ti ala use. Ala yeke manda ni fani use na yâ ti yenga oko. Marta atene: “Ndali ti so mbi yeke tene Kekchi nzoni ape, e yeke manda ye ni na Espagnol, na koli ni ayeke traduire ni na wali ti lo. Amolenge ni ayeke mä Espagnol.”

 Koli ni so ayeke lani pasteur na eglize ti lo. Lo fa na azo ti eglize ni aye so lo manda na ngoi ti mandango Bible ti lo ni. Tënë ni anzere na azo ti eglize ni, na ala hunda na lo ndo so lo manda afini ye ni so dä. Na temps so lo sara na ala tënë ti mandango ye ti lo na Martha, na peko ti terê ala oko oko akomanse ti ga ti manda Bible ni legeoko na lo. A ninga ape na pekoni, azo 15 akomanse ti bungbi ndo oko yenga na yenga ti tene Martha amanda Bible na ala na lege ti téléphone. Ambeni ngoi na pekoni, ala zia micro na terê ti téléphone ni tongaso si azo kue apeut ti mä ni nzoni.

 Na temps so Martha asara tënë ti mandango Bible ni na a-ancien ti congrégation ti lo, mbeni oko na milieu ti ala ague na kete kodro so awamandango Bible ni ayeke lango dä. Lo tisa ala ti gue ti mä mbeni diskur so surveillant ti circonscription a ayeke gue ti mû na mbeni kete kodro so ayeke nduru na ndo so ala yeke dä. Ti gue na ndo ni so, tongana zo ague na oto lo yeke sara l’heure oko na lege, me tongana lo gue na gere lo yeke sara l’heure use. Azo ni ayeda, na ala 17 la ague.

 Ambeni yenga na pekoni, surveillant ti circonscription ni nga na ambeni Témoin ti Jéhovah ague asara lango osio na ndo so awamandango Bible ni ayeke dä. Na andapre, ala yeke bâ avidéo na yanga ti Kekchi so ayeke na ndö ti jw.org, nga ala yeke manda brochure Azo wa la ayeke sara laso ye so Jéhovah aye? Na peko ti midi, ala yeke bâ avidéo nde nde na ndö ti JW Télédiffusion. Surveillant ti circonscription ni aleke nga lani ti tene a manda Bible na zo oko oko nde nde.

 Na yâ ti alango osio ni, aTémoin ti Jéhovah ni afa nga tënë na akete kodro, so ayeke nduru na ndo ni so, nga ala tisa azo ti ga na mbeni bungbi so ayeke sara ni lani so ayeke nde. Na ngoi ti bungbi ni, aita ni ahunda na azo 47 so aga ti tene a manda Bible na ala oko oko. Asewa 11 ayeda ti manda Bible ni.

 Ambeni nze na pekoni, a-ancien aleke ti tene lakue na aweekend a sara bungbi na kozo kete kodro ni so. Laso, azo 40 tongaso la ayeke gue lakue na abungbi ni. Nga na ngoi so aita ague asara bungbi ti Dango bê na kuâ ti Jésus kâ, a nzere na ala mingi ti bâ so azo 91 la aga.

 Tongana Marta arappelé na pendere ye so asi so, lo tene: “Mbi kiri merci na Jéhovah. Na ambeni temps mbi pensé ka so mbi peut ti sara ye mingi ape, me e yeke tongana agbakuru na tïtî Nzapa. Lo hinga ye so ayeke na yâ ti bê ti azo ti kete kodro so na lo yeke gboto ala ti ga na mbage ti azo ti lo. Jéhovah aye ala.”