Madián na Marcela ayeke azo so ayeke lani na moyen, ala vivre na Medellín na kodro ti Colombie. Madián ayeke sara lani mbeni kua so a yeke payé lo dä bien, ye so amû lege na ala ti lango na yâ ti mbeni pendere da. Me mbeni ye apassé so asara si ala akiri agbu li ti ala na ndö ti aye so ayeke akota ye mingi na yâ ti gigi ti ala ndali ti so ala yeke awakua ti Jéhovah Nzapa. Ala tene: “Na ngu 2006 e gue na mbeni kota bungbi ti lango oko so mama-tene ni ayeke ‘Zia lê ti mo angbâ nzoni.’ Mingi ti adiskur so a mû na ngoi ni afa nene ti dutingo na aye mingi ape na yâ ti gigi ti e tongaso si e voro Nzapa mingi. Na temps so kota bungbi ni ahunzi si e kiri, e bâ so a yeke ye so e yeke sara la ape. E yeke azo so e ye ti vo ye mingi même si e yeke na nginza ni ape, a sara si e yeke na bon na li ti e.”

 Na peko ti so si Madián na Marcela amä adiskur ni so, ala komanse ti sara achangement tongaso si ala duti na aye mingi ape na yâ ti gigi ti ala. Ala tene: “E zia lege ti vongo gbâ ti aye, e quitté da so e yeke na yâ ni e gue na yâ ti mbeni kete ni, e kä oto ti e na e vo moto.” Ambeni ngoi na pekoni, ala zia lege ti guengo na ando so a yeke kä gbâ ti aye dä, tongaso si nzara ti vongo aye gbani asara ala ape. Ala komanse ti mû ngoi mingi ti fa tënë ti Nzapa na azo. Ala sara kamarade na aita so ayeke apionnier spécial, so ayeke azo so amû ngoi ti ala mingi ti fa tënë ti Jéhovah na azo. a

 Hio na pekoni, Madián na Marcela amû desizion ti sara kua ti fango tënë ti Nzapa encore mingi, na lege so ala gue na mbeni congrégation na mbeni kete kodro so bezoin ti awafango tënë ayeke dä. Ti mû lege na ala ti gue kâ, Madián ake kua ti lo. Patron ti lo, so ayeke mbeni wali, atene so ye asara li ti lo la lo ke kua ni so. Madián angbâ atene na lo atene: “Ala yeke na gbâ ti nginza, me eskê ala yeke na ngia?” Patron ti lo ni atene so lo yeke na ngia ape, ndali ti so lo yeke na gbâ ti akpale so lo peut ti leke ni ape. Na pekoni lo ngbâ lo tene na patron ti lo ni lo tene: “Ye so aye ti fa so ye so ayeke kota ye ayeke pëpe wungo ti nginza oke so zo ayeke wara, me a yeke kota ye ti hinga vrai ye so ayeke sara si zo ayeke na ngia. So mbi na wali ti mbi e yeke fa tënë ti Nzapa na azo, a sara si e yeke na ngia, na e ye ti duti na ngia mingi ndani la e ye ti mû encore ngoi mingi ti sara na kua ni so.”

 Madián na Marcela ayeke na ngia na yâ ti gigi ti ala ndali ti so ti sara na Nzapa la ayeke kota ye so ahon atanga ni kue na lê ti ala. Na yâ ti angu 13 so ahon, ala fa tënë na yâ ti acongrégation so a bezoin awafango tënë dä mingi, na mbage ti nord-ouest ti Colombie. Fadeso, ala yeke na ngia ti sara kua tongana apionnier spécial.