MBENI wali ti ngu 25 atene: “Na ngu 1981, mama so abata mbi akui na kobela ti cancer. Ye ni ayeke lani ngangu mingi na mbi na ita ti mbi ti koli. Mbi yeke lani na ngu 17 na lo yeke na ngu 11. Mama amanke mbi mingi. So a tene na mbi a tene lo gue na yayu, mbi ye ti fâ terê ti mbi ti gue na peko ti lo. Lo yeke lani kota kamarade ti mbi.”

A yeke sioni mingi ti bâ so kuâ ayeke na ngangu ti mû mbeni zo so mo ye lo. Tongana asi, ti hinga so mo peut encore ti sara tënë na lo ape, ti he ngia na lo ape, wala ti gbu lo na kate ape ayeke sara si ayeke ngangu na mo ti kanga bê. Na tongana a tene na mo so lo gue na yayu ni la a yeke sara si vundu ti mo adë ape.

Me, Bible amû na e mbeni beku so ayeke nde mingi. Tongana ti so e bâ ni awe, Bible afa so na yâ ti kete ngoi e peut ti kiri ti bâ afami ti e so e perdre ala, na yayu ape, me ge na ndö ti sese so siriri na mbilimbili ayeke duti dä. Na ngoi ni so, azo kue ayeke duti ande na nzoni seni na ala yeke kui encore ape. Ambeni zo apeut ti tene: ‘So bango li la!’

Nyen la alingbi ti mû lege na mo ti yeda so beku so ayeke vrai ye? Ti yeda na mbeni zendo, mo doit ti duti sûr so zo so amû zendo ni ayeke na nzara nga na ngangu ti sara ye ni. Tongaso, zo wa la amû zendo so akuâ ayeke kiri ande na fini?

Na septembre-octobre ti ngu 31, Jésus Christ amû zendo so adë bê, lo tene: “Legeoko tongana ti so Babâ ni azingo akuâ na lo sara si ala duti na fini, Molenge ni nga ayeke sara si zo so lo ye ti tene lo duti na fini aduti na fini. Zia bê ti ala adö pëpe ndali ti tënë so, ndali ti so l’heure ni ayeke ga so ala kue so ayeke na yâ ti adû ti kuâ ayeke mä ande go ti lo, na ala yeke sigi.” (Jean 5:21, 28, 29). Biani, Jésus Christ amû zendo so ande azo kutu mingi, so akui fadeso, ayeke kiri na fini na ndö ti sese so aga paradis na ala yeke wara lege ti ngbâ dä teti lakue lakue na yâ ti siriri (Luc 23:43; Jean 3:16; 17:3; bâ nga Psaume 37:29 na Matthieu 5:5). So Jésus la amû zendo ni, kite ayeke dä ape  so lo yeke sara ye so lo ye ti sara. Me eskê lo peut ti sara ni?

Nduru na ngu use na pekoni, Jésus afa so lo yeke gï pëpe na nzara ti zingo akuâ, me lo yeke nga na ngangu ti sara ni.

Ye ni ahon gbungo li ti zo. Terê ti Lazare ason ngangu. Aita ti lo ti wali use, Marie na Marthe atokua ndo na Jésus, so ayeke na mbage ti Ngu ti Jourdain, a tene: “Seigneur, bâ, lo so mo ye lo mingi so, terê ti lo ason.” (Jean 11:3). Ala hinga so lo ye Lazare. Jésus ayeke ga ande ape ti bâ kamarade ti lo so terê ti lo ason so? Ye so apika bê mingi ayeke so, a hon ti gue hio na Béthanie, Jésus akiri angbâ lango use na ndo so lo yeke dä.—Jean 11:5, 6.

Kete na peko ti tokua ni so, Lazare akui. Jésus ahinga ni, na lo ye ti sara mbeni ye. Tongana lo si na Béthanie, kamarade ti lo ni akui asara lango osio awe (Jean 11:17, 39). Eskê Jésus apeut ti kiri na fini mbeni zo so akui aninga tongaso?

Na ngoi so Marthe, mbeni wali so ayapu amä so Jésus ayeke ga, lo kpe na devant ti lo (bâ nga Luc 10:38-42). So mawa agbu Marthe, Jésus adë bê ti lo na tënë so: “Ita ti mo ayeke zingo na kuâ.” Tongana Marthe afa so lo mä na bê na zingongo ti akuâ so ayeke si ande, Jésus atene na lo polele, atene: “Mbi yeke zingongo ti akuâ nga na fini. Zo so amä na bê na mbi, atâa lo kui, lo yeke kiri na fini.”—Jean 11:20-25.

Tongana lo si na yanga ti dû ti kuâ ni, lo hunda ti tene a zi tênë so a kanga na yanga ni. Tongaso, na pekoni so lo sambela na kota go awe, lo tene: “Lazare, mo sigi!”—Jean 11:38-43.

Lê ti azo kue ayeke bâ dû ti kuâ ni. Na pekoni, na  yâ ti dû so avuko so zo asigi dä. A kanga agere na amaboko ti lo na abongo nga abongo akanga lê ti lo. Jésus atene: “Ala zi lo, na ala zia lo, lo gue.” Tanga ti abongo so a kanga na lo atï na sese. Biani, Lazare, koli so akui a sara lango osio so la!—Jean 11:44.

Évangile ti Jean afa so a zingo Lazare vrai na kuâ. Anzene nzene ye so lo fa dä, asara si apeut ti duti tënë ti mvene ape. Tongana zo ake ni, andâ lo ke nga atënë ti amiracle kue so Bible sara tënë ni, so na popo ni a wara tënë ti zingongo ti Jésus na kuâ. Na ti ke tënë ti zingongo ti Jésus na kuâ a yeke kengo tënë ti mabe ti aChrétien la.—1 aCorinthien 15:13-15.

Tâ tene, tongana mo yeda so Nzapa ayeke dä, a doit ti duti ngangu na mo ape ti mä na bê na tënë ti zingongo ti akuâ. Zia e mû mbeni tapande. Laso, mbeni zo apeut ti mû go ti lo na ndö ti cassette vidéo so na yâ ni a fa lo na andangba tënë ti bê ti lo dä; ti tene na peko ti kuâ ti lo afami nga na akamarade ti lo abâ lo nga amä tënë so lo tene ti fa ye so lo ye a sara na akungba ti lo so angbâ. Na yâ ti ngu ngbangbo oko so ahon, a yeke ngangu ti pensé so a peut ti enregistré go ti zo na yâ ti mbeni vidéo, ye ni so ahon gbungo li ti azo na ti ala ayeke tongana mbeni miracle. Tongana azo apeut ti sara kua na andia ti dunia so Nzapa la asigi na ni, na ala bata image ti zo nga na go ti lo, eskê a yeke duti na lege ni ti pensé so Nzapa so acrée aye ayeke na ngangu ti sara ti lo ahon ala ape? Tongaso, eskê a yeke na lege ni ti mä na bê so Nzapa so acréé fini lo yeke nga na ngangu ti créé peko ti ye lo crée so ape?

Miracle ti zingongo Lazare asara lani si azo mingi aduti na kpengba mabe na Jésus nga na zingongo ti akuâ (Jean 11:41, 42; 12:9-11, 17-19). Ye so afa nga, na mbeni lege so agbu bê ti zo, so Jéhovah na Molenge ti lo aye ti zingo akuâ.

Sarango ye ti Jésus na ngoi ti kuâ ti Lazare afa kota nzoni bê so Molenge ti Nzapa ayeke na ni. Kota vundu so ayeke na bê ti lo na ngoi ni so afa polele nzara ti bê ti lo ti zingo akuâ. Bible atene: “Tongana Marie asi na ndo so Jésus ayeke dä, na lê ti lo atï na ndö ti Jésus, lo tï na gbe ti Jésus, lo tene na lo: ‘Seigneur, tongana mo yeke fade ge, ka ita ti mbi akui pëpe.’ Tongana Jésus abâ Marie so ayeke toto na aJuif so aga legeoko na lo so ayeke toto nga, lo dema na yâ ti bê ti lo, na vundu asara lo. Lo tene: ‘Ala zia lo na ndo wa?’ Ala tene na lo: ‘Seigneur, mo ga mo bâ ndo ni.’ Na ngu ti lê ti Jésus ayuru. Na bango ye so, aJuif ni ato nda ti tene: ‘Ala bâ tâ yengo so lo ye na koli so ma!’”—Jean 11:32-36.

Jésus ayeke bâ mawa ti zo mingi, ye so asigi na lege ti atënë ota so: “lo dema”, “vundu asara lo” na “ngu ti lê ti [lo] ayuru.” Atënë so a sara kua na ni ge ti fa tongana nyen Jésus asara vundu ndali ti kuâ ti kota kamarade ti lo Lazare nga ndali ti so lo bâ aita ti lo ti wali na toto. Ni la vundu ahon ndö ti lo na ngu ti lê ti lo ayuru. *

Ye so apika bê mingi ayeke so Jésus akiri kozoni na azo use na fini, na lo ye nga ti sara mara ni na Lazare (Jean 11:11, 23, 25). Me, “ngu ti lê ti Jésus  ayuru.” Tongaso, ti kiri na zo na fini ayeke gï mbeni senge ye na lê ti Jésus ape. A yeke polele so Jésus abâ mawa ti zo, ye so afa polele so lo yeke na kota nzara ti leke aye so kuâ abuba ni.

Teti so Jésus ayeke ‘tâ image ti Jéhovah Nzapa’, e lingbi, biani, ti bâ so Babâ ti e ti yayu ayeke sara ye nga tongaso (aHébreu 1:3). So Jéhovah ayeke na nzara ti zingo akuâ, Job, mbeni koli be-ta-zo, atene: “Tongana mbeni zo akui, lo lingbi ti kiri na fini? . . . Mo yeke iri ndo, na mbi yeke yeda. Mo yeke ku kungo ti bâ kusala ti maboko ti mo.” (Job 14:14, 15). Tënë so a kiri peko ni na “mo yeke ku kungo” aye ti sara tënë ti kota nzara so Nzapa ayeke na ni ti sara ye (Genèse 31:30; Psaume 84:2). Biani, Jéhovah ayeke ku kungo na nzara ni ngoi ti zingongo akuâ.

E lingbi biani ti mä na bê na zendo ti zingongo ti akuâ? Kite ayeke dä ape so Jéhovah na Molenge ti lo ayeke na nzara nga na ngangu ti zingo akuâ. Ye so aye ti tene nyen ndali ti mo? So mo yeke na beku ti kiri ti bâ afami ti mo so akui, ge na ndö ti sese na yâ ti mbeni nzoni gigi so ayeke nde na ti laso!

Jéhovah Nzapa, so na tongo nda ni azia azo na yâ ti mbeni pendere yaka, amû zendo ti kiri ti leke Paradis na ndö ti sese na gbe ti komandema ti Royaume ti lo ti yayu so lo mû na Jésus Christ, so laso lo wara gloire awe (Genèse 2:7-9; Matthieu 6:10; Luc 23:42, 43). Na yâ ti fini Paradis so, azo ayeke duti na beku ti wara fini ti lakue lakue na kobela ayeke dä encore ape (Apocalypse 21:1-4; bâ nga Job 33:25; Ésaïe 35:5-7). Tënë ti kengo terê, ti kengo zo ndali ti poro ti terê ti lo, sarango ye ti ngangu na zo ndali ti mara ti lo nga na akpale ti mosoro ayeke hunzi! Jéhovah Nzapa, na lege ti Jésus Christ ayeke zingo ande akuâ ti vivre na ndö ti sese so sioni ayeke dä ape.

So ayeke fadeso beku ti wali Chrétien so e sara tënë ti lo na tongo nda ti mbage ti brochure so la. Ngu mingi na peko ti kuâ ti mama ti lo, aTémoin ti Jéhovah a-aidé lo ti manda Bible nzoni. Lo tene: “Na ngoi so mbi mä tënë ti zingongo ti akuâ, mbi toto. A yeke pendere ye mingi ti hinga so mbi yeke kiri ti bâ mama ti mbi.”

Tongana mo nga bê ti mo ayeke ku kungo ti bâ mbeni fami ti mo, aTémoin ti Jéhovah ayeke duti ande na ngia ti fa na mo tongana nyen la mo nga mo peut ti duti na mara ti beku so.