Tongana mo ye ti hinga mbeni zo nzoni, a yeke bien ti gi ti hinga aye so zo ni asara nga na akpale so lo hon ndö ni. Legeoko nga, tongana mo ye ti hinga Nzapa nzoni, a yeke bien ti gi ti hinga aye so lo sara. Na ngoi so mo yeke sara tongaso, peut-être a yeke étonné mo ti hinga gbâ ti aye so lo sara ândö so aga na e aye ti nzoni laso nga na yâ ti gigi ti kekereke.

Jéhovah Nzapa ayeke Zo so asara aye kue, nga ‘asarango ye ti terê ti lo so lê abâ ni pëpe asigi polele ngbene ye so a leke dunia ti ga na ni, ngbanga ti so a bâ ni na lege ti aye so lo sara’. (aRomain 1:20). “Me Nzapa la ayeke zo so aleke sese ni na lege ti ngangu ti lo, lo sara si sese aluti ngangu na lege ti ndara ti lo, lo gbara yayu na lege ti hingango ndo ti lo.” (Jérémie 10:12). Apendere ye so Nzapa asara afa so lo pensé na e.

Bâ tongana nyen la Jéhovah asara si e yeke tâ nde mingi na lege so lo créé e na “image ti lo”. (Genèse 1:27). So aye ti tene lo sara si e peut ti sara ye kamême tongana lo. Lo sara si e yeke na ngangu ti hinga pensé ti lo na ndö ti aye nde nde nga ti hinga amama-ndia ti lo. Tongana e sara effort ti sara ye alingbi na aye ni so, e yeke duti na ngia nga e yeke hinga ndani so e yeke na fini. Na ndö ni lo mû na e pasa ti lë songo na lo.

Aye so Nzapa acréé afa so lo pensé na e mingi. Bazengele Paul afa so Nzapa ‘angbâ gï tongaso pëpe, me lo fa mbeni tënë ti témoin na ndö ti lo na lege ti anzoni ye so lo sara na mungo na [e] ngu-nzapa so alondo na nduzu, angoi so alê ti kobe ayeke lë dä mingi nga na akobe mingi mingi na lo sara si ngia asi bê ti [e].’ (Kusala 14:17). Nzapa amû na e pëpe gï kete ye so e bezoin ni ti ngbâ na fini, me lo mû na e gbâ ti aye nde nde so asara si gigi anzere na e. So ayeke gï kete yanga ti ye so lo ye ti sara ndali ti e la.

 Nzapa asara sese ti tene azo angbâ na ndö ni lakue lakue. Bible atene: “Sese, lo mû ni na amolenge ti azo” nga “lo leke ni ti tene angbâ gï senge pëpe, me lo leke ni ti tene azo aduti dä.” (Psaume 115:16; Ésaïe 45:18). Azo wa la ayeke duti dä? Nga ala duti dä teti ngoi oke? Bible atene: “Sese ayeke ga ande ye ti azo ti mbilimbili, na ala yeke ngbâ na ndö ni lakue lakue.”​—Psaume 37:29.

Jéhovah asara lani Adam na Ève, na lo zia ala na yâ ti paradis na ndö ti sese “ti fâ ni nga ti bâ lege ni.” (Genèse 2:8, 15). Nzapa amû na ala mbeni pendere ye ti sarango ni. Lo tene: “Ala dü, ala ga gbani, ala si ndö ti sese na ala sara si sese ni aga na gbe ti ala.” (Genèse 1:28). Tongaso, Adam na Ève ayeke lani na beku ti duti na fini ti lakue lakue na ndö ti sese. Mawa ni ayeke so ala ke yanga ti Nzapa ndani la ala girisa pasa so ala yeke na ni ti duti na popo ti “azo ti mbilimbili” so ‘sese ayeke ga ande ye ti ala.’ Me, tongana ti so e yeke bâ ande, ye so ala sara so achangé pëpe ye so Jéhovah aleke na bê ti lo ti sara ndali ti e na sese. Me kozoni kue, zia e bâ encore mbeni ye so Nzapa asara.

Bible ayeke tënë ti Nzapa. Me ngbanga ti nyen la lo mû na e Bible? Kozoni kue a yeke ti tene e hinga ye na ndö ti lo (aProverbe 2:1-5). A yeke vrai so Bible akiri pëpe tënë na ahunda kue so e hunda na ndö ti Nzapa, na mbeni livre nde nga kue apeut ape (Zo-ti-fa-tene 3:11). Me aye so kue e wara na yâ ti Bible apeut ti aidé e ti hinga Nzapa. Na lege ni, e yeke hinga Nzapa na fason ti sarango ye ti lo na mbage ti azo. E yeke hinga azo so Nzapa aye sarango ye ti ala nga na azo so lo ke sarango ye ti ala (Psaume 15:1-5). E yeke manda ti hinga pensé ti Nzapa na ndö ti fason so lo ye e voro na lo, sarango ye ti zo, nga na warango aye ti sese. Nga Bible afa na e sarango ye ti terê ti Jéhovah so asigi polele na yâ ti atënë nga na asarango ye ti terê ti Molenge ti lo Jésus Christ.​—Jean 14:9.

Mbeni raison so Nzapa amû na e Bible ayeke ti tene e hinga tongana nyen ti duti na ngia na yâ ti gigi ti e. Na lege ti Bible, Jéhovah afa na e tongana nyen la sewa ti e apeut ti duti na ngia, lo fa na e ti zia bê ti e gï na ndö ti aye so e yeke na ni nga ti hon ndö ti gingo bê. Nga tongana ti so e yeke gue ti bâ, Bible akiri tënë na akota hunda so abâ gigi ti e, na tapande: Ngbanga ti nyen la pasi asi singo tongaso? Gigi ti e ti kekereke ayeke duti ande tongana nyen? A fa nga ye so Nzapa asara awe ti tene ye so lo leke na bê ti lo ti sara ande asi biani.

Ambeni ye afa so Bible ayeke tâ nde mingi, na so wa ni ayeke gï Nzapa. A sû ni teti ngu 1600 na azo 40 la si asû ni, atâa so kue mama-tënë ni ayeke oko ndali ti so Nzapa la ayeke wa ni (2 Timothée 3:16). Nde na tanga ti ambeti so a sû ni aninga awe, atënë ti Bible angbâ na place ni; tongana a mû aBible ti laso a haka ni na angbene manuscrit ti Bible, a yeke bâ so atënë ni ayeke gï oko. Na ndö ni, atâa so azo asara kue ti kanga lege si a sû Bible, a kangbi ni nga azo adiko ni, Bible angbâ lakue. Laso, Bible la ayeke mbeti so a kangbi ni mingi nga a traduire ni mingi. So Bible angbâ lakue so, a fa so “tënë ti yanga ti Nzapa ti e ayeke ngbâ lakue.”​—Ésaïe 40:8.

Mbeni ye so Nzapa akiri asara, a yeke pendere matabisi so lo mû si ye so lo leke ti sara ndali ti e aga tâ tënë. Tongana ti so e tene kozo, lo ye lani ti tene azo angbâ lakue na fini na ndö ti sese. Me na ngoi so Adam ake yanga ti Nzapa si lo sara siokpari, lo girisa pasa so lo yeke na ni ti ngbâ na fini lakue lakue, gï lo oko ape me amolenge ti lo nga kue. Bible atene: “Na lege ti zo oko siokpari alï na yâ ti dunia so, na lege ti siokpari kuâ aga, tongaso kuâ amû azo kue ngbanga ti so ala kue asara fade siokpari.” (aRomain 5:12). Kengo yanga ti Adam so asara mo bâ mo tene ye so Nzapa aleke ti sara so atï na ngu. Me Nzapa asara ye lani tongana nyen?

Aye kue so Nzapa asara lani ague oko na sarango ye ti terê ti lo. Lo futa lani Adam na Ève alingbi na ye so ala sara, me na lege ti ndoye Nzapa asara aye ti nzoni ndali ti ahale ti ala. Ndara ti Nzapa amû lege na lo ti hinga tongana nyen ti leke kpale ni so, na hio lo fa ye so ayeke leke kpale ni so (Genèse 3:15). Na  lege ti Jésus Christ, e lingbi ti sigi na gbe ti siokpari na kuâ. Ye so ahunda lani ti sara nyen?

Ti zi azo na gbe ti kpale so kengo yanga ti Adam aga na ni, Jéhovah atokua Jésus na sese ti fa na azo lege ti fini nga “ti mû fini ti lo tongana ye so a futa ti zi azo mingi.” * (Matthieu 20:28; Jean 14:6). Jésus apeut lani ti mû ye so afuta ti zi azo ndali ti so lo yeke lani mbilimbili-kue tongana Adam. Me nde na Adam, lo mä yanga ti Nzapa même juska na kuâ. So lo kui sân ti sara siokpari, Jéhovah azingo lo na lo kiri na yayu. Lo peut fadeso ti sara ye so Adam asara ni lani ape so, lo mû na azo so amä yanga pasa ti wara fini ti lakue lakue. Bible atene: “Gï tongana ti so ndali ti kengo yanga so zo oko ake, azo mingi aga awasiokpari, legeoko nga ndali ti mango yanga so zo oko amä, a yeke diko ande azo mingi tongana azo ti mbilimbili.” (aRomain 5:19). Na lege ti sandaga ti Jésus, Nzapa ayeke sara si zendo so lo mû ti tene azo aduti na fini lakue lakue na ndö ti sese aga tâ tënë.

E manda ye mingi na ndö ti Jéhovah na yâ ti fason so lo leke na kpale so Adam aga na ni na lege ti kengo yanga. E bâ so ye oko apeut pëpe ti kanga lege na Jéhovah ti hunzi ye so lo komanse ti sara, “nyen na nyen tënë ti lo” ayeke ga tâ tënë (Ésaïe 55:11). E bâ nga tongana nyen la Nzapa aye e mingi. “A bâ ndoye ti Nzapa na mbage ti e na lege so: Nzapa atokua lani oko Molenge ti lo na dunia so si e lingbi ti wara fini na lege ti lo. A bâ ndoye ni na lege so, a yeke e la e ndoye Nzapa pëpe, me a yeke lo la si lo ndoye e na lo tokua Molenge ti lo tongana sandaga so amû lege ti leke songo na popo ti zo na Nzapa, sandaga ndali ti asiokpari ti e.”​—1 Jean 4:9, 10.

Nzapa ‘azi même Molenge ti lo wani na yâ ti kpale pëpe, me lo zia lo na lê ni ndali ti e kue,’ ni la e yeke na kite oko ape so Nzapa ayeke “sara ande nga nzoni bê na e ti mû tanga ti aye kue na e”. (aRomain 8:32). Nyen la Nzapa amû zendo ti sara ndali ti e? Diko mbage so aga na peko.