Josué 6:10-15, 20 atene so aturugu ti Israël atambela angoro gbata ti Jéricho lango oko fani oko juska lango omene. Na lango mbasambala ni, ala tambela ala ngoro tere ti gbata ni fani mbasambala, na Nzapa asara lani si ngangu gbagba ti Jéricho atï. Ye so amû lege lani na azo ti Israël ti lï na yâ ti Jéricho na ti mû ni na ngangu. Azo ti gingo ye na gbe ti sese awara mbeni ye so afa so a ngoro gbata ti Jéricho gi na yâ ti kete ngoi tongana ti so Bible atene?

Na Israël ti giriri, a yeke si ka mingi so aturugu ayeke ngoro mbeni ngangu gbata. Me tongana ala ngoro gbata ni aninga, azo ti gbata ni ayeke te mingi ti akobe ti ala so ala bata. Ye oko, ti gbata ti Jéricho na peko ti so atï, azo ti gingo ye na gbe ti sese awara gbâ ti akobe so angbâ. Ni la, na yâ ti mbeni buku so ayeke na Anglais (Biblical Archaeology Review) atene: “Ye so a wara mingi na peko ti so a futi gbata ni ayeke afango ta ti sese nga na alê ti kobe . . . Ye so ayeke nde mingi na atënë so ayeke na yâ ti mbeti ti mbaï ti Palestine ti aye so a wara na gbe ti sese.” A tene nga na yâ ti buku ni a tene: “Ti wara mara ti gbâ ti lê ti kobe tongaso ayeke nde mingi na ye so ayeke si ka.”

Bible atene so azo ti Israël amû kobe oko ape na yâ ti gbata ti Jéricho ndali ti so Jéhovah ahunda lani na ala ti sara tongaso (Jos 6:17, 18). A tene nga a tene so azo ti Israël amû kodoro ni na yâ ti nze ti mars na avril, na peko ti ngoi ti kongo lê ti kobe, na ngoi ni so alê ti kobe ayeke gbani gbani (Jos 3:15-17; 5:10). So gbâ ti alê ti kobe angbâ na yâ ti gbata ti Jéricho afa so a ngoro ni aninga ape tâ gi tongana ti so Bible atene.