Tongana mo mä a tene, “Ngoi ti nda ni aga nduru awe”, nyen la aga na li ti mo? Eskê mo yeke pensé na ngoi so Christ ayeke ga ande ti mû anzoni zo ti gue na ni na yayu, na ti bi asioni zo na lê ti wâ? Wala mo yeke pensé gi na lango ti kuâ ti zo? Na pensengo na mara ti aye ni so, ambeni zo ayeke gi bê ti ala, ti ambeni a sara ye oko na ndo ti ala ape wala ti ambeni a sara même ala ngia.

Bible atene: “Nda ni ayeke ga.” (Matthieu 24:14). A iri nga oko ngoi ni so “kota lango ti Nzapa,” nga “Harmaguédon.” (Apocalypse 16:14, 16). A yeke tâ tënë so abungbi ti nzapa asara atënë nde nde na ndo ni, atënë so zo ahinga li ti lo na ni ape nga so azia mbeto na bê ti azo. Me, Bible afa na e tâ tënë polele na ndo ti tënë ti ngoi ti nda ni. Lo fa na e ye so ngoi ti nda ni aye ti tene nga ye so aye ti tene pëpe. Bible amû nga maboko na e ti hinga polele so ngoi ti nda ni aga nduru awe. Kota ye ni kue ayeke so, lo fa na e tongana nyen ti sö kuâ na yâ ni. Kozoni, zia e bâ ambeni bango ndo na ndo ni so ayeke na lege ni ape nga ye so ngoi ti nda ni aye ti tene. Ti Bible, ngoi ti “nda ni” aye biani ti tene nyen?

1. NGOI SO A YEKE GA TI GBI SESE NA KOTA WÂ.

   Bible atene: “[Nzapa aleke] gere ti sese, si a yengi lâ oko pëpe.” (Psaume 104:5). Versê so, nga na ambeni nde, adë bê ti e so Nzapa ayeke futi ande sese so lâ oko ape wala lo yeke zia nga lege pëpe ti tene a buba ni.—Zo-ti-fa-tene 1:4; Ésaïe 45:18.

2. NGOI TI NDA NI AYEKE PËPE MBENI NGOI SO AYEKE SI GI TONGASO.

   Bible afa so ngoi ti nda ni ayeke mbeni ngoi so a fa ni kozo awe. Nzapa afa mbeni lango ndali ni awe. Bible ni atene: “Na ndo ti tënë ti lango ni so nga na ngbonga ni so, zo oko ahinga ni pëpe, atâa a-ange na yayu, wala Molenge ni ahinga ni pëpe, me gi Babâ ni. Ala sara hange, zia lê ti ala angbâ na zingo ni, teti ala hinga pëpe lawa si lango so a fa ni awe ayeke si.” (Marc 13:32, 33). A yeke polele so Babâ ni, so ti tene Nzapa, asoro mbeni mbilimbili “lango” awe so ngoi ti nda ni ayeke si ande dä.

3. AZO WALA AMBENI YE NA LÊ TI NDUZU SO AYEKE TÏ NA SESE LA AYEKE ZI LI NI PËPE.

   Azo wa la ayeke zi li ni ande? Apocalypse 19:11 atene: “Mbi bâ yayu alungula, na bâ, mbeni vuru mbarata. Lo so aduti na ndo ti mbarata ni, iri ti lo ayeke Be-ta-zo so ayeke tene gi tâ tënë.” Versê 19 atene: “Na pekoni, mbi bâ nyama ti ngonda ni, agbia ti sese nga na aturugu ti ala abungbi tere ti ala ti tiri bira na lo so aduti na ndo ti mbarata ni nga na aturugu ti lo.” (Apocalypse 19:11-21). Atâa so atënë so a sara kua na ni ge ayeke na lege ti hakango ye, e peut ti mä yâ ni tongaso: Nzapa ayeke tokua a-ange ti lo tongana aturugu ti ga ti futi awato ti lo kue kue kue.

1. NGOI SO A YEKE FUTI ANDE AGOUVERNEMENT TI AZO.

   Bible atene: “Fade Nzapa ti yayu ayä royaume [wala gouvernement] so afuti lâ oko pëpe, na Lo zia royaume ni na tïtî ambeni zo nde pëpe; me  fade royaume so afâ mbeni royaume so kue nduru nduru, na a sara si royaume nde nde so kue awe; na fade royaume so angbâ lakue lakue.” (Daniel 2:44). Tongana ti so e londo ti bâ fade fadeso, na point 3 ni, a yeke ga ande ti futi “agbia ti sese nga na aturugu ti ala”, so ala yeke bungbi ande “tere ti ala ti tiri bira na lo so aduti na ndo ti mbarata ni nga na aturugu ti lo.”—Apocalypse 19:19.

2. NGOI SO BIRA, SARANGO YE TI NGANGU NA ZO NGA NA DORONGO DROIT TI AZO AYEKE HUNZI.

   “[Nzapa asara] si bira awe juska na nda ti sese.” (Psaume 46:10). “Azo ti mbilimbili, fade ala duti na sese so, na azo so alingbi kue, fade ala ngbâ dä. Me azo ti sioni, fade a lungula ala na sese so, na fade a gboto azo ti handa na yâ sese ni.” (aProverbe 2:21, 22). “Bâ, mbi yeke sara si aye kue aga fini.”—Apocalypse 21:4, 5.

3. NGOI SO A YEKE FUTI ANDE ABUNGBI TI NZAPA SO AFA TÂ TËNË PËPE NA AZO NA NDO TI NZAPA.

   “Aprophète afa tënë ti wataka na iri ti Nzapa, na asacrificateur akomande na lege ti tënë ti aprophète ni. . . . Tongana nda ni asi, fade i sara nyen?” (Jérémie 5:31). “Na lâ ni kâ, fade azo mingi ayeke tene na mbi, ‘Seigneur, Seigneur, e tene aprophétie na iri ti mo pëpe? E tomba asioni yingo na iri ti mo pëpe? E sara akusala ti ngangu mingi na iri mo pëpe?’ Me fade mbi yeke tene na ala: Mbi hinga ala lâ oko pëpe! Ala hon yongoro kâ na tere ti mbi, ala azo so akpe ndia pëpe.”—Matthieu 7:21-23.

4. NGOI SO A YEKE FUTI ANDE AZO SO AYEKE NA PEKO TI AKPALE TI DUNIA.

   Jésus Christ atene: “Ye so amû lege ti fâ ngbanga ni ayeke so: Lumière aga na yâ ti dunia so, me azo aye bingo ahon lumière, teti akusala ti ala ayeke sioni.” (Jean 3:19). Bible asara tënë ti mbeni ngoi so lani a futi aye kue na ndo ti sese na ngoi ti Noé, so ayeke lani mbeni kota wakua ti Nzapa. A tene: “Dunia ti ngoi ni so afuti na ngoi so kota ngu apika amene ni. Me na lege ti oko tënë so, a bata ayayu na sese ti fadeso ti ku na wâ, na a bata ni ti ku lango ti ngbanga nga ti futingo azo so akpe Nzapa pëpe.”—2 Pierre 3:5-7.

Bâ so a haka “lango ti ngbanga nga ti futingo azo” na ngoi so a futi lani “sese” na ngoi ti Noé. Sese wa la a yeke futi ande ni so? A yeke sese so e dö ni so ape. A yeke “futi” ande gi “azo so akpe Nzapa pëpe”, wala awato ti Nzapa. Tongana “lango ti ngbanga” so Nzapa ayeke ga ande na ni asi, lo yeke futi ande ala so asoro ti duti awato ti lo. Me ala so ayeke akamarade ti lo, lo yeke bata ande ala legeoko tongana ti so lo bata lani Noé na asewa ti lo.—Matthieu 24:37-42.

Tara ti bâ tongana nyen la dunia ayeke duti ande pendere na peko ti so Nzapa afuti azo ti sioni kue! A yeke polele so, sango so Bible amû na e na ndo ti ngoi ti nda ni ayeke mbeni nzoni sango, me pëpe sioni sango. Me, mo peut ti hunda tere ti mo, mo tene: ‘Eskê Bible afa na e lawa la ngoi ti nda ni ayeke ga? A ga nduru ti si awe? Mbi yeke sara tongana nyen ti sö kuâ na yâ ni?’