Ti duti na nzoni songo na sewa nga na akamarade ti e
Gbâ ti azo abâ so a yeke ngangu na ala ti duti na kpengba songo na azo. Bâ ambeni mama-ndia ti Bible so apeut ti aidé mo ti duti na nzoni songo na azo.
PENSÉ GÏ NA MO WANI APE
MAMA-NDIA TI BIBLE: “[Ala zia] lê ti ala gï na ndö ti aye ti ala wani pëpe, me nga na ndö ti aye ti amba ti ala.”—aPhilippien 2:4.
NDA TI VERSÊ NI: Songo ti e na amba ti e ayeke duti nzoni tongana e gi ti pensé na aye so e peut ti sara ndali ti ala ahon ti pensé na aye so ala peut ti sara ndali ti e. Na yâ ti gigi, tongana mo yeke pensé gï na mo wani mingi, songo ti mo na azo apeut ti buba. Na tapande, na popo ti mbeni koli na wali ti lo, tongana mbeni ayeke pensé na lo wani mingi, a peut ti gue ngbii mbeni lâ lo duti be-ta-zo na mba ti lo ni ape. Na mbage, zo oko ayeke ye ande ape ti sara kamarade na mbeni zo so ayeke baba mingi. Mbeni mbeti atene so “azo so ayeke pensé ka gï na ala wani ayeke wara akpale mingi.”
YE SO MO PEUT TI SARA:
-
Aidé amba ti mo. Avrai kamarade ayeke na confiance na mba nga ayeke nduru ti aidé mba. Ambeni mbeti afa so a yeke ngangu na azo so ayeke aidé ka amba ti ala ti tï na yâ ti kota vundu, nga ala yeke bâ so ala yeke na valeur.
-
Zia terê ti mo na place ti amba ti mo. Ti zia terê ti mo na place ti mba ti mo aye ti tene ti sentir vundu ti bê ti lo. Tongana mo zia terê ti mo na place ti mba ti mo, a yeke duti ande ngangu na mo ti tene atënë so akpa tënë ti ngia me so ason lo.
Tongana mo zia terê ti mo na place ti amba ti mo, mo yeke kanga nga bê na ala; ye so apeut ti sara si mo yeke ke zo senge senge ape, nga mo yeke sara kamarade na azo nde nde, atâa ala londo na ndo wa.
-
Mû temps ti duti na azo. Ti mû temps ti duti na azo, a yeke sara si mo yeke hinga ala nzoni mingi. Tongana mo causé na azo na ndö ti aye so agbu bê ti ala, mo yeke wara avrai kamarade. Tongaso, mä zo nzoni. Tongana kamarade ti mo afa na mo aye so agbu bê ti lo, fa so mo kue ye ni agbu bê ti mo. Mbeni mbeti atene so “tongana azo asara lisoro nzoni na popo ti ala, a yeke sara si ala peut ti duti na ngia.”
SORO AKAMARADE TI MO NZONI
MAMA-NDIA TI BIBLE: “Ti sara songo na asioni zo ayeke buba anzoni sarango ye ti zo.”—1 aCorinthien 15:33.
NDA TI VERSÊ NI: Akamarade apeut ti pusu mo ti sara ye ti nzoni wala ye ti sioni. Awandara so amanda ye na ndö ti sarango ye ti azo atene so, sarango ye ti akamarade apeut ti joué mingi na ndö ti mbeni zo. Na tapande, ala tene so mbeni zo apeut ti komanse ti nyon manga wala lo peut ti gi ti sara divorce, tongana akamarade ti lo asara mara ni.
YE SO MO PEUT TI SARA: Sara kamarade na azo so ayeke na apendere sarango ye so mo ye ni mingi wala mo ye ti mû pekoni. Na tapande, gi ti sara kamarade na azo so ayeke ne amba ti ala, so ayeke mû ye na azo nga ayeke yamba azo.
AMBENI MAMA-NDIA TI BIBLE NI
Bâ avidéo so atënë ni aluti na ndö ti Bible so a sara ni ti aidé acouple, amaseka nga na amolenge ti tene sewa ti ala aduti nzoni
KPE TI TENE ATËNË SO ASON AZO.
“Tënë so zo atene sân ti gbu li ayeke kpo zo tongana épée.”—APROVERBE 12:18.
MÛ YE NA AZO.
“Zo so amû ye mingi na azo, ye ti lo ayeke maï.”—APROVERBE 11:25.
SARA YE NA AZO TONGANA TI SO MO YE ALA SARA NA MO.
“Ye kue so ala ye azo asara na ala, ala sara ni na azo ni nga.”—MATTHIEU 7:12.
