Albillitte woyyitino yanna daggannoha lawannohe? Alame buutote qarri amadinoha ikkirono, batinyu manni woyyitino yanna dagganno yee hexxanno. Ikkina, addinta coyi woyyaawanni haˈranno yine hexxa dandiineemmo? Ee dandiineemmo! Qullaawu Maxaafi, albillitte woyyitino yanna daggannota kule huluullammannikki hexxo aannonke.

•  Qullaawu Maxaafi kulanno hexxo hiitteeti?

•  Qullaawu Maxaafi kulanno hexxo haaqeete halchooti?

•  Tini hexxo woˈmitannohu hiittoonniiti?

•  Tini hexxo woˈmitannohu mamarooti?

•  Qullaawu Maxaafi kulanno hexxo xaa yannara kaaˈlitannohehu hiittoonniiti?

 Qullaawu Maxaafi, mannu ooso lowo qarri amadannota kulanno. Ikkollana, kuni qarri noo gedeenni heeˈrannoha ikkinokkitano kulanno. Hanni tennera mito lawishsha laˈno.

•   Qarra: Mine hooga

   Qullaawu Maxaafi yaannore: “Manniˈya, mine miˈne heeˈranno.”—Isayaasi 65:21.

   Hatto yaa mayyaate? Albillitte mannu uminsa minira heeˈranno.

•   Qarra: Loosu hoongenna buxima

   Qullaawu Maxaafi yaannore: “Manniˈya . . . [loosiˈrinorinni] seeda diro hagiidhanni heeˈranno.”—Isayaasi 65:22.

   Hatto yaa mayyaate? Albillitte mannu baalunku hagiirsiisannohanna kassi assanno looso afiˈranno.

•   Qarra: Taashshote xeˈne

   Qullaawu Maxaafi yaannore: “Taashshe gashshanno moote daannoti yanna iillitino; ledosi gashshaanono halaalu yoo yitanno.”—Isayaasi 32:1.

   Hatto yaa mayyaate? Albillitte manna sirchunni woy dagoomu giddo noonsa bayichinni kainohunni dimiincanni; qoleno buxinoha mittono dianfanni. Mannu baalunku taashsho afiˈranno.

•   Qarra: Taaltino sagale anjenna hude

   Qullaawu Maxaafi yaannore: “Baatto gide laashshito; ilaallate aana jajju woˈmo.”—Faarso 72:16.

   Hatto yaa mayyaate? Albillitte baalunku manni kiˈannota falakkino sagale afiˈranno. Itikki galannohu woy taaltino sagale hooge qarramannohu diheeˈranno.

•   Qarra: Jaddonna finqille

   Qullaawu Maxaafi yaannore: “Mannu annu annunkunni kaasiˈrino balasenna woyinete caali hunda, harshammi yite fooliishshidhanno; masisannonsari diheeˈranno.”—Mikiyaasi 4:4.

   Hatto yaa mayyaate? Albillitte bushu manni heeˈrannokkihuranna “keeraano baatto ragidhanno” daafira, mannu baalunku waajjikkinni teese heeˈranno.—Faarso 37:10, 29.

•   Qarra: Ola

   Qullaawu Maxaafi yaannore: “Gashshootu gashshootu aana ola dikayisanno; hakkunni gedensaanni olaho qixxaawannohu diheeˈranno.”—Isayaasi 2:4.

   Hatto yaa mayyaate? Albillitte baattote aana woˈmankawa keeru woˈmanno. (Faarso 72:7) Baxanno manna olu sheenna dadillannohu woy ola xooqe qaesinni daramannohu diheeˈranno.

•   Qarra: Dhibbanna xisso

   Qullaawu Maxaafi yaannore: “Tsiyooni heeˈranno manni giddo, ‘Dhiwamoommo’ yaannoha dianfanni.”—Isayaasi 33:24.

   Hatto yaa mayyaate? Albillitte bisu xeˈne noosiha woy dhiwamanno mancho dianfanni. (Isayaasi 35:5, 6) Isinni Qullaawu Maxaafi “reyo [nafa] kunni kaˈa diheedhanno” yaanno.—Yohaannisi Ajuuja 21:4.

•   Qarra: Qarqaru daafama

   Qullaawu Maxaafi yaannore: “Molo baatto hagiidhitanno; halalli baattorano daraaro fultanno.”—Isayaasi 35:1.

   Hatto yaa mayyaate? Maganu hunda hedino garinni, uulla gudisante mannu heeˈranno gannate ikkitanno.—Kalaqama 2:15; Isayaasi 45:18.

 Miteekkite ati hatto yite hedattoha ikkara dandaanno. Ikkirono, Qullaawu Maxaafi albillittete yanna daafira kulannore ledde xiinxallatto gede jawaachinsheemmohe. Mayira? Qullaawu Maxaafi kulanno hexxo mannu coyiˈranno hexxonna himaniwiinni baxxitinote. Qullaawu Maxaafi giddo noo hexxo uyinohu Maganoho. Isi uyino hexxo addaxxa dandiineemmohu mayiraatiro hanni laˈno:

•   Maganu ammanaminoho. Qullaawu Maxaafi, Maganu “kapha” dandaannokkita kulanno. (Tiito 1:2) Qoleno, albillittete yanna daafira kula dandaannohu Magano callaho. (Isayaasi 46:10) Qullaawu Maxaafi, Maganu coyiˈrinori woˈmikkinni gatannokkita leellishannoha batinye lawishsha kulanno. Ledde afate, Qullaawu Maxaafi Halaale Ikkinota Mayinni Anfeemmo? yitanno viidiyo lai.

•   Maganoho qarranke tiranno wolqa noosi. Qullaawu Maxaafi Maganoho “hasiˈrinore assanno” wolqa noosita kulanno. (Faarso 135:5, 6) Wole yaattonni, Maganu uyino hexxo wonshannota hoolasira dandaannori mitturino dino. Hakkiinni saeno, Maganu baxannonke daafira kaaˈlankera hasiˈranno.—Yohaannisi 3:16.

 Miteekkite, ‘Maganu kaaˈlankera hasiˈrannohanna wolqa noosiha ikkina, qarru togo batiˈrinohu mayiraatiyya?’ yite hedattoha ikkara dandaanno. Tenne xaˈmora dawaro afiˈrate, Maganu Qarru Heeˈrara Fajjinohu Mayiraati? yitanno viidiyo lai.

 Maganu uyinonke hexxo wonshannohu Mangistesi yaano gordoho noo gashshootisi widoonniiti. Maganu Yesuusa Mangistesira Gashshaancho asse shoomino; qoleno baattonna aanase heeˈranno manna towatanno gede roorre uyinosi. Yesuusi uullate aana noo waro, dhiwantinore hursino, hudidhinore itisino, bubbe hajajino, wole agurina reyitinore nafa kayisino. (Maarqoosi 4:39; 6:41-44; Luqaasi 4:40; Yohaannisi 11:43, 44) Konni garinni, Maganu Mangiste Moote ikkanno woyite maa assannoro leellishino.

 Maganu Mangiste kaaˈlitannohehu hiittoonniitiro ledde afate, Maganu Mangiste Maati? yitanno viidiyo lai.

 Muli yannara woˈmitanno! Tenne mayinni anfeemmo? Qullaawu Maxaafi, Maganu Mangiste uulla gashshitara kaˈanno woyite ikkannore balaxe kulino. (Luqaasi 21:10, 11) Qullaawu Maxaafi yiinori xa ikkanna laˈnanni heeˈnoommo.

 Ledde afate, “Maganu Mangiste Uulla Gashshitannohu Mamarooti?” yaanno birxicho nabbawi.

 Mittu Qullaawu Maxaafi borreessaanchi, Maganu Qaali giddo noo hexxo “heeshshonkera . . . addaxxinanni mokkollichi gede” ikkitinota coyiˈrino. (Ibiraawoota 6:19) Markaawete mokkollichi dambalu kaˈˈanno woyite markaawe hembeelantannokki gede assannonte gede, Qullaawu Maxaafi albillittete yanna daafira kulanno hexxono xa iillannonke qarra dandiine saˈneemmo gede kaaˈlitannonke. Hexxo wodanaaˈmineemmonna hagiirraamma ikkineemmo gede, garunni hendeemmo gede, wole agurina ordu fayyimma heedhannonke gede kaaˈlitannonke.—1 Teselonqe 5:8.