“Kiˈne rosiisaano ikka dandiitinanni.” (Ibi. 5:12) Kalqete alame giddo baalunkunni rooriidi Rosiisaanchi Yihowa ninke isi daafira wolootaho rosiinseemmo gede koyisinonke! Tini hagiirsiissannote! Maatetenna songote giddo, woy soqqansho fulle wolootaho Yihowa daafira halaale rosiisa kaajja qoossooti; qoleno ayirrado loosooti. Tennera kaaˈlannonkeri maati?

Soqqamaasinchu Phaawuloosi Ximootewoosira borreessino sokka tenne xaˈmora dawaro afiˈrate kaaˈlitannonke; togo yiino: “Mannaho nabbawate, kulatenna rosiisate jawaati.” Isi lede, “Hatto assittoro ateneenna macciishshitannohere gatisatto” yiino. (1 Xim. 4:13, 16) Yihowa mannu heeshsho gatissanno sokka duduwate qoosso uyinonke. Konni daafira, nabbawatenna rosiisate dandoonke woyyeessiˈrate sharrama hasiissannonke. Tenne biroshere qixxeessinoonnihu iseraati. Hanni tenne biroshere amado haransine laˈno.

Yihowa Bayira ‘Rosiisaanchooti.’ (Isa. 30:20) Tini biroshere nabbawatenna rosiisate dandookki woyyeessiˈratto gede kaaˈlitannoheha ikkirono, dudumbeemmo sokka Anninna manna minisira abbannohu Yihowa ikkinota deˈooti. (Yoh. 6:44) Konni daafira, qullaawa ayyaana aannohe gede ganyite huuccatto assiˈri. Maganu Qaale seekkite horoonsiˈri. Mannu ate aana ikkikkinni Yihowa aana illachishanno gede assi. Macciishshaano Yihowa lubbora baxxanno gede kaaˈlate sharrami.

Yihowa taalle nookki sokka mannaho rosiisatto gede koyisinohe. “Maganu aannohe wolqa” addaxxattoha ikkiro, qinaannoheta dihuluullammeemmo.—1 Phe. 4:11.

Ledokki loonseemmori,

Yihowa Farciˈraasinehu Aliidi Bisi