BATINYU manni Yesuusa lame jaddo loossino mannooti mereero haqqaho sunte shinoonnita kultanno xagge afino. (Mat. 27:35-38) Ikkirono mitu manni Yesuusa sunte shinihu gedensaanni, reeshsha garunni kafanne waammate giddo madaarroonnita kultannoti Qullaawu Maxaafi xagge digaraho yaanno.—Maq. 15:42-46.

Wongeellu kulannore ammanannokkihu mitu manni, reyote yoo yineenna shinoonni mancho amanyootunni waammate giddo dimadaarranni yee ammananno. Hatteentenni insa togoo manni reeshsha assinannihu wolu gari no yite heddanno. Eeriyeeli Saabari yinanni gaazeexanyi Simizisoniyani yinanni metseetera, kuni manni togo yee ammanannohu mayiraatiro kulanni togo yiino: “Haqqaho sunte shinanni manna lowo geeshsha busha ikkinohu gede assine laˈnanni; hakko daafira mite fullahaano Roomu manni togoo manna amanyootunni madaarranni gede horo difajjanno yite heddanno.” Roomu manni, reyote yoo yinoonniha jaddo loosino manna shollinshara hasiˈranno. Hakko daafira togoo manni reeshsha moyichu itanno gede hakko haqqu aana agurtanno. Hakkuyi gedensaanni gattino miqqa wolu manni miqqa noo bayicho massine tunganni.

Ikkirono Arkiyolojete xiinxallo ajayi ajeenna konni garinni shinoonniha mito Yihudu manna madaarroonnihu baxxino garinni ikkinota leellishshino. Umi xibbi diro shinoonnihunnita mittu manchi miqqa 1968 anfoonni. Tenne miqqa anfoonnihu Yerusaalamete mule mitte Yihudu maate waamma giddooti. Tenne miqqa anfoonnihu miqqa worranni saaxine giddooti. Hattee miqqa giddo gindu miqichi no. Kuni miqichi 11.5 saanti meetire ikkitanno misimaarenni haqqaho qolle ganneenna no. Eeriyeeli Saabari togo yiino: “Yohokanaani yinanni manchihu gindu miqichi Yesuusa waammate giddo madaarroonnita kultannoti Wongeellu xagge halaale ikkase leellishshanno tajeeti. Yohokanaanihu gindu miqichi Yesuusi waro Roomu manni haqqaho sunte shinoonni manna Yihudu budi garinni madaarranni gede fajjannota leellishanno.”

Kuni gindu miqichi Yesuusa haqqu aana suntoonnihu ma garinniitiro anfanni gede assino; ikkirono batinyu mannira tenne daafira addi addi lao noonsa. Kayinni reyote yoo yineenna shinoonniha mito jaddo loosino manna mullawa tunge agurroonniha ikkikkinni amanyootunni madaarroonnita dihuluullammeemmo. Addanko Yesuusa garunni kafanne waammate giddo madaarroonnita kultannoti Qullaawu Maxaafi xagge ammannannite. Tini taje Qullaawu Maxaafi kulannori halaale ikkasi leellishshanno.

Yihowa Yesuusa dureeyyete waammara madaarrannita balaxe masaalotenni kulino; qoleno Maganu coyiˈrinori woˈmannokki gede assa dandaannori dino.—Isa. 53:9; 55:11.