Yesuusi duduwinoti keeru sokkaati. Ikkirono isi rosaanosira mitte yannara togo yiino: “Ani baattote aanira keere abbammora dayommoha lawoonkeˈne. Ani ola ikkinnina keere abbammora didayommo. Ani labbaa beetto annu aana, meyaa beetto amate aana, beettu beetto ballote aana kayisammora dayommo.” (Mat. 10:34, 35) Yesuusi hatto yiinohu mayyaateeti?

Yesuusi maatete miilla mimmituwiinni babbada dihasiˈranno. Ikkollana isi rosiisanno rosi mite maate mereero babbadooshshu heeˈranno gede assannota afino. Hakko daafira Kiristoosi rosaano ikkanna cuuama hasidhannori doorshinsa abbanno guma huwata hasiissannonsa. Insa Yihowa Farciˈraasine ikkitinokki galtensa woy wolu mininsa manni giwannonsa woyite Kiristoosi rosiisino rosira ammanante heeˈra qarra ikkitansara dandiitanno.

Qullaawu Maxaafi Kiristaanu mannu baalunku ledo ‘keere heeˈranno’ gede jawaachishanno. (Rom. 12:18) Kayinni Yesuusi rosiisinori mite maatera ‘olu’ gede ikkara dandaanno. Mittu maatete miili Yesuusi rosiisino roso harunsanna wolootu gibburo togoori kalaqamara dandaanno. Togoo woyite halaale rosanni noohura minisi manni “diina” ikkannosi.—Mat. 10:36.

Ammaˈnotenni bebbeehantino maate giddo heedhannori Yesuusi rosaanora, mito woyite Yihowanna Yesuusa woy fiixansa hagiirsiissannoro doodhitanno gede assannori tuncu yaannonsa. Lawishshaho Yihowa Farciˈraasine ikkinokki fiixinsa Magano hagiirsiissannokki ayyaanna ayirrissanno gede xixxiiwansara dandaanno. Togoo woyite insa aye hagiirsiissannoro doodha hasiissannonsa. Yesuusi togo yiino: “Anenni roorse annasinna amasi baxannohu aneha ikka didandaanno.” (Mat. 10:37) Hige Yesuusi isi rosaano ikka hasidhannori annansanna amansa albi geeshsha baxa agura hasiissannonsa yaanni nooha diˈˈikkino. Hatteentenni isi heeshshonsa giddo balaxisiisa hasiissannonsa coye rosiisanni noonsa. Yihowa Farciˈraasine ikkitinokkiri maatenke miilla Yihowa magansiˈrate assineemmore gibburono insa baxa diagurreemmo. Kayinni baalunkunni roorsine Magano baxa hasiissannonketa dideˈneemmo.

Maatenke gibbannonke woyite lowo geeshsha xissiisiˈneemmoti dihuluullissannote. Ikkirono rosaanosi Yesuusi yiinore qaaga hasiissannonsa. Isi togo yiino: “Umisi masiqala duqqe hoodeˈya daannokkihu aneha ikka didandaanno.” (Mat. 10:38) Wole yaattonni Kiristaanu maatensa gibbannonsata Kiristoosi rosaano ikkitino daafira iillannonsa qarri gede assite laˈˈa hasiissannonsa. Kayinni insa Yihowa Farciˈraasine ikkitinokkiti maatensa miilla dancha akatansa laˈe hedonsa biddi assidhannotanna Qullaawa Maxaafa xiinxallitannota hexxitanno.—1 Phe. 3:1, 2.