Ee, kaaˈlannohe. Lowo miliyoone ikkanno minaannuwinna minaamuwi Qullaawu Maxaafi amaale harunsino daafira maatensa hagiirru noota ikkitino. Tenne amaale giddo gama aante noote:

1.   Adhamaˈne higge affinota assidhe. Heeshshonke diro baala galtenke ledo heeˈrate higgete albaanni qaale ea, maatete hagiirrira qara coyeti.—Maatewoosi 19:4-6.

2.   Mimmito baxxe hattono ayirrisse. Baxillenna ayirrinye leellisha dandiineemmo doogga giddo mitte, galtenke ninkera assitankera hasiˈneemmore ninkeno isera assate.—Maatewoosi 7:12; Efesooni Sokka 5:25, 33.

3.   Kaajjadonna madiissanno qaale coyidhinoonte. Galteˈne xissiisannore coyidhuro woy assituro nafa, shaqqillunni coyidhe. (Efesooni Sokka 4:31, 32) Qullaawu Maxaafi Lawishsha 15:1 aana togo yaanno: “Shaqqadu arrawi hanqo qiissanno; kaajjadu qaali kayinni hanqo kakkayisanno.”

4.   Mimmitoho ammanamme. Baxille woy siimu xaadooshshi hasatto leellisha hasiissannoˈnehu galteˈnera callaati. (Maatewoosi 5:28) Qullaawu Maxaafi togo yaanno: “Adhanna adhama baalunku ayirrisannota ikkito; ayiddaanninna ayiddaama mimmitoho ammananto.”—Ibiraawoota 13:4.

5.   Oosoˈne baxillunni qajeelse. Oosoˈne baxxu gede ikkitara facci assitine agurtinoonte; gawajjannonsa garinni kaajjillunnino qorichishshinoonte.—Lawishsha 29:15; Qolasiyaasi Sokka 3:21.