Mannu Yesuusi Kiristoosi roso irkiˈre “Kiristaanaho” yinannita addi addi ammaˈno xintiˈrino. Ikkollana, Qullaawu Maxaafi kulanno garinni addunniti Kiristaanu ammaˈno mitte callate. Togo yineemmo gede assannonkeha hanni sase coye calla laˈno.

1.   Yesuusi “halaale” rosiisannota coyiˈrino; hundi Kiristaanino ammaˈnonsa “halaalu doogo” yitanno. (Yohaannisi 8:32; 2 Pheexiroosi 2:2; 2 Yohaannisi 4; 3 Yohaannisi 3) Tenne yaattonni huwata dandiineemmonte gede, Yesuusi rosiwiinni baxxino roso rosiissannori addu Kiristinna harunsitannore diˈˈikkitino.

2.   Qullaawu Maxaafi Kiristaanu “mittu wodanirenna mitte hedore” ikka hasiissannonsata kulanno. (1 Qorontoosi 1:10) Ikkollana, ninke Kiristaanaho yaannohu batinyu manni wole agurreenna Kiristaanu ayeooti yitanno hajora nafa sumuu diyaanno. Insa insaneewa sumuu yitannokkiri kuri baalunku hiitto ikkite adda ikkitanno?—1 Pheexiroosi 2:21.

3.   Yesuusi, batinyu manni ninke Kiristaanaho yaanni heeˈrenni isi hajajo wonshannokkitanna isino insa diegennoommoˈne yaannonsata balaxe masaalino. (Maatewoosi 7:21-23; Luqaasi 6:46) Mito manna dogginori uminsa qiniitira yite halaalu magansiˈra booreessitannore ammaˈnote murrootaati. (Maatewoosi 7:15) Mitu manni kayinni, Qullaawu Maxaafi halaale ikkikkinni insa macciishsha baxxannore kulannonsa daafira kaphu Kiristinna harunsa doodhanno.—2 Ximootewoosi 4:3, 4.

 Yesuusi qamadetenna boddoonu lawishsha coyiˈri yannara, addunnite Kiristaanu ammaˈno giddo lowo finqille (kaadaasine) fultannota masaalino. (Maatewoosi 13:24-30, 36-43) Lowo diro, addu Kiristaananna kaphu Kiristaana bada qarra ikkitanno. Yesuusi masaalinonte gede, soqqamaasinesi reyitu gedensaanni kaadaasine fultino. (Soqqamaasinete Looso 20:29, 30) Kaadaasine rosiissanno rosi addi addiha ikkara dandaanno; ikkirono, suˈmu Kiristinna harunsitannoti babbaxxitino ammaˈno baalanti ‘halaaluwiinni faffinote.’—2 Ximootewoosi 2:18.

 Qoleno Yesuusi addu Kiristaaninna kaphu Kiristaani baxxe leellanno yanna daggannota masaalino. Konni heeˈnoommohu “alamete goofimarchira” tini masaalo woˈmitino.—Maatewoosi 13:30, 39.