Maganu Maa Assammora Hasiˈranno?
Qullaawu Maxaafi mayyaanno?
Maganu seekkine anfammosira, isiwa shiqqi yinammora, hakkiinni woˈmu wodaninkenni banxammosiranna soqqammammosira hasiˈranno. (Maatewoosi 22:37, 38; Yaiqoobi 4:8) Yesuusi heeˈrino heeshshonna rosiisino rosi, Maganu fajjo wonshatto gara afate kaaˈlannohe. (Yohaannisi 7:16, 17) Yesuusi Maganu fajjo maatiro rosiisinoha calla ikkikkinni, heeshshosinni Maganu fajjo wonshino. Isinni Yesuusi dayinohu ‘soyinosihu hedinore wonshate ikkinnina, umisi hedo wonshate ikkinokkita’ coyiˈrino.—Yohaannisi 6:38.
Maganu hedinore woy fajjosi ajuujatenni, qoonqotenni, woy wole baxxitino doogonni kulannoe?
Deeˈni; Maganu mannu oosora kulara hedino sokka Qullaawu Maxaafi giddo no. Qullaawu Maxaafi, ‘guuta ikkatto gedenna dancha coye assate qixxaawoottoha ikkatto gede’ kaaˈlannohere kulannohe. (2 Ximootewoosi 3:16, 17) Maganu, isi fajjo maatiro afate Qullaawa Maxaafanna wodanchate dandookki horoonsiˈrattora hasiˈranno.—Roomu Sokka 12:1, 2; Efesooni Sokka 5:17.
Kayi Maganu fajjo wonshe afeemmo?
Ee, wonshite afatto. Mayira yiniro, Qullaawu Maxaafi, ‘Maganu hajajo kaajjado diˈˈikkitino’ yaanno. (1 Yohaannisi 5:3) Hatto yaa Maganoho hajajama woˈmanka woyite shotate yaa diˈˈikkitino. Ikkirono, hajajante afiˈratto atooti hajajamate sharramatto sharronni lowo geeshsha rooranno. Yesuusi umisi togo yiino: “Maassantinori Maganu qaale macciishshite hajajantannoreeti.”—Luqaasi 11:28.