Nefiliimootu Ayeooti?
Qullaawu Maxaafi mayyaanno?
Nefiliimi yinanniri, Nohi waro maala uddidhino sokkaasine mannu meento adhiteenna ilantino diqaallaati; tini jigeeyyenna mannaho aleenni higgino ooso kaajjaddahonna bushuulleho. a
Qullaawu Maxaafi, “Maganu ooso mannunnihu seennu xumuulle ikkinota laˈu” yaanno. (Kalaqama 6:2) Kowiicho “Maganu ooso” yiniri, Maganoho hajajama gibbe gordoho ‘heedhanno dargansa agurte’ dirritino sokkaasineeti; insa mannu biso uddidhe, meentu giddonni “baxxinore doodhite [adhitino].”—Yihuda 6; Kalaqama 6:2.
Kalaqamunni rosaminokkihu konni xaadooshshinni ilantino diqaalla, shaaˈˈa ooso diˈˈikkitino. (Kalaqama 6:4) Nefiliimootu mannu waajjanno jigeeyyeeti; mararro nookkiti tini ilama baattote aana bunshe batidhanno gede assitino. (Kalaqama 6:13) Qullaawu Maxaafi insa daafira kulanni, “Kuri, albi yannara suˈminsa egennaminore wolqaataamma ikkitu” yaanno. (Kalaqama 6:4) Insa bunshenna waajjishshanno gari lowo diri geeshsha hambannikkiha ikkino.—Kalaqama 6:5; Kiiro 13:33. b
Nefiliimootu daafira mannu hedannota soˈrote hedo
Soˈrote hedo: Nefiliimootu xaano uullate aana no.
Halaale: Yihowa bunshe batidhinota hattenne hundi alame Baote Wayinni hunino. Nefiliimootuno bushu mannino baalunku mitteenni gooffino. Nohinna maatesi kayinni Yihowa hagiirsiissino daafira, hatte yannara baotenni gattinori insa callaati.—Kalaqama 6:9; 7:12, 13, 23; 2 Pheexiroosi 2:5.
Soˈrote hedo: Nefiliimootu annuwa mannu oosooti.
Halaale: Insa annuwa “Maganu ooso” ikkitinota kulloonni. (Kalaqama 6:2) Qullaawu Maxaafi sokkaasine kulate konne suˈma horoonsiˈranno. (Iyyoobi 1:6; 2:1; 38:7) Hakkawaro sokkaasine mannu biso uddiˈra dandiitanno. (Kalaqama 19:1-5; Iyyaasu 5:13-15) Soqqamaasinchu Pheexiroosi, ‘biˈre Nohi markaawe boci waro Maganu cince agare heeˈreennanni, hajajama gibbino’ ayyaanna noota coyiˈrino. (1 Pheexiroosi 3:19, 20) Qullaawu Maxaafi borreessaanchi Yihudano hattenne ikkito kulanni, mite sokkaasine “heedhanno darga calla ikkikkinni uyinoonninsa roorre agurtino” yiino.—Yihuda 6.
Soˈrote hedo: Nefiliimootu gordunni tungoonni sokkaasineeti.
Halaale: Kalaqama 6:4 qooxeessira noo hedonni huwata dandiineemmonte gede, Nefiliimootu sokkaasine ikkitukkinni mannu biso uddidhino sokkaasine meentu ledo siimu xaadooshshe assiteenna ilantino diqaallaati. Sokkaasine meentu giddonni “baxxinore doodhite adhitu” gedensaanni, Yihowa 120 diri giddo hattenne busha alame hunannota coyiˈrino. (Kalaqama 6:1-3) Qoleno “hatte yannara” maala uddidhino sokkaasine ‘mannu seenne adhitinotanna’ “albi yannara suˈminsa egennaminore wolqaataamma” ooso yaano Nefiliimoota iltinota Qullaawu Maxaafi xagge kultanno.
a “Nefiliimi” yine tirroonnihu Ibiraawootu qaali “Kaachishshe Uulla Tuggannore” yitanno tiro afiˈrinoha ikkikki digatino. Wilsenisi Oldi Testamenti Wordi Isteediisi yaanno garinni, kuni qaali “manna gantannorenna mulqidhannore, hattono manna uulla tuggannore” kulannoho.
b Kiiro 13:33 aana kulloonniti Israeelete qotaasine laˈino manni lowo xibbi diri albaanni reyitinore Nefiliimoota qaagganno gede assinonsa.—Kalaqama 7:21-23.
Kurino Lai
QULLAAWU MAXAAFI XAˈMONNA DAWARO
Agaaninte Isi Addanka No?
Agaaninte maati? Insa mamiinni dagginoreeti?
NINKE DAAFIRA
Hasaawinseemmohe Gede Kuˈli
Qullaawu Maxaafi xaˈmo hasaawa, woy Yihowa Farciˈraasine daafira ledde afa dandaatto.