Deeˈni; Maganu Mangiste Kiristaanu wodani giddo noore diˈˈikkitino. a Qullaawu Maxaafi, Maganu Mangiste ‘Gordu Gashshoote’ yaanno; tini yaatto Maganu Mangiste mamiicho nooro badde kultanno. (Maatewoosi 4:17) Hanni Qullaawu Maxaafi, Maganu Mangiste iima heeˈre gashshannoha umosi dandiino gashshoote ikkitinota kulanno gara laˈno.

•   Maganu Mangiste, gashshaasine, qansootanna seera afidhinote; qoleno tini Mangiste Maganu fajjo iimanna uulla woˈmitanno gede assitanno roorre afidhino.—Maatewoosi 6:10; Yohaannisi Ajuuja 5:10.

•   Maganu gashshooti woy Mangiste ‘addi addi gobbara heeˈrannoha, addi addi afiinni coyiˈrannoha’ uullate aana heeˈranno manna baalanka gashshitanno. (Daanieeli 7:13, 14) Tenne Mangiste gashshaano doorannohu manna ikkikkinni Maganoho.—Faarso 2:4-6; Isayaasi 9:7.

•   Yesuusi ammanantino soqqamaasinesi isi ledo gordu Mangistera “ayirradu barcimira” ofoltannota kulinonsa.—Luqaasi 22:28, 30.

•   Maganu Mangiste diinnase huntanno.—Faarso 2:1, 2, 8, 9; 110:1, 2; 1 Qorontoosi 15:25, 26.

 Qullaawu Maxaafi gordu Gashshooti mannu wodani giddo nootanna mannu wodani widoonni gashshannota dikulanno. Ikkollana, Qullaawu Maxaafi ‘Maganu Gashshooti qaali’ woy ‘Maganu Gashshootihu Danchu Duduwi’ wodaninke giddo heeˈrara dandaannotanna wodaninke giddo heeˈranno gede assiˈra hasiissannonketa kulanno.—Maatewoosi 13:19; 24:14.

Yesuusi, ‘Maganu Gashshooti mereeroˈne no’ yaasi mayyaate?

 Mite Qullaawu Maxaafi tiro Luqaasi 17:21 noo hedo tirtino gari, mitu mannira Maganu Mangiste noo bayichi gurchaawanno gede assino. Lawishshaho, Kingi Jeemsi Verzhini yinanni tiro “Maganu mangiste giddoˈne no” yite tirtino. Kuni qummeeshshi yaannore garunni huwatate, qooxeessaho noo hedo laˈˈa hasiissannonke.

 Yesuusi tenne hedo coyiˈranni noohu Farisootaho yinanniri ammaˈnote murrootiraati; insa Yesuusa gibbannoreeti, hattono iso shinanni gede gano gantanni nooreeti. (Maatewoosi 12:14; Luqaasi 17:20) Ikkina Maganu Mangiste konni mokkookku manni wodani giddo heedhara dandiitanno? Yesuusi insa “Giddoˈne . . . awaawurshunna bunshe woˈmitino” yiinonsa.—Maatewoosi 23:27, 28.

 Mite Qullaawu Maxaafi tiro Yesuusi Luqaasi 17:21 coyiˈrino hedo, “Maganu Gashshooti ledoˈne no” yite garunni tirtino. (Haawiissine borreessinoommori ninkeeti; Kontemporarii Ingilishi Verzhini) “Maganu Gashshooti kune mereeroˈne no.” (Sidaamu Afiinni Qixxeessinoonniha Qullaawa Maxaafa) Gordu Gashshooti Farisootu “ledo” woy “mereero” no yinoonnihu, konni Gashshootira Moote ikkanno gede Maganu shoominohu Yesuusi mereeronsa noo daafiraati.—Luqaasi 1:32, 33.