Sayinsetenni anfoonni coyibba naandeemmo; qoleno taje afiˈrinoha sayinse kalaqqino coye ammanneemmo.

 “Sayinsete yaa kalaqamu coyibba afidhino ortenna akata xiinxallatenna kalaqamu daafira afiˈneemmo egennooti.” (Koliinsi Kobiildi Adivaansidi Lerners Inglishi Dikishinerii) Qullaawu Maxaafi sayinsete maxaafa ikka hoogirono, mannu kalaqama xiinxallanno gedenna sayinse kalaqqino coye horoonsiˈranno gede jawaachishanno. Hanni mito lawishsha laˈno:

•   Xafarete xiinxallo: “Iimira gordo higgine laˈe! Laˈinanni beeddahe kalaqinohu ayeti? Olantote gaadaanni gede albaanni haˈrannonsa; kiironsano egennino; mitte mittenta suˈmisenni woshshanno.”—Isayaasi 40:26.

•   Bayoloje: “Selemooni Libaanoosi daguwinni kayise, kinchu qarra muˈrino ishinchi baalu daafirano coyiˈrino. Qoleno saadate, ceate, god[o]wunni haˈranno kalaqaminna qulxuˈmu daafirano rosiisino.”—1 Mootoolla 4:33.

•   Xagga: “Dhiwantinorira ikkinnina fayyaaleeyyete xagisannohu dihasiisannonsa.”—Luqaasi 5:31.

•   Ayyarete gade xiinxallo: “Kaadenna bullaame kaade duunoommowa, eˈe egennoottoni? . . . Soojjaati bubbe kaˈanno dargira marte egennoottoni?”—Iyyoobi 38:22-24.

 Borronke aana mannu sayinse ayirrisanno gede jawaachishshannoti kalaqamunna sayinse kalaqqino coyibba daafira kultanno birxichuwa fultanno. Yihowa Farciˈraasine oosonsa qooxeessinsara noore roore huwattanno gede roso rossara jawaachishshanno. Yihowa Farciˈraasine giddo haammatu loossanno loosi sayinsete ledo xaadooshshe afiˈrinoho; lawishshaho bayolojetenna kemistirete fullahaano, shallagote egennaamma, hattono fiiziksete fullahaano ikkite loossannori no.

 Sayinse manchi beetti xaˈmo baalantera dawaro qoltanno yine diammanneemmo. a Lawishshaho, baatto xiinxallitanno sayintistooti baatto mayi mayinni kalaqantinoro qonqolchite xiinxallitanno; qoleno bayolojete fullahaano mannu bisi loosanno gara xiinxallitanno. Ikkina baatto heeshsho noo kalaqamira togo maltinota ikkite kalaqantinohu mayiraati? Qoleno bisu kifilla togo sumuu yite loossannohu hiittoonniiti?

 Tenne xaˈmuwara duushshitanno dawaro qolannohu Qullaawa Maxaafa calla ikkinota huwantoommo. (Faarso 139:13-16; Isayaasi 45:18) Hakko daafira, dancha roso rosate sayinseno Qullaawa Maxaafano huwata hasiissannota ammanneemmo.

 Mito woyite sayinse yitannori Qullaawu Maxaafi rosi ledo sumuu yaannokkiha lawara dandaanno. Ikkollana, mitootu hatto yite heddannohu Qullaawu Maxaafi yaannore seekkite huwattinokki daafiraati. Lawishshaho, Qullaawu Maxaafi baatto kalaqantinohu 24 saate afiˈrinohu lewu barri giddooti diyaanno.—Kalaqama 1:1; 2:4.

 Batinyu mannira sayinsete hedo labbannoti mite hedo gari taje afidhinota diˈˈikkitino; qoleno mitootu ayirraddu sayintistooti togoo hedo diammantanno. Lawishshaho, kalaqamu hedate dandoo noosi Kalaqaanchi noota leellishshanno taje afiˈrino daafira, ninkeno batinyu bayolojetenna kemistirete egennaamminte gede, heeshshote kalaqami suutu soorronni gale hosanni soorramanni dayinoho yine diammanneemmo.