Madiyaninna Maarsela Kolombiyaho, Medeliini katamira qawaaxxote heeshsho heeˈrannoreeti. Madiyani adhanno damoozi lowoha ikkino daafira, insa injiino minira heeˈranno. Ikkollana, Yihowa Farciˈraasine ikkinori kuri minaanninna minaama heeshshonsa giddo maa balaxisiisa hasiissannonsaro hedanno gede assannonsari tuncu yiinsa. Insa togo yiino: “2006nni, ‘Illeˈne Xunsite Laˈo’ yaannoha baxxino gambooshshe beeqqinummo. Shiqqinoti batinye lallawo, Maganoho roore woˈma giddonni soqqamate heeshshonke bikkunnita assiˈra hasiissannonketa duudhe amaaltinonke.” Ledeno togo yiino: “Gambooshshe gunde minira haˈnanni heeˈne, ninke heeshsho tennenni lowo geeshsha baxxitinota huwantummo. Laˈnummore baala hidhate rosichi noonke; qoleno lowo asali giddora eˈnoommo.”

 Madiyaninna Maarsela konni gambooshshinni rosinori heeshshonsa biddi assiˈra hasiissannonsata huwachishinonsa daafira, bikku heeshsho heeˈrate sharrama hanafi. Insa togo yiino: “Woxe kaˈnummo gede fushsha agurrummo. Shiimu minira heeˈrate hingummo, hattono makeenanke hirre motore hidhinummo.” Qoleno, laire baala hidha yorannokki gede uduunne hirranni bayicho haˈra aguri. Roore yannansa olliinsa mannira Qullaawu Maxaafire kulanni sayisa hanafi. Hakkiinni saeno lamunku, baxxitino suwisaano ikkite Yihowara diinaggaabbe soqqantanno jaallansawa albinni roore aanannore ikki. a

 Mulenni, Madiyaninna Maarsela Yihowara roore soqqama hasiˈrino daafira kaaˈlo hasiissannoti mitte songo noowa gaxare haˈrate kai. Hakka haˈrate, Madiyani looso agurino. Loosu sooreettera, isi konne kaajja looso mayira aguranni nooro horo leella giwise. Hakko daafira Madiyani mayira aguranni nooro xawisate togo yiise: “Ati afiˈratta woxi lowoho; kayi hagiirraame ikkootta?” Iseno, tira dandiitinokkihu lowo qarri noose daafira hagiirraame ikkitinokkita maaxxukki kultusi. Hakkiinni Madiyani togo yiise: “Hakko daafira qaru coyi afiˈneemmo woxe diˈˈikkino. Addinta hagiidhineemmo gede assannonkere bande afa hasiissannonke. Anenna minaamaˈya hagiirsiisannonkeri mannaho Maganu daafira rosiisate; hakko daafira konne looso roorsine loonse lende hagiirraamma ikka hasiˈneemmo.”

 Madiyaninna Maarsela ayyaanaamittete mixonsa wonshiˈrino daafira, xa harshammi yee heeˈranni no; qoleno addu hagiirre afiˈrino. Insa saiha 13 diro, Kolombiyaho sabbakkannori roore hasiissannowa noo songuwara soqqamanni keeshshino. Xa lamunku baxxitino suwisaano ikke soqqamate qoosso afiˈre hagiidhanni no.