Le Manatu o le Tusi Paia

O le ā le Silafaga a le Atua i Mea e Faaaogā e Tapuaʻia ai o Ia?

E tele mea e faaaogā i le faia o tatalo e lotu, e iai le lotu Puta, Isalama, Iutaia, Katoliko Roma, ma le Eastern Orthodoxy. O lea, e faitau miliona tagata i le tele o atunuu e talitonu e aogā nei mea e faalatalata atu ai i le Atua, ma fiafia mai ai o ia, pe maua ai foʻi lana faamanuiaga. Ae o le ā le aʻoaʻoga a le Tusi Paia e tusa ma ia mea?

UA LOA ona faaaogā e tagata mea e iai koluse ma tupua i a latou tapuaʻiga. O se faataʻitaʻiga na taʻua e le lomifefiloi Katoliko, e faapea i le mea sa iai Nineva anamua, na eli aʻe ai e tagata suʻesuʻe i toega anamua “faatagata o tamaʻitaʻi e toʻalua e fai apaʻau . . . o loo uu i o la lima tauagavale se teu po o se rosalio.”

O le ā le aogā o rosalio? Ua toe fai mai le lomifefiloi: “Afai e manaʻomia ona fai soo se tatalo, e faigofie pe a faaaogā se auala e manatua gofie ai le tele o tatalo e tatau ona fai nai lo le tau faitau i tamatamaʻilima.”

O lea, ua faaaogā ai uili e fai ai tatalo, ina ia faafaigofie ai lea tulaga. E tusa le taamilosaga e tasi a le uili, ma le tatalo e tasi, ma o nei uili, e vili e tagata, pe taavili i le matagi po o le vai, pe ola foʻi i le eletise. Ua masani ona tuu ai i totonu pepa ua iai upu po o fuaiupu paia. Ae e lelei ona mātau mai, pe faamata o le ā le finagalo o le Atua e tusa ma nei mea.

“Aua Le Faia Soo Au Upu Masani”

E faitau miliona tagata, e iai ma ē e lē o ni Kerisiano e faapea mai o Iesu Keriso, o le perofeta o ia a le Atua, ma ua ia faailoa mai le finagalo o Lē na faia i tatou e faatatau i tatalo e taʻu soo faaupuga masani, e faapea: “Pe a e tatalo, aua le faia soo au upu masani e pei o tagata o nuu ese, auā ua latou manatu o le a faafofogaina i latou i le tele o upu.” *—Mataio 6:7.

O lona uiga la, afai e lē fiafia le Atua i lo tatou tatalo  pea ma ‘faia soo o upu masani,’ pe faamata la e fiafia o ia pe a tatou faaaogā isi mea e auala atu ai a tatou tatalo iā te ia? E aunoa ma se faamatalaga i le Tusi Paia e faapea mai na faaaogā e se auauna faatuatua a le Atua moni se rosalio, po o uili tatalo, po o isi lava mea e tapuaʻi ai. Ma o le a tatou malamalama i le māfuaaga na latou lē faia ai faapea, pe a tatou iloa tonu le uiga o tatalo ma le autū e ala ai ona fai.

Tatalo e Fiafia i ai le Atua

I le tatalo faataʻitaʻi a Iesu, na ia taʻu le Atua, o “Lo matou [tatou] Tamā.” Ioe, o Lē na faia i tatou, e lē mamao o ia ma i tatou pe tau faamalie i upu po o faiga faapitoa e faifai pea. Ae o ia o le Tamā alofa, ma o lona finagalo ia tatou iloa o ia ma alolofa iā te ia. Na fetalai mai Iesu: “Ou te alofa i le Tamā.” (Ioane 14:31) Na faapea mai se perofeta i Isaraelu anamua: “Ieova e, o oe lava lo matou Tamā.”—Isaia 64:8.

E faapefea ona tatou faalatalata atu iā Ieova lo tatou Tamā faalelagi? (Iakopo 4:8) E ala lea i le talanoa ma ia, e pei lava foʻi o mafutaga ma isi tagata. O loo talanoa mai le Atua iā i tatou e ala i lana Afioga le Tusi Paia, ma faailoa mai ai ana galuega, o ona uiga, faapea ma lona finagalo mo i tatou. (2 Timoteo 3:16) Ae e tatou te talanoa i le Atua e ala i le tatalo atu i le āva ma le migao. Ma e ao ona tatou tatalo atu ma le agaga faamaoni ma ia māfana, ae lē tau ina fai e pei o se mea ua masani ai.

O se faataʻitaʻiga: Afai o se aiga e fealofani ma māfana, faamata o le ā le auala e talanoa ai fanau ma o latou mātua? Pe faamata e latou te faia pea tala masani, ma faaaogā se auala e faitau ai a latou faaupuga? E leai! E latou te taʻu saʻo atu mea o i o latou loto, ma faia i se auala faaaloalo.

E faapena le auala e ao ona tatalo atu ai i le Atua. O le mea moni, e mafai ona tatou talanoa ma ia i so o se mataupu. Ua faapea mai le Filipi 4:6, 7: “Aua neʻi popole i se mea, ae ia faailoa atu o outou manaʻoga i mea uma lava i le Atua, i le tatalo ma le faatoga, atoa ma le faafetai; ona leoleoina ai lea o o outou loto ma mafaufau i le filemu mai le Atua.” E moni, a iai lava se mea o tatou popole ai, o le mea lava lenā e taʻu soo iā tatou tatalo. Ae e iai le eseesega ma le taʻu soo o faaupuga masani.—Mataio 7:7-11.

E tele faaaʻoaʻoga i le Tusi Paia o tatalo e fiafia i ai le Atua, e iai salamo faapea ma tatalo a Iesu. * (Salamo 17 ma le 86, upu tomua; Luka 10:21, 22; 22:40-44) O loo tusia i le Ioane mataupu e 17 se tatalo na faia e Iesu. Ia faaalu sina taimi e faitau ai. Ma mātau le auala na tatala atu ai lagona loloto o Iesu i le Atua. Ia mātau foʻi, ua iloa i ana upu lona lē manatu faapito ma le auala ua faaalia ai lona alofa loloto i ona soo. Na tatalo o ia: ‘Le Tamā paia e, ia leoleo iā i latou ona o lē ua leaga.’—Ioane 17:11, 15.

Po o iai se uiga faatauloto pe tau ina fai, i tatalo a Iesu? E leai! E lelei tele le faataʻitaʻiga ua ia faia mo i tatou! Ioe, o i latou uma e fia faalatalata i le Atua moni, e ao ona latou iloa ona uiga moni. Ma o le a latou teena ai faiga masani faalelotu e lē fiafia i ai le Atua ona ua uunaʻia i latou e lo latou alofa e ala i lo latou iloa lelei o ia. Ua fetalai mai Ieova iā i latou: “E avea aʻu ma o outou tamā, ma e fai foʻi outou ma oʻu atalii ma oʻu afafine.”—2 Korinito 6:17, 18.

[Faaopoopoga i lalo]

PO O E TAUMĀNATU EA I NISI TAIMI?

▪ E faapefea ona faatatau fautuaga a Iesu e tusa o le fai soo o upu masani, i le faaaogāina o rosalio ma uili e fai ai tatalo?—Mataio 6:7.

▪ O faapefea ona faaalia i a tatou tatalo lo tatou talitonuga e faatatau i le Atua?—Isaia 64:8.

▪ O le ā le silafaga a le Atua iā i tatou, pe a tatou teena talitonuga sesē faalotu?—2 Korinito 6:17, 18.