LE MANATU O LE TUSI PAIA
Upu Moni e Uiga i le Atua
O le ā le ituaiga tino e iai le tino o le Atua?
“O le Atua o le Agaga.”—Ioane 4:24.
LE MANATU O LE TUSI PAIA
O le Atua o le agaga. (2 Korinito 3:17) O lea, e silisili atu lona malosi nai lo o i tatou. Ua taʻua i le 1 Timoteo 1:17 o ia o “le Tupu o le vavau, o lē e soifua pea ma e lē vaaia.” Ua faapea mai foʻi le 1 Ioane 4:12: “E leai lava se tasi ua vaai i le Atua.”
Ona e silisili ese Lē na faia i tatou, e lē mafai la ona tatou iloa pe e faapeʻī ona foliga. Ua taʻua i le Isaia 40:18: “O ai tou te faatusaina i ai le Atua, po o le ā foʻi se faatusa tou te faatusa i ai o ia?” E oo lava i le lagi ofoofogia e lē mafaatusalia i Lē e ona le malosi uma lava.—Isaia 40:22, 26.
Peitaʻi, e iai isi foafoaga atamamai e mafai ona vāai ma talanoa atu i le Atua. Aiseā? Ona o i latou foʻi o ni agaga ma e nonofo i le lagi. (1 Tupu 22:21; Eperu 1:7) E tusa ai o nei foafoaga agaga ia ua taʻua o agelu, na faapea mai Iesu: ʻO loo vaavaai atu pea i latou i le lagi, i fofoga o loʻu Tamā o i le lagi.’—Mataio 18:10.
Pe e iai le Atua i mea uma?
“Ia faapea ona outou tatalo: ʻLo matou Tamā e o i le lagi.’”—Mataio 6:9.
LE MANATU O LE TUSI PAIA
E lē o aʻoaʻoina i le Tusi Paia e faapea e iai le Atua i mea uma, e pei o se malosiaga e leai ni ona faalogona. Nai lo lea, e iloa mai i upu a Iesu o loo i le Mataio 6:9 ma le 18:10, e iai moni lava le Atua, o ia o le “Tamā,” ma o lona “afioaga tumau” le lagi.—1 Tupu 8:43.
Na fetalai Iesu ina ua lata i lona maliu: “Ou te tuua foʻi le lalolagi ma ou alu atu i le Tamā.” (Ioane 16:28) Ina ua maliu o ia ma toe faatūina mai i se tino agaga, sa afio aʻe i ʻle lagi ina ia tulaʻi i luma o le Atua.’—Eperu 9:24.
Aiseā e tāua ai nei upu moni e uiga i le Atua? Ona e iai moni lava le Atua, ma e mafai ona tatou aʻoaʻoina mea e uiga iā te ia, ma mafuta vavalalata atu iā te ia. (Iakopo 4:8) O le isi māfuaaga, ona o nei upu moni e mafai ona puipuia ai i tatou mai i tapuaʻiga sesē, e pei o le tapuaʻi i tupua ma mea e leai ni ola. Ua taʻua i le 1 Ioane 5:21: “Le fanau e, ia leoleo outou mai i tupua.”
Na faapefea ona faia tagata i le faatusa o le Atua?
“Ona faia lea e le Atua o le tagata i lona faatusa, ua ia faia o ia i le faatusa o le Atua; ua ia faia i laʻua o le tane ma le fafine.”—Kenese 1:27.
LE MANATU O LE TUSI PAIA
Ua iā i tatou le tomai e faaalia atu ai uiga o le Atua e pei o le alofa, faamasinotonu, ma le atamai. Ua taʻua i le Tusi Paia: “Ia faaaʻoaʻo i le Atua e faapei o lana fanau pele, ma ia savavali i le alofa.”—Efeso 5:1, 2.
Na faia foʻi i tatou e le Atua ma tuu mai le saʻolotoga e filifili ai, ma faaalia le alofa i isi i so o se auala. (1 Korinito 13:4-7) Ua iā i tatou foʻi le tomai e faia ai mea, olioli i mea matagofie, ma vaavaai atu ma le maofa i foafoaga uma. E lē gata i lea, ua iai lo tatou faanaunauga mo mea faaleagaga, ina ia aʻoaʻo atili e uiga i Lē na faia i tatou ma lona finagalo.—Mataio 5:3.
Auala e fesoasoani ai upu moni o le Tusi Paia iā te oe. Afai e tatou te aʻoaʻoina pea e uiga i le Atua ma faaaʻoaʻo iā te ia, o le a faaauau la ona tatou ola i le auala e finagalo ai o ia. O le iʻuga, o le a tatou olioli i le olaga, maua le faamalieina moni, lotomalie ma filemu le mafaufau. (Isaia 48:17, 18) Ioe, e silafia e le Atua o le a fesoasoani ona uiga matagofie e tosina atu ai ē e loto faamaoni, ma latou ui ai i le ala i le ola e faavavau.—Ioane 6:44; 17:3.
E te Ono Fiafia Foʻi
TALIINA O FESILI FAALE-TUSI PAIA
Pe e Afio le Atua i Mea Uma?
Pe e aʻoaʻoina i le Tusi Paia e afio le Atua i so o se mea? Aiseā e te mautinoa ai e afio le Atua i se nofoaga faapitoa ae e na te silafia lelei oe?
