Pe afai e te fia iloa lelei se tasi, e fesoasoani la le aʻoaʻoina e faatatau i mea ua ia faataunuuina ma faafitauli na ia fesagaʻia. I se tulaga talitutusa, pe afai e te fia iloa lelei le Atua, e tatau ona e aʻoaʻoina mea ua ia faataunuuina. A o e faia faapea, atonu o le a faateʻia oe i le tele o mea ua ia faataunuuina i le taimi ua teʻa, lea e tatou te maua ai aogā i le taimi nei faapea foʻi le lumanaʻi.

O Lē e sili na foafoaina mea o Ieova le Atua ma “o ona uiga lē vaaia, ua vaaia lava ia talu ona foafoaina le lalolagi, ona ua mafai ona vaaia i mea na faia.” (Roma 1:20) “O Ia na faia le lalolagi i lona mana, o Lē na matuā faatumauina le laueleele i lona atamai, ma o Lē foʻi na fofola le lagi i lona faautauta.” (Ieremia 10:12) O le matagofie o le foafoaga ua faaalia ai foʻi le naunau mai o le Atua iā i tatou.

Ia mātau le auala ua faaʻoaina ai e le Atua o tatou olaga, e ala i le faia o le tagata “i le faatusa o le Atua.” (Kenese 1:27) O lona uiga, ua ia faia i tatou ina ia mafai ona faaalia ona uiga e lē mafaatusalia. Ua ia faia foʻi i tatou ma se faanaunauga i mea faaleagaga, po o le tomai e malamalama ai i lana silafaga ma mea e tāua iā te ia. Pe a tatou taumafai e ola e tusa ma nei mea, o le a tatou maua ai le fiafia moni ma se olaga faamalieina. E lē gata i lea, ua ia tuuina mai le avanoa e atiaʻe ai ni a tatou faiā ma ia.

Ua faamaonia mai e le lalolagi le alofa o le Atua iā i tatou. Na taʻua i upu a le aposetolo o Paulo, “na saunia [e le Atua] se molimau i mea lelei na ia faia, auā na ia foaʻi mai le timu mai i le lagi ma fuata o le tau, na foaʻi mai foʻi le anoanoaʻi o meaʻai ma ua tutumu ai o [tatou] loto i le olioli.” (Galuega 14:17) Ua saunia mai foʻi e Ieova mea e sili atu nai lo o mea tatou te manaʻomia e ola ai. Ua ia saunia e lē gata o le tele o mea, ae o ituaiga eseese foʻi ina ia tatou fiafia ai. O nei mea uma ua na o se faaataga o mea na fuafuaina e le Atua e faataunuuina mo i tatou.

 Na foafoaina e Ieova le lalolagi ina ia ola ai e faavavau tagata. O loo taʻua i le Tusi Paia: “Ua tuuina mai e ia le lalolagi i le fanau a tagata,” ma “na ia lē foafoaina fua ae na ia faia ina ia ʻainā.” (Salamo 115:16; Isaia 45:18) O ai o le a ʻaināina ma o le ā le umi? “E fai lava le lalolagi mo ē e amiotonu, e nonofo ai pea i latou e oo i le faavavau.”​—Salamo 37:29.

O lea, na foafoaina ai e le Atua le uluaʻi ulugalii o Atamu ma Eva, ma tuu i se lalolagi parataiso “e galueaʻiina ma tausia.” (Kenese 2:8, 15) E lua vala o le tofiga na tuuina atu e le Atua iā i laʻua: “Ia fanafanau ma ia matuā faatoʻateleina, ia tumu ai le lalolagi ma ia galueaʻiina.” (Kenese 1:28) O lea, na maua e Atamu ma Eva le faamoemoe e olioli ai i le ola e faavavau i le lalolagi. Ae pagā le faanoanoa ona sa la filifili e lē usiusitaʻi i le Atua, ma na lē iloa ai lo la faamoemoe i le avea ai ma ni “ē e amiotonu,” o ē e “fai mo i latou le lalolagi.” E ui i lea, e leʻi suia ai e la gaoioiga le fuafuaga a Ieova mo tagata ma le lalolagi. Peitaʻi, seʻi o tatou iloilo muamua se isi mea ua faia e le Atua.

Ua taʻua foʻi le Tusi Paia o le Afioga a le Atua. Aiseā ua saunia mai ai e le Atua le Tusi Paia mo i tatou? O le māfuaaga autū, ina ia tatou aʻoaʻoina e faatatau iā te ia. (Faataoto 2:1-5) E moni e lē mafai ona taliina e le Tusi Paia a tatou fesili uma e faatatau i le Atua. (Failauga 3:11) Ae o mea uma o loo i le Tusi Paia ua fesoasoani iā i tatou ina ia iloa le Atua. Ua tatou iloa le ituaiga Atua e iai o ia i le auala e na te feutagaʻi ai ma tagata. Ua tatou mātauina ituaiga tagata e na te fiafia i ai ma tagata e lē fiafia i ai. (Salamo 15:1-5) Ua tatou aʻoaʻoina lana silafaga e faatatau i tapuaʻiga, tapulaa tau amio, ma meafaitino. O loo aumaia foʻi i le Tusi Paia se ata manino o uiga o le Atua, e ala i upu ma gaoioiga a lona Alo o Iesu Keriso.​—Ioane 14:9.

O se isi māfuaaga ua saunia mai ai e le Atua lana Afioga le Tusi Paia, ina ia mafai ai ona tatou maua se fuafuaga i le olaga ma se olaga fiafia. E ala i le Tusi Paia, ua faailoa mai e Ieova le auala e tatou te maua ai se aiga fiafia, ia lotomalie, ma le auala e feagai ai ma popolega. O le a talanoaina mulimuli ane i lenei mekasini, tali o fesili tāua i le olaga o loo iai foʻi i le Tusi Paia e pei o le: Aiseā ua tele ai mafatiaga? E faapeʻī le lumanaʻi o le a iai? O loo taʻua ai foʻi mea ua uma ona faia e le Atua e faamautinoa ai le taunuu moni o lana fuafuaga.

E iai foʻi isi auala e tele ua faailoa ai o le Tusi Paia o se tusi faapitoa ma e na o le Atua e mafai ona tusia lenei tusi. E ui na tusia i le 1,600 tausaga e tane e toʻa 40, ae o loo tumau pea le feʻau autū ona o le Atua o le tusitala moni o le Tusi Paia. (2 Timoteo 3:16) E ese mai i isi tusitusiga mai anamua, na faasaoina mai ma le saʻo aʻiaʻi le Tusi Paia i le faitau afe o tausaga, e pei ona faamaonia mai e le faitau afe o manusikulipi anamua o le Tusi Paia. O se isi mea e sili atu, ua manumalo le Tusi Paia mai i taumafaiga ina ia taofia le faaliliuina, tufatufaina, ma le faitauina. I aso nei ua sili atu ona faaliliuina ma tufatufaina lenei tusi. O le iai pea o le Tusi Paia, ua faamaonia ai “o le afioga a lo tatou Atua e tumau lea e faavavau.”​—Isaia 40:8.

O se isi mea ua faia e le Atua, o lana sauniuniga faapitoa e faamautinoa ai lana fuafuaga mo i tatou. E pei ona taʻua muamua, e finagalo le Atua ina ia ola tagata e faavavau i le lalolagi. Peitaʻi ina ua filifili Atamu e lē usiusitaʻi i le Atua ma agasala ai, na lē iloa ai le faamoemoe o le ola e faavavau e lē gata mo ia lava ae faapea lana fanau. “Ona o le tagata e toʻatasi, o le oti foʻi ona o le agasala, ona oo mai ai lea o le oti i tagata uma auā ua agasala uma lava.”(Roma 5:12) Ona o le agasala a Atamu e ala i le lē usiusitaʻi i le Atua, na foliga mai ai e lē taunuu le finagalo o le Atua mo le lalolagi. O le ā le auala na gaoioi ai Ieova?

Na faaauau pea ona ōgatusa gaoioiga a Ieova ma ona uiga. Na ia faasalaina ma le tonu Atamu ma Eva ona o la gaoioiga, ae na ia saunia mai ma le alofa se faamoemoe mo a la fanau. O lona atamai na faamautinoa ai e Ieova le auala e feagai ai ma le faafitauli ma saunia mai loa le auala e faaleleia ai. (Kenese 3:15) O le auala e faasaoina mai ai i le  agasala ma le oti, o le a saunia e ala i le Alo o le Atua o Iesu Keriso. O ā mea na aofia ai i lenā auala?

Ina ia faasaoina tagata mai i āuga o le fouvalega a Atamu, na auina mai ai e Ieova i le lalolagi Iesu ina ia aʻoaʻo tagata i le ala i le ola ma ia “foaʻi atu lona ola e fai ma togiola e sui aʻi tagata e toʻatele.” * (Mataio 20:28; Ioane 14:6) Na mafai ona saunia mai e Iesu le togiola ona o ia o se tagata lelei atoatoa e pei o Atamu. Ae i le lē pei o Atamu, na tumau ona usiusitaʻi atoatoa Iesu e oo lava i le oti. Talu ai e leʻi tatau ona oti Iesu, na toe faatūina ai o ia e Ieova i le ola i le lagi. Ua mafai nei ona faia e Iesu le mea na lē taulau ai Atamu, o le avatu lea i tagata usiusitaʻi o le faamoemoe o le ola e faavavau. “E pei ona agasala le toʻatele ona o le lē usiusitaʻi o le tagata e toʻatasi, e faapea foʻi ona taʻuamiotonuina le toʻatele ona o le usiusitaʻi o le tagata e toʻatasi.” (Roma 5:19) E ala i le taulaga togiola a Iesu, o le a mafai ona faataunuuina le folafolaga a le Atua ina ia ola e faavavau tagata i le lalolagi.

Ua tatou aʻoaʻoina le tele o mea e faatatau iā Ieova, i le auala na ia feagai ai ma luʻi ina ua lē usiusitaʻi Atamu. Ua tatou iloa ai e leai se mea e taofia ai Ieova mai le faamāeʻaina o le mea na ia amataina, ma e tatou te mautinoa ai “e taulau” ana upu. (Isaia 55:11) E tatou te talisapaia foʻi le tele o lona alofa mo i tatou. “O le mea lenei ua faaalia mai ai le alofa o le Atua iā i tatou, auā na auina mai e le Atua lona Atalii e toʻatasi i le lalolagi, ina ia tatou maua ai le ola e ala iā te ia. O le alofa lava lenei, e lē ona ua tatou alolofa i le Atua, ae ona ua alofa mai o ia iā i tatou ma auina mai lona Alo e fai ma taulaga o le leleiga ma le Atua mo a tatou agasala.”​—1 Ioane 4:9, 10.

E “leʻi faasaoina [e le Atua] lona lava Alo, a ua foaʻiina mai o ia mo i tatou uma” ma ua tatou mautinoa ai o le a ia “foaʻi mai iā i tatou isi mea uma” e tusa ma lana folafolaga. (Roma 8:32) O le ā le folafolaga a le Atua i le mea o le a ia faia mo i tatou? Tagaʻi i le isi mataupu o loo sosoo mai.