Fesili Mai le ʻAufaitau

Aiseā o loo faapea mai ai le Isaia 30:21 e uiga i Afioga a Ieova e sau mai i “o outou tua,” ae o le fuaiupu o loo muamua atu o loo tuu Ieova i luma i le faapea mai, ʻE vaai o outou mata i lo outou Aʻoaʻo Sili’?

E faitauina faapea le Isaia 30:20, 21: ‘E lē toe lalafi o outou aʻoaʻo, a e vaai atu o outou mata i lo outou Aʻoaʻo Sili. E faalogo foʻi o outou taliga i le upu i o outou tua e faapea mai: O le ala lava lenei, ia outou savavali ai, pe a outou afe i le itu taumatau pe afe ane i le itu tauagavale.’

Pe a iloilo le mau i lona faaupuga, o loo vaai le tagata faitau iā Ieova, le Aʻoaʻo Sili i luma, ae peitaʻi o loo ia faalogo i Lona siʻufofoga mai i tua. O loo faafaatusa uiga o faaupuga, ma o le auala lenā e tatau ona malamalama i ai.

O le gagana faafaatusa i le fuaiupu e 20 ua aumaia ai iā i tatou se manatu i se auauna o loo tautua i lona matai, ma e nofo sauni e gaoioi i soo se faatonuga na te aumaia. E pei o se auauna o loo uaʻi totoa atu i gaoioiga uma o loo faia e lona matai ina ia iloa le mea e finagalo i ai o ia, e faapena foʻi i aso nei ona uaʻi totoʻa atu tagata o Ieova i faatonuga e faavae i le Tusi Paia o loo aumaia e Ieova e ala mai i lana faalapotopotoga faalelalolagi. (Salamo 123:1, 2) Ioe, o loo latou gaoioi e tusa ai ma lana taʻitaʻiga, e ala i le faaalia o le mataala i soo se mea e faailoa mai e Ieova i “le auauna faamaoni ma le mafaufau.”—Mataio 24:45-47.

O le ā tonu lava la e faatatau i ai le upu sa faalogo lana auauna i le siʻufofoga e sau mai i tua? E talafeagai ona faaiʻu faapea, o le siʻufofoga o loo sau mai i tua o le siʻufofoga lea o le Atua i taimi ua mavae, o loo tautala mai e ala i lana Afioga tusia ma ua mafai ona malamalama i ai e ala i lana “auauna pule.” (Luka 12:42) O auauna a le Atua i aso nei, ua latou faalogo i lona siʻufofoga e ala i le suʻesuʻe ma le filigā o le Tusi Paia, ma faatatauina ana mataupu silisili i o latou olaga faatasi ai ma le fesoasoani a lomiga o loo saunia e “le auauna faamaoni ma le mafaufau,” “le auauna pule.” E ala i le tagaʻi totoʻa i ai, ma faaalia le mataala i faatonuga talafeagai ua aumaia e le Aʻoaʻo Sili ma e ala i le suʻesuʻeina o le Afioga a le Atua lea sa tusia i senituri ua mavae, o le a vaai faafaatusa ai ana auauna iā te ia i o latou luma ma faalogo i lona siʻufofoga o loo sau mai i tua.—Roma 15:4.