E Fesoasoani le Tamaoaiga i le Lē Tagolima

NA TAʻUA Peteru, Iakopo, ma Ioane “o ni poutū.” I le 49 T.A., na latou tuuina atu ai se faatonuga iā Paulo ma Panapa, ina ia manatua Kerisiano matitiva pe a talaʻi i nuu ese. (Kala. 2:9, 10) Na faapefea ona faataunuuina lenā faatonuga?

Na faailoa mai e Paulo i ana tusi le tāua o lenā mataupu iā te ia. O se faataʻitaʻiga, na ia tusi atu i le faapotopotoga i Korinito e faapea: “O faaputugātupe mo le ʻaupaia e pei ona ou faatonu atu i faapotopotoga i Kalatia, ia faapea foʻi ona outou faia. O aso muamua uma o le vaiaso, ia taʻitoʻatasi outou i lona fale ma tuu ese se mea e tusa ma mea ua ia maua, ina ia aua neʻi aoina ni tupe pe a ou alu atu. Pe a ou taunuu atu i inā, o tane uma lava ua outou faamaonia i tusi na outou tusi mai ai, ou te aauina atu i latou e momoli la outou meaalofa i Ierusalema.”—1 Kori. 16:1-3.

Na toe taʻua e Paulo i lana tusi lona lua i Korinito, le māfuaaga o ia foaʻi. Na ia faapea mai i le 2 Korinito 8:12-15, “ina ia avea lo outou tamaoaiga i le taimi nei e fesoasoani i lo latou lē tagolima.”

Ina ua tusi atu Paulo i Kerisiano i Roma pe tusa o le 56 T.A., o le taimi lenā ua toeitiiti uma ona ia aoina le foaʻi. Na ia faapea mai: “Ou te malaga atu i Ierusalema e auauna i le ʻaupaia. A ua fiafia i latou o loo i Maketonia ma Akaia e tufa atu a latou meaalofa i ē e matitiva o le ʻaupaia o loo i Ierusalema.” (Roma 15:25, 26) Sa faataunuu e Paulo le faatonuga na tuuina atu iā te ia. O se faamaoniga, na ia toe foʻi ane i Ierusalema, ae na puʻea ai o ia. O lea na ia tulaʻi ai i luma o le kovana e igoa iā Filiki, ma faapea atu: ʻUa ou sau e aumai meaalofa i loʻu nuu ma ofo atu taulaga i le Atua.’—Galu. 24:17.

Na faapea mai Paulo, ʻna matuā ʻaiʻoi mai le faapotopotoga i Maketonia iā i matou mo se faaeaga e foaʻi atu.’ Ua atagia mai ai le agaga sa faaalia e Kerisiano i le uluaʻi senituri. Na faalaeiauina e Paulo le faapotopotoga i Korinito, ina ia mulimuli i lenā faaaʻoaʻoga. Sa ia faapea mai: “Ia taʻitoʻatasi ma faia e tusa ma le mea ua filifili i lona loto, aua le faia ma le tigā, aua foʻi le faia faamalosi, auā e alofa le Atua i lē e foaʻi ma le lotofiafia.” Aiseā na limafoaʻi ai na faapotopotoga? O le faanaunauga, e lē na o le tau ina ʻfoaʻi atu le tele o mea e manaʻomia e le ʻaupaia, ae ina ia tele ai le faafetai e avatu i le Atua.’ (2 Kori. 8:4; 9:7, 12) Atonu o māfuaaga foʻi na e tatou te faaalia ai le agaga limafoaʻi. E faamanuia e Ieova so o se tasi e faaalia lenā uiga lelei, ma lē manatu faapito. E mautinoa e faatamaoaigaina i tatou, i faamanuiaga mai iā Ieova.—Faata. 10:22.

 [Pusa i le itulau 9]

AUALA UA FILIFILIA E NISI E FOAʻI AI MEAALOFA MO LE GALUEGA I LE LALOLAGI AOAO

E pei o aso o Paulo, e ʻtuuesea’ pe faaagaga e le toʻatele se vaega tupe e tuu i pusa a faapotopotoga o loo faailogaina, “Galuega i le Lalolagi Aoao.” (1 Kori. 16:2) E avatu e faapotopotoga i masina taʻitasi, nei tupe i le ofisa o le lālā o Molimau a Ieova o loo vaavaaia o latou atunuu. E mafai foʻi ona lafo saʻo lau foaʻi, i se faalapotopotoga faaletulafono o loo faaaogāina e Molimau a Ieova i lou atunuu. Ina ia iloa le faalapotopotoga faaletulafono autū o loo faaaogāina e Molimau a Ieova i lou atunuu, faamolemole faafesootaʻi le ofisa o le lālā o loo vaavaaia le atunuu. E mafai ona maua le tuatusi o le ofisa o le lālā i luga o le www.ps8318.com. O loo mulimuli mai foaʻi e mafai ona e lafoina tuusaʻo:

O FOAʻI E LEAI NI TUUTUUGA

• Foaʻi tautupe, filifili, tautaliga, taulima, po o isi oloa tāua.

• E aofia ai ma se tusi e faailoa atu ai, o na mea ua foaʻi atu e aunoa ma ni tuutuuga.

FUAFUAGA O FOAʻI E IAI TUUTUUGA

• Foaʻi tautupe ma le tuutuuga e toe faafoʻi lenā foaʻi i lē e ana le tupe, pe a ia talosagaina.

• E aofia ai ma se tusi e faailoa atu ai e iai tuutuuga o le foaʻi.

FUAFUAGA O FOAʻI FAAMEAALOFA

E lē gata i foaʻi tautupe ma isi oloa tāua, ae e iai isi auala e faia ai foaʻi mo le galuega o le Malo i le lalolagi aoao. O loo lisiina mai na auala i le pito i lalo. Po o le ā lava le auala e te filifili e faaaogāina, faamolemole faafesootaʻi muamua le ofisa o le lālā o loo vaavaaia la outou atunuu. O le faia faapea, e te iloa ai po o ā auala o loo faaaogāina e lou atunuu. Talu ai e tele ina fesuisuiaʻi tuutuuga faaletulafono ma tulafono o lafoga, e tāua ai ona saʻili le fesoasoani a ni lōia ma tagata faufautua e faatatau i lafoga, a o leʻi filifili po o lē fea le auala sili e faia ai lau foaʻi.

Inisiua: O le inisiua o le ola o se tasi, le tupe e maua pe a litaea, po o le penisione, o le a lotomalie se tasi e foaʻi mo le faalapotopotoga o loo faaaogāina e Molimau a Ieova.

Teugātupe i le Faletupe: O teugātupe i le faletupe, pepa e faamaonia ai se teugātupe (certificates of deposit), po o tupe e maua e le tagata pe a litaea, e mafai ona tuu faamavaega pe totogi atu pe a maliu, i se faalapotopotoga o loo faaaogāina e Molimau a Ieova, ma ia faia e tusa ma aiāiga a faletupe o le atunuu.

Tupe Faafaigaluega (Stock) ma Pepa Faamaonia mo Tupe (Bonds): O nei mea e mafai ona foaʻi faameaalofa tuusaʻo atu i se faalapotopotoga o loo faaaogāina e Molimau a Ieova, pe e tusi foʻi i lalo e maua e le faalapotopotoga nei mea pe a e maliu.

Fanua ma Fale: E mafai ona foaʻi tuusaʻo ou fanua ma fale, i se faalapotopotoga o loo faaaogāina e Molimau a Ieova, pe tuu e nofo ai pea lē e ana le fale seʻia oo ina maliu, ona faatoʻā maua lea e le lālā.

Tupe Faameaalofa e Iai Tuutuuga (Gift Annuity): O nei tupe, o se meaalofa ua faatulaga e avatu i se faalapotopotoga o loo faaaogāina e Molimau a Ieova. Ae e maua e lē e ana le foaʻi po o se tasi ua ia tofia, se tino i tupe i tausaga taʻitasi a o soifua pea o ia. O le a faaitiitia le lafoga e totogi e le tagata na faia le foaʻi, i le tausaga na faamautūina ai lea fuafuaga.

Uili ma Mavaega: E mafai ona foaʻi atu meatotino po o se vaega tupe i se faalapotopotoga o loo faaaogāina e Molimau a Ieova, e ala i se uili ua faia e tusa ai ma le tulafono. Pe mauaina foʻi e lenei faalapotopotoga le taui o se teugātupe ua tuu faamavaega. O le faia faapea, e mafai ona faaitiitia ai lafoga e totogi.

E pei ona faailoa mai i le faaupuga “fuafuaga o foaʻi faameaalofa,” o nei foaʻi, e manaʻomia ona fuafua lelei e lē e ana le foaʻi. Ina ia fesoasoani i ē o loo fia faia ni meaalofa tauofo i le galuega a Molimau a Ieova i le lalolagi aoao, ua saunia ai se polosiua i le faa-Peretania ma le faa-Sepania e taʻua o le Charitable Planning to Benefit Kingdom Service Worldwide. Ua saunia i le polosiua faamatalaga i auala eseese e faia ai foaʻi faameaalofa i le taimi nei, ma pe a maliu lē e ana le foaʻi. Atonu e lē o faamatalaga uma i le polosiua e aogā i lou tulaga, ona o tulafono o lafoga po o nisi o tulafono i lou atunuu. O lea, pe a uma ona e faitau i le polosiua, ona outou talanoa lea ma lōia po o tagata faufautua e faatatau i lafoga. O nei auala ua mafai ai e le toʻatele ona lagolagoina fuafuaga a Molimau a Ieova i le lalolagi aoao, ma maua ai foʻi le fesoasoani i le faaitiitia o lafoga e totogi. Atonu e mafai ona e talosagaina se kopi o lenei polosiua mai le failautusi o lau faapotopotoga, pe afai e maua i lou atunuu.

Mo nisi faamatalaga, faafesootaʻi le Charitable Planning Office, e ala i lou tusi atu i le tuatusi pe telefoni atu foʻi i le numera o loo taʻua i lalo, pe faafesootaʻi le ofisa o le lālā o Molimau a Ieova o loo vaavaaia lou atunuu.

CHARITABLE PLANNING OFFICE

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Telefoni: (845) 306-0707