Po ua Itiiti se Taimi o Totoe mo le Lalolagi Paneta?

O fea o tali nei e te manatu o le tali saʻo mo lenei fesili?

I tulaga o le lalolagi i le lumanaʻi lata mai, po o le a

(a) faaleleia?

(e) tumau pea?

(i) agaʻi ina leaga?

PO O tumau pea ona iai sau vaaiga saʻo e faatatau i le lumanaʻi? E tele aogā o le faia faapea. Ua faaalia mai suʻesuʻega na fai, o tagata e iai se vaaiga saʻo e sili atu ona lelei mea latou te faia i le itu tauaʻoaʻoga, faalemafaufau ma le faaletino. I se tasi o suʻesuʻega umi na fai, na iloa ai o i latou e iai se vaaiga saʻo, e foliga mai e itiiti se avanoa e maua ai i le maʻi fatu, nai lo i latou e lē saʻo le vaaiga i le olaga. E ōgatusa nei suʻesuʻega ma le faamatalaga o loo i le Tusi Paia lea sa tusia i le tele o senituri ua mavae: “O le loto fiafia, e fai ma vailaau aogā lea; a o le loto faanoanoa e mamago ai ivi.”—Faataoto 17:22.

Peitaʻi, o le iloaina o mea o loo valoia mai e tagata popoto faasaienisi e faatatau i le lumanaʻi o le Lalolagi paneta, ua faigatā ai mo le toʻatele ona fiafia pea ma iai se vaaiga saʻo. Seʻi manatu i nisi o valoaga taufaamataʻu o loo faia i faasalalauga.

Ua Lamatia le Paneta

I le tausaga 2002, na faailoa ai e le Faalapotopotoga Tau i le Siʻosiʻomaga i Stockholm le lē taulau ona faaitiitia o aafiaga leaga i le siʻosiʻomaga, ona o le atiina aʻe o le tamaoaiga, ua faapogaia ai “mea o loo tutupu lea e ono suia atoatoa ai le tau ma le taualumaga o meaola ma o latou siʻosiʻomaga.” Na taʻua atili e le lipoti le  tulaga mativa o le lalolagi, o faiga lē tonu, ma le faaauau ona faaleagaina o punaʻoa o le siʻosiʻomaga, e māfua ai ona lē mautonu tagata “i tulaga leaga o le siʻosiʻomaga, le vafealoaloaʻi, ma le malupuipuia ma oo atu ai i isi tulaga leaga.”

I le 2005, na faailoa mai ai e Malo Aufaatasi se Lipoti ua Tuufaatasia o le Iloiloga o le Taualumaga o Meaola ma lo Latou Siʻosiʻomaga o le Meleniuma. O se lipoti na maua mai i se suʻesuʻega tele na faia mo le fā tausaga i le siʻosiʻomaga o le Laueleele. O lenei suʻesuʻega tele, lea na faia e tagata suʻesuʻe atamamai e sili atu i le 1,360 mai atunuu e 95, sa aumaia ai se lapataʻiga malosi e faapea: “Ua matuā telē le afāina o le natura o mea o le Lalolagi ona o mea o loo faia e tagata, lea e lē tatau ai ona toe manatu māmā i le tulaga o taualumaga o meaola ma o latou siʻosiʻomaga, auā le soifua mālōlōina o tupulaga fāi mai i le lumanaʻi.” E tusa ai ma le lipoti, ina ia puipuia mai i mala, e manaʻomia “ni suiga lelei i faatulagaga o mea, faalapotopotoga, ae o nei suiga e lē o faia i le taimi lenei.”

Na faamatala mai e Anna Tibaijuka, o le faatonu lagolago mo le United Nations Human Settlements Programme, le mea o loo talitonu i ai le toʻatele o tagata suʻesuʻe. Na ia faapea mai: “Afai e faaauau pea ona tatou faia mea o loo fai i le taimi nei, e mataʻutia se mea o le a tupu i le lumanaʻi.”

Le Māfuaaga o le Iai o se Vaaiga Mautinoa

E talitonu foʻi Molimau a Ieova, o ē o loo lomia lenei mekasini, i le lalata mai o suiga tetele lea o le a aafia ai le lalolagi atoa. Peitaʻi, ua latou mautinoa nai lo le tupu ai o se mea mataʻutia i le lumanaʻi, o nei mea o le a iʻu atu ai i se tulaga sili ona matagofie e leʻi tupu muamua lava i le lalolagi. Aiseā ua latou mautinoa ai? Ona ua latou talitonu atoatoa i folafolaga ua tusia i le Afioga a le Atua, le Tusi Paia. Seʻi mātau se tasi o na folafolaga: “E toe itiiti, ona leai lea o le tagata amio leaga; e te mafaufau foʻi i le mea sa i ai o ia, a e leai lava. A o ē agamalu, e fai mo latou le nuu; e faafiafia foʻi i latou iā te i latou ona o le manuia e tele.”—Salamo 37:10, 11.

Po ua na o se miti ea lenā faamoemoe? A o leʻi taliina lenā fesili, seʻi manatunatu i le mea lenei: I le faitau afe tausaga ua tuanaʻi, na folafola mai ai ma le tonu e le Tusi Paia le tele o faafitauli ua tatou vaaia i aso nei o loo mafatia ai le lalolagi ma tagata. Faamolemole, ia faitau mau faale-Tusi Paia o loo sii mai i le mataupu o sosoo mai, ma faatusatusa faamatalaga o loo iai ma mea o e vaaia ua tutupu i le lalolagi. O lou faia faapea, o le a atili ai ona e faatuatua i le saʻo o le Tusi Paia e uiga i mea ua ia folafola e tutupu i le lumanaʻi.