Ua Fesili Mai le ʻAufaitau . . .

Aiseā e Finagalo ai le Atua ia Faaipoipo Ona Tagata Tapuaʻi, Tau Lava o Tagata Tapuaʻi?

▪ I le Tulafono a le Atua na tuu atu i le nuu o Isaraelu, na aofia ai le poloaʻiga e faatatau i tagata o atunuu o loo siʻomia i latou e faapea: “Aua tou te faaipoipo atu iā i latou. Aua e te avatu lou afafine ma lona atalii, aua foʻi e te aumaia lona afafine ma lou atalii.” (Teuteronome 7:3, 4) O le ā le māfuaaga na faasa ai lea tulaga?

I le vaaiga lautele, na silafia e Ieova o loo manaʻo Satani e faaliliu Ona tagata, ina ia tapuaʻi atu i atua sesē. Na lapataʻi atu le Atua e uiga i ē e lē talitonu e faapea, e “latou te faaliliuina o outou atalii mai i le mulimuli atu i le Atua, ma latou auauna atu foʻi i isi atua.” E toʻatele na lamatia i lea tulaga. Afai e auauna atu tagata Isaraelu i isi atua, o le a latou lē maua la le finagalo malie ma le puipuiga a Ieova, ma e faigofie ona faaumatia i latou e o latou fili. O le a faapefea la ona auala mai le Mesia folafolaina i le nuu o Isaraelu? E manino mai, e iai le māfuaaga na manaʻo ai Satani e taaina tagata Isaraelu, e faaipoipo atu i tagata lē talitonu.

Ae i le isi itu, e manatu mamafa le Atua i ona tagata taʻitoʻatasi. E na te silafia, e faalagolago le mauaina o le fiafia ma le sologa lelei o le olaga, i le iai o se faiā vavalalata ma ia lo tatou Atua. Pe sa iai se māfuaaga lelei na manatu mamafa ai Ieova, i aafiaga mataʻutia o le iai o se paaga lē talitonu? Seʻi manatu i le faaaʻoaʻoga a le tupu o Solomona. Na ia iloa lelei le lapataʻiga a Ieova e faatatau i avā lē talitonu: “Latou te faaliliuina o outou loto, ina ia mulimuli atu i o latou atua.” Ona na maoaʻe lona atamai, atonu la na manatu e na te lē manaʻomia ni fautuaga mai i le Atua. Na ia lē amanaʻia le lapataʻiga. O le ā le iʻuga? “Ua faasolosolo mālie foʻi ona faaliliuina lona loto e ana avā . . . ina ia mulimuli atu i isi atua.” Pagā se mea a leaga! O Solomona lava ia na melea le finagalo malie o Ieova, ma na matuā vaeluaina ona tagata ona o lona lē faamaoni.—1 Tupu 11:2-4, 9-13.

Ae atonu e manatu nisi e lē āfaina lenā tulaga. O se faataʻitaʻiga, o le tagata Isaraelu o Maalona lea na faaipoipo atu i le fafine Moapi o Ruta, o lē na avea o sē e mataʻina le faatuatua. Ae o le faaipoipo atu i le fafine Moapi o se filifiliga mataʻutia. E leʻi taʻuleleia Maalona i le faaipoipo atu i le teine Moapi. Na maliu o ia a o talavou pea, ma atonu a o leʻi avea Ruta o se tagata tapuaʻi o Ieova. Na faaipoipo atu foʻi le uso o Maalona o Kiliona, i le fafine Moapi o Orepa, o lē na tapuaʻi pea i “ona atua.” I le isi itu, na faaipoipo atu Poasa iā Ruta a ua leva ona avea Ruta ma tagata talitonu. O le mea moni, na manatu tagata Iutaia iā te ia o se tagata “liulotu lelei.” Na avea le faaipoipoga a Poasa ma Ruta o se faamanuiaga mo i laʻua uma.—Ruta 1:4, 5, 15-17; 4:13-17.

Pe e talafeagai la ona tatou mafaufau e iai itu e feteenaʻi ai le faataʻitaʻiga a Maalona ma Ruta, ma le fautuaga a Ieova ina ia faaipoipo atu tau lava o tagata tapuaʻi? O le mea moni, o le mafaufau faapena, ua tai pei lava o loo e mafaufau i se tagata e taalo i taaloga faitupe na manumalo, ona e finau mai lea o se auala talafeagai lea e maua ai tupe e ola ai.

Ua apoapoaʻi mai le Tusi Paia i Kerisiano i aso nei, ina ia faaipoipo “tau lava o lē ua i le Alii.” O loo lapataʻi mai e faatatau i le “amo faalēgatasi ma ē e lē talitonu.” O nei fautuaga e patino atu i Kerisiano o loo taumafai e saʻili ni paaga, ae mo i latou ua faaipoipo atu i ē e lē talitonu, ua ofo mai e le Tusi Paia ni fautuaga alofa i le auala sili e feagai ai ma lenei tulaga faigatā. (1 Korinito 7:12-16, 39; 2 Korinito 6:14) O nei fautuaga uma ua faaalia ai e finagalo Ieova le Atua, o Lē na faavaeina faaipoipoga, ina ia avea i tatou ma tagata tapuaʻi fiafia, e tusa lava pe nofofua pe faaipoipo.