Ia Aʻoaʻo Lau Fanau

Na Matapeʻapeʻa Kiasi

PE E iai se mea na e matuā manaʻo lava i ai?— * Pe afai sa iai, e pei la oe o le toʻatele o isi tagata. Ae pe e tatau ona e taumafai e maua lenā mea e ala i le faia o se pepelo?— E leai. O se tagata e faapena e matapeʻapeʻa. Seʻi o tatou vāai pe na faapefea ona iai le uiga matapeʻapeʻa iā Kiasi, le auauna a Elisaia, le perofeta a le Atua moni o Ieova.

Na ola Elisaia ma Kiasi i aso lava la ua leva, e tusa ma le afe tausaga a o leʻi fanau mai i le lalolagi Iesu, le Alo o le Atua. Na faaaogā e Ieova Elisaia e faia ni galuega matagofie lava e taʻua o vavega! O se faaaʻoaʻoga, o loo taʻua i le Tusi Paia se tamāloa na tāua tele i le ʻau fitafita a Suria e igoa iā Naamanu, ma sa maua o ia i le maʻi leaga o le lepela. E leai se tasi na mafai ona faamālōlōina o ia, ae e na o Elisaia.

Ina ua faaaogā e le Atua Elisaia ina ia fesoasoani e faamālōlō tagata, e na te lē taitai ona taliaina se tupe. E te iloa le māfuaaga?— Auā na iloa e Elisaia o le Atua e faia vavega ae e lē o ia. Ina ua toe malosi Naamanu, sa manaʻo o ia e avatu ni meaalofa o auro, siliva, ma ofu lelei mo Elisaia. E leʻi talia e Elisaia se mea, ae sa manaʻo tele i ai lana auauna o Kiasi.

Ina ua toe foʻi Naamanu, ona mulimuli atu lea o Kiasi iā te ia, ae e leʻi iloa e Elisaia. E te iloa le tala a Kiasi na fai atu iā Naamanu ina ua ia maua atu o ia?— ʻNa tuli mai aʻu e Elisaia e taʻu atu o loo iai ni ana malo se toʻalua na faatoʻā taunuu mai. O loo manaʻo mai o ia i ni ofu se lua e avatu mo nei tamāloloa.’

 Ae e pepelo lenā tala! Sa faia e Kiasi se pepelo e faatatau i ni mālō se toʻalua, ona na manaʻo i ofu na taumafai Naamanu e avatu iā Elisaia. Ae e leʻi iloa e Naamanu ua pelogia o ia, ma o lea sa fiafia ai e avatu iā Kiasi ni meaalofa. Na avatu foʻi e Naamanu nisi o mea e sili atu nai lo o mea sa manaʻo atu ai Kiasi. E te iloa le isi mea na tupu?—

Ina ua taunuu Kiasi i le fale, sa fesili atu loa Elisaia: ʻO fea sa e iai?’

Na tali atu Kiasi: ʻOu te leʻi alu lava i se mea.’ Peitaʻi, ua uma ona faailoa atu e Ieova iā Elisaia le mea sa faia e Kiasi. O lea na fai atu ai Elisaia: ʻE lē o le taimi lenei e talia ai ni ofu ma ni siliva!’

Ua ave e Kiasi ni tupe ma ofu e lē o ia e ana. O lea na faaoo ai e le Atua iā Kiasi le lepela o Naamanu. O le ā e tatou te aʻoaʻoina mai i lenei mea?— O se tasi o lesona, e lē tatau ona tatou faia ni tala pepelo.

Aiseā na faatupu ai e Kiasi se tala pepelo?— Ona o lona matapeʻapeʻa. Sa manaʻo o ia i mea e lē o ia e ana, ma na taumafai e maua na mea e ala i le faia o se pepelo. O lenā mea na oo ai iā te ia se maʻi leaga tele i lona olaga atoa.

O le mea moni, e iai se isi mea e sili atu ona leaga na mafatia ai Kiasi. E te iloa lenā mea?— Sa lē toe fiafia, ma lē toe alofa le Atua iā te ia. Seʻi aua lava neʻi o tatou faia se mea e lē fiafia mai ai le Atua! Ae ia tatou faaalia le agalelei ma ia fiafia e faasoa atu mea ua tatou maua.

Faitau i lau Tusi Paia

2 Tupu 5:5, 20-27; Iuta 21

Ioane 15:10

[Faaopoopoga i lalo]