Na teteʻa oʻu mātua a o oʻu pepe, ma sa galue malosi loʻu tinā e tausia i matou ma oʻu uso e toʻalua ma loʻu tuafafine. Sa matuā faigatā ma leaga le auala na aʻoaʻoina ai tamaiti logonoa i Falani i lenā taimi, ae sa ou maua lava ni nai aʻoaʻoga lelei, ia sa leʻi maua e isi tagata logonoa.

Sa manatu faiaʻoga e tatau i tamaiti logonoa ona taumafai e vaai i le memu o gutu o faiaʻoga, ina ia iloa ai a latou tala o loo fai. Sa matuā faasā ona faaaogā taga, ma o nisi tamaiti logonoa sa nonoa i tua o latou lima i taimi o vasega.

Sa matuā ou mafatia a o ou laʻitiiti. Sa faia ni aʻu siaki e se fomaʻi faapitoa i le faaleleia o le tautala, ma e na te uu loʻu auvae ma loʻu ulu ma taumafai e faatautala aʻu, pe e faaleo mai ni upu. Na faasā foʻi ona ou faifaimea faatasi ma isi tamaiti logonoa.

O le ono o oʻu tausaga na faatoʻā ou faifaimea ai ma isi tamaiti logonoa, ina ua ou auai i se aʻoga e faapitoa mo ē logonoa. Sa faasā foʻi i inā le gagana logonoa, ma sa sasa ponaivi o matou tuālima pe e futi o matou ulu pe a taumafai e faaaogā taga e fesootaʻi ai. Peitaʻi, sa matou faia faalilolilo ni taga ina ia mafai ai ona matou talanoa, ma sa matuā ou fiafia lava i lenā taimi.

Peitaʻi, o le sefulu o oʻu tausaga, na ave ai aʻu i se aʻoga tulagalua e leai ni tamaiti logonoa, ma sa matuā ou mafatia ai lava. Sa ou manatu ua feoti uma isi tamaiti logonoa ma ua na o aʻu lava le tamaitiiti logonoa i le lalolagi atoa. Sa fautuaina e fomaʻi loʻu aiga e aua neʻi latou faaaogāina taga e matou te fesootaʻi ai, pe ou te faifaimea foʻi ma isi tamaiti logonoa, ona na mananaʻo ia fai ni aʻu taumafaiga ou te tautala. I se tasi aso, na ou vaaia ai se tusi mo ē logonoa i le ofisa o se fomaʻi, ma sa ia nanāina le tusi ina ua ou fai atu ou te manaʻo i ai. *

Sa taumafai loʻu tinā e aʻoaʻo i matou i le Tusi Paia, ma sa matou ō i sauniga a Molimau a Ieova i Mérignac. Sa ou lagona le fiafia, ona sa auauaʻi nisi o Molimau a Ieova e nonofo i oʻu autafa e tusi mai mea o loo faia i le sauniga. Peitaʻi, sa tumau pea ona ou lē malamalama, e oo lava pe a ma suʻesuʻeina le Tusi Paia ma loʻu tinā i le fale. Na pei aʻu o le perofeta o Tanielu, o lē na vaaia se faaaliga ma faapea mai: “Na ou faalogo ae ou te leʻi malamalama.” (Tanielu 12:8) Peitaʻi, e tusa ai ma loʻu tulaga, sa pei “ua ou vaai ae ou te leʻi malamalama.”

Sa faasolosolo mālie lava ona ou aʻoaʻoina upu moni o le Tusi Paia, ma taumafai e faatatau i loʻu olaga. Na ou aʻoaʻoina foʻi nisi o mea e ala i le mātau o uiga o isi. O se faataʻitaʻiga, ou te leʻi iloa po o le ā le uiga o le upu onosaʻi o loo taʻua i le Tusi Paia. (Iakopo 5:7, 8) Ae o loʻu mātauina o uiga o isi uso ma tuafāfine Molimau a Ieova, na ou malamalama ai. Ioe, sa matuā aogā le faapotopotoga Kerisiano iā te aʻu.

I se tasi o aso ina ua ou talavou, sa ou vaaia ai ni tamaiti o faaaogāina le Gagana Logonoa a Falani, ma sa ou faauō faalilolilo atu loa iā i latou ma ou taumafai e aʻoaʻoina le gagana. Sa ou auai pea i sauniga a Molimau a Ieova, ma e iai se talavou e igoa iā Stéphane sa matuā māfana la ma faigāuō. Sa naunau o ia e aʻoaʻo le gagana mo ē logonoa ina ia talanoa mai ai. Peitaʻi, na ou matuā faanoanoa ina ua faafalepuipuiina o ia, ona o lona solitū e auai i vaegaau. Na ou lagona le lotovaivai ma ou lē toe auai ai i sauniga.

Na magalo Stéphane ina ua mavae le sefulu tasi masina, ma maʻeu loʻu fiafia ina ua foʻi mai ua ia iloa le gagana logonoa! Sa ia aʻoaʻoina le gagana logonoa a o iai i le falepuipui, ma sa ou iloa o le a matuā telē sana fesoasoani iā te aʻu i le aʻoaʻoina o le upu moni.

Na ma suʻesuʻeina ma Stéphane le Tusi Paia, ma o i inā na faatoʻā ou malamalama ai i le tele o aʻoaʻoga moni. A o ou laʻitiiti, sa ou fiafia e matamata i ata o loo i lomiga ma taumafai e malamalama i le uiga. Sa ou aʻoaʻoina e faatatau iā Aperaamo, o le “fanau,” ma le “motu o tagata e toʻatele,” ae o lea faatoʻā pāʻia loʻu loto ina ua faamatalaina mai iā te aʻu i le gagana mo ē logonoa.—Kenese 22:15-18; Faaaliga 7:9.

Ua mafai ona ou malamalama i sauniga, ma ua atili ai loʻu naunau e fia iloa le upu moni. O le fesoasoani mai pea o Stéphane na iʻu ina ou papatiso ai i le 1992. Peitaʻi, sa tumau pea ona ou matamuli e talanoa i tagata, ona sa leʻi masani ona ou faifaimea ma tagata a o ou laʻitiiti.

Na atili ona ou agaʻigaʻi i luma faaleagaga ina ua tuufaatasi la matou vaega logonoa ma se isi faapotopotoga logonoa i Pessac. E ui sa  faigatā ona ou talanoa i isi, ae sa taumafai lava nisi o aʻu uō e lē logonoa e faamautinoa ua ou malamalama i mea uma. O nisi o i latou o se ulugalii e igoa iā Gilles ma Elodie, ma e masani ona matou faiʻaiga faatasi i lo la fale. Maʻeu se fiafiaga o le iai faatasi ma tagata e auauna i le Atua.

O i inā sa ou fetaui ai i le tamaʻitaʻi lalelei o Vanessa, o sē e tausaafia ma e lē faailogatagata. Sa maumauaʻi o ia e aʻoaʻo le gagana mo ē logonoa e talanoa mai ai, ma sa matuā faananau loʻu loto iā te ia. O le 2005 na ma faaipoipo ai, ma sa fesoasoani tele o ia iā te aʻu ina ia foʻia loʻu uiga matamuli. Ou te talisapaia lana lagolagosua i oʻu faaeaga i le faapotopotoga.

O le 2005 na valaaulia ai foʻi aʻu e le ofisa o Molimau a Ieova i Falani, ina ia faia ni aʻu toleniga o se tagata faaliliu mo se masina. O le taimi lenā na amata ai ona galulue le ofisa i Falani ina ia faaliliu a tatou lomiga i le Gagana Logonoa a Falani ma puʻeina i DVD. O lea na valaaulia ai aʻu e faia soʻu sao i le galuega faaliliu, ona sa matuā manaʻomia ai se fesoasoani.

Na ma manatu ma Vanessa o se faaeaga ma o se meaalofa mai iā Ieova le auauna ai i le ofisa. Peitaʻi, sa ma popole foʻi po o le ā o le a tupu i si a matou vaega logonoa, o la ma fale, ma po o le a maua foʻi se galuega a Vanessa i lenā nofoaga fou. E ui i lea, sa lagolagosua mai pea ma le alofa Ieova iā i maʻua faapea tagata logonoa.

O le auai i le galuega faaliliu, ua ou iloa ai le tele o sauniuniga faaleagaga ua faia mo tagata logonoa. Ou te lagona le fiafia, ona o le toʻatele o i latou e matou te faigaluega, e naunau e aʻoaʻo le gagana mo ē logonoa ma taumafai e talanoa mai. O lo latou faaalia mai pea o le alofa, ua ou faamaonia ai le autasi o tagata o Ieova.​—Salamo 133:1.

Ou te faafetaia Ieova ona o lona saunia mai o le faapotopotoga Kerisiano e fesoasoani mai pea iā te aʻu. Ou te talisapaia foʻi loʻu faaeaga e faia ai soʻu sao itiiti, e fesoasoani ai i ē logonoa ina ia iloa Lē na foafoaina i tatou ma mafuta vavalalata atu i ai. Ou te tulimataʻia le taimi o le a mafai ona fesootaʻi tagata uma, ma autasi uma ina ia tautatala i le “gagana mamā,” po o upu moni e uiga iā Ieova ma ana fuafuaga.​—Sefanaia 3:9.