E toʻaʻaga Estelle * ma lana fanau i le lotu. Na faapea mai o ia: “Na ou talanoa i le faifeʻau ou te manaʻo e suʻesuʻe le Tusi Paia.” Peitaʻi, e leʻi faia faapea e le faifeʻau. O lea, e leʻi toe alu ai Estelle i se lotu. Na ia faapea atili mai: “Na tusi mai taʻitaʻi lotu ma faapea mai, afai ou te lē alu atu i le lotu, e mafai ona lafo atu na o aʻu tupe. O lea na ou manatu ai, e latou te lē popole pe a ou lē alu atu, e na o tupe e mananaʻo ai.”

Na faapea mai Angelina, o se tagata e toʻaga i le lotu: “I la matou lotu, e faatolu ona ao le peleti, ma e faatalitalia e tatau lava ona lafo sau tupe. E latou te talosaga mai pea mo ni tupe. O lea na ou manatu ifo ai, ʻE lē o iai le agaga o le Atua i nei tagata.’”

Faamata o ao faamalosi le peleti, pe e faia foʻi ni saʻiliga tupe i le lotu o loo e auai ai? Pe e ōgatusa na gaoioiga ma le manatu o le Tusi Paia?

Na faapea mai Iesu o lē na faavaeina le faa-Kerisiano: “Ia outou avatu fua, auā ua outou maua fua.” (Mataio 10:8) E lē mafai e tupe ona faatauina le feʻau mai le Tusi Paia, ma e tatau ona maua e tagata uma o loo manaʻomia.

Na faapefea ona totogi e uluaʻi Kerisiano tupe faaalu a le faapotopotoga?

E lafo e tagata taʻitoʻatasi “e tusa ma le mea ua filifili i lona loto, aua le faia ma le tigā, aua foʻi le faia faamalosi, auā e alofa le Atua i lē e foaʻi ma le lotofiafia.” (2 Korinito 9:7) Na faapea mai le aposetolo o Paulo: “Na matou galulue ai i le pō ma le ao, ina neʻi faatigāina so o se tasi o outou, a o matou talaʻia atu le tala lelei.” (1 Tesalonia 2:9) Na galue Paulo o sē fai faleʻie ina ia fesoasoani i lana auaunaga.​—Galuega 18:2, 3.

E faia sauniga a Molimau a Ieova i fale e faigofie lona fausaga e taʻua o Maota mo Sauniga. E faapefea ona totogi a latou tupe faaalu? E lē aoina ni peleti, pe ave foʻi ni teutusi e ao mai ai ni tupe. Afai e iai se tasi e auai i le sauniga ae faaalia le lototalisapaia, e tuu lava i lona loto faitalia pe manaʻo e tuu sana meaalofa tauofo i pusa o meaalofa o loo iai i le Maota mo Sauniga, ma e lē tatau ona iloa e se tasi lana meaalofa.

E tele ni tupe na faaalu i le lolomiina aemaise le lafoina mai o lenei mekasini. Peitaʻi, e leai se vaega o lenei mekasini o taʻua ai le toe talosaga atu mo ni tupe. O le naunautaʻiga, ia faailoa atu ai upu moni o le Tusi Paia.

O le ā sou manatu: Pe e lē o le mea ea lenā e tatau ona fai pe a fua i upu a Iesu, faapea faaaʻoaʻoga a uluaʻi Kerisiano?