1. O le ā le tatalo lauiloa o le a tatou iloiloina?

E TOʻATELE tagata i le lalolagi e iloa le Tatalo a le Alii. O Iesu Keriso na saunia le tatalo faaaʻoaʻo lenā. E tāua tele lenā tatalo, ma o le iloiloina o uluaʻi talosaga e tolu o loo iai, o le a atili ai ona e malamalama i aʻoaʻoga moni a le Tusi Paia.

2. O ā mea e tolu na aʻoaʻo e Iesu ona soo ia tatalo i ai?

² I le amataga o lenei tatalo faaaʻoaʻo, na faatonu atu Iesu i ē na faalogologo: “Ia faapea ona outou tatalo: ʻLo matou Tamā e o i le lagi, ia faapaiaina lou suafa. Ia oo mai lou malo. Ia faia lou finagalo i le lalolagi, e pei ona faia i le lagi.’” (Mataio 6:9-13) O le ā le tāua o nei talosaga e tolu?

3. O ā mea e tatau ona tatou iloa e uiga i le Malo o le Atua?

³ E tele mea ua tatou aʻoaʻoina e uiga i le suafa o le Atua o Ieova. Ua tatou talanoa foʻi e uiga i le finagalo o le Atua—o mea na ia faia ma mea o le a ia faia mo tagata. O le ā le uiga o le fetalaiga a Iesu ina ua ia aʻoaʻo i tatou e tatalo: “Ia oo mai lou malo”? O le ā le Malo o le Atua? E faapefea ona faapaia le suafa o le Atua pe a oo mai lona Malo? O le ā le fesootaʻiga o le oo mai o le Malo ma le faia o le finagalo o le Atua?

4. O le ā le Malo o le Atua, ma o ai lona Tupu?

⁴ O le Malo o le Atua, o le pulega a Ieova le Atua lea ua ia tofia i ai se Tupu. O ai le Tupu o le Malo o le Atua? O Iesu Keriso. E sili atu Iesu le Tupu na i lo o tagata uma lava ua fai ma pule, ma ua taʻua o ia “o le Tupu o tupu ma le Alii o alii.” (1 Timoteo 6:15) Ua iā Iesu le mana e faia ai le tele o mea lelei i lo o pule uma, e oo lava i pule aupito i lelei.

5. O fea o le a pule mai ai le Malo o le Atua, ma e pule mai i le ā?

⁵ O fea o le a pule mai ai le Malo o le Atua? Ia manatua foʻi, o fea o iai Iesu? Sa tatou aʻoaʻoina na maliu Iesu i le laau e faapuapuagatia ai ma toe tū mulimuli ane ai. E leʻi umi ae toe afio atu o ia i le lagi. (Galuega 2:33) O lugā la i le lagi o loo iai le Malo o le Atua. O le pogai lenā ua taʻua ai i le Tusi Paia o le “malo i le lagi.” (2 Timoteo 4:18) E ui lava e i le lagi le Malo o le Atua, ae e pule mai i le lalolagi.—Faitau le Faaaliga 11:15.

6, 7. Aiseā e lē mafaatusalia ai Iesu le Tupu?

⁶ Aiseā e lē mafaatusalia ai Iesu le Tupu? O se tasi o māfuaaga, e lē oo le maliu iā te ia. Pe a faatusatusa i tagata o loo avea ma tupu, fai mai le Tusi Paia o Iesu “e na o ia lava e lē mafai ona oti, o lē e afio i le malamalama e lē mafai ona sao i ai se tasi.” (1 Timoteo 6:16) O lona uiga e tumau e faavavau mea lelei uma ua faia e Iesu. Ioe, o le a ia faia le tele o mea lelei e aogā iā i tatou.

⁷ Ia manatunatu i le valoaga lenei a le Tusi Paia e uiga iā Iesu: “O le a oo iā te ia le agaga o Ieova ma tumau ai, o le agaga o le atamai ma le malamalama, o le agaga o le fautuaga ma le mana, o le agaga o le poto ma le mataʻu iā Ieova; e fiafia o ia i le mataʻu iā Ieova. O le a lē faamasino e ia e tusa ma mea e vaai i ai ona mata,  e lē aʻoaʻi atu foʻi e tusa ma mea e faalogo i ai ona taliga. E faamasino e ia ma le amiotonu ē ua faatauvaa, e aʻoaʻi atu foʻi e ia ma le amio saʻo ina ia maua aogā e tagata agamalu o i le lalolagi.” (Isaia 11:2-4) Ua faamaonia e lenei mau, o le a avea Iesu ma Tupu amiotonu e alofa mutimutivale i tagata o le lalolagi. Pe e te manaʻo i se pule faapena?

8. O ai o le a pule faatasi ma Iesu?

⁸ O le isi mea moni e uiga i le Malo o le Atua, e lē na o Iesu e pule. E iai isi o le a pule faatasi ma ia. O se faaaʻoaʻoga, na fai atu Paulo iā Timoteo: “Afai tatou te tumau pea, e tatou te pule faatasi o ni tupu.” (2 Timoteo 2:12) Ioe, na filifilia e le Atua Paulo, Timoteo ma isi tagata Kerisiano faamaoni, ina ia pule faatasi ma Iesu i le Malo i le lagi. E toʻafia ē o le a maua lenā faaeaga?

9. E toʻafia o le a pule faatasi ma Iesu, ma o anafea na amata ai ona filifilia e le Atua i latou?

⁹ E pei ona taʻua i le Mataupu e 7 o lenei tusi, na maua e Ioane se faaaliga lea na ia iloa atu ai o “tū mai le Tamaʻi Mamoe [Iesu Keriso] i le Mauga o Siona, [o lona tulaga o se tupu i le lagi], o loo faatasi ma ia le selau fā sefulu fā afe, o ē ua tusia lona suafa ma le suafa o lona Tamā i o latou muāulu.” O ai nei tagata e 144,000? Na tali mai Ioane: “O i latou foʻi nei ua mulimuli atu i le Tamaʻi Mamoe i mea uma e alu i ai o ia. O i latou ia ua faatauina mai i tagata o uluaʻi fua mo le Atua ma le Tamaʻi Mamoe.” (Faaaliga 14:1, 4) Ioe, o i latou o ē ua mulimuli faamaoni iā Iesu Keriso, ma ua filifilia faapitoa e pule faatasi ma ia i le lagi. Pe a toe faatutūina aʻe mai le oti ma latou ō i le lagi, ona latou ʻpule mai lea o ni tupu i le lalolagi’ faatasi ma Iesu. (Faaaliga 5:10) Na amata mai i aso o le ʻauaposetolo, ona filifilia e le Atua Kerisiano faamaoni seʻia atoa le aofaʻi e 144,000.

10. Aiseā o se fuafuaga alofa ai le filifilia o Iesu ma le 144,000 e pule mai i tagata?

 ¹⁰ O se fuafuaga alofa le filifilia o Iesu ma le 144,000 e pule mai i tagata. Ua malamalama lelei Iesu i faalogona ma mafatiaga o tagata. Na taʻua e Paulo, o Iesu “o lo tatou ositaulaga sili, o lē e mafai ona tigā alofa faatasi ma i tatou i o tatou vaivaiga, ma sa tofotofoina o ia i mea uma lava e pei o i tatou, a ua leai se agasala ua iā te ia.” (Eperu 4:15; 5:8) A o iai i le lalolagi i latou e pule faatasi ma Iesu, na latou mafatia foʻi ma onosaia puapuaga. E lē gata i lea, na latou tauivi ma tuʻinanauga o le tino augavale ma maʻi eseese. E mautinoa lava latou te malamalama i faafitauli o loo feagai ma tagata!

11. Aiseā na fetalai ai Iesu e ao i ona soo ona tatalo ia faia le finagalo o le Atua i le lagi?

¹¹ Ina ua fetalai Iesu e ao ona tatalo ona soo ia oo mai le Malo o le Atua, na ia taʻua foʻi e ao ona latou tatalo ia faia le finagalo o le Atua “i le lalolagi, e pei ona faia i le lagi.” O loo afio le Atua i le lagi ma o loo faia lona finagalo i taimi uma lava i inā e agelu faamaoni. Ae e pei ona tatou aʻoaʻoina i le Mataupu e 3 o lenei tusi, na lafoaʻia e se agelu leaga le faia o le finagalo o le Atua ma faapogaia Atamu ma Eva e agasala. I le Mataupu e 10, o le a tatou iloa ai le aʻoaʻoga a le Tusi Paia e uiga i lenā agelu leaga, lea e faaigoa o Satani le Tiapolo. Na faaauau ona iai mo se taimi i le lagi Satani ma agelu o ē na mulimuli iā te ia, e taʻua o temoni. O lona uiga la, e leʻi faia e agelu uma i le lagi i le taimi lenā le finagalo o le Atua. Na suia lenā tulaga ina ua amata ona pule le Malo o le Atua. Na sii taua Iesu iā Satani i le taimi lava na avea ai o ia ma Tupu.—Faitau le Faaaliga 12:7-9.

12. O ā ni mea tāua se lua ua tutupu o loo taʻua i le Faaaliga 12:10?

 ¹² Ua faamatala e lenei valoaga le mea o le a tupu: “Ona ou faalogo lea i le leotele mai i le lagi, ua faapea mai: ʻUa iai nei le faaolataga, ma le mana, ma le malo o lo tatou Atua, ma le pule a lona Keriso, auā ua lafo ifo i lalo o lē na molia o tatou uso [Satani], o lē na molia i latou i luma o lo tatou Atua i le ao ma le pō!’” (Faaaliga 12:10) Po ua e mātauina ni mea tāua se lua ua tutupu o loo taʻua i lenā mau? Muamua lava, ua amata ona pule le Malo o le Atua i aao o Iesu Keriso. Lona lua, ua lafo mai Satani i le lalolagi.

13. O le ā le iʻuga o le lafo ese o Satani mai le lagi?

¹³ O ā iʻuga o na mea e lua na tutupu? O le mea lenei na tupu i le lagi: “O le mea lea ia olioli ai le lagi ma outou o loo nonofo ai!” (Faaaliga 12:12) Ioe, ua olioli agelu auā ua na o agelu faamaoni a Ieova le Atua o loo iai i le lagi, a ua lafo ese Satani ma ana temoni. Ua lē toe lapelapea le filemu ma le autasi i le lagi. Ua faia le finagalo o le Atua i le lagi.

14. O le ā ua tupu ona ua lafo mai Satani i le lalolagi?

¹⁴ Ae faapefea le lalolagi? Ua taʻua i le Tusi Paia: “Oi talofa i le laueleele ma le sami, auā ua alu ifo iā te outou le Tiapolo ua lotoa tele, auā ua na iloa ua puupuu lona taimi.” (Faaaliga 12:12) Ua lotoa Satani auā ua lafo ese o ia mai le lagi ma ua puupuu lona taimi. O lona lotoa ua ia faapuapuagatia ai tagata i le lalolagi. O le a tatou iloa atili na puapuaga i le mataupu o sosoo mai. Ae o le fesili, e faapefea ona faia e le Malo le finagalo o le Atua i le lalolagi?

15. O le ā le finagalo o le Atua mo le lalolagi?

¹⁵ Manatua foʻi le finagalo o le Atua mo le lalolagi. O le mea lenā o loo taʻua i le Mataupu e 3. Na faaalia e le Atua i le faatoʻaga o Etena, o lona finagalo ia avea lenei  lalolagi ma parataiso e ola e faavavau ai tagata amiotonu. Na faapogaia e Satani Atamu ma Eva e agasala, ma aafia ai le faia o le finagalo o le Atua i le lalolagi. Peitaʻi e leʻi suia ai le finagalo o le Atua. E finagalo Ieova ia ʻfai le lalolagi mo ē e amiotonu, e nonofo ai pea i latou e oo i le faavavau.’ (Salamo 37:29) O le mea lenā o le a faia e le Malo o le Atua. I le ā le auala?

16, 17. O ā faamatalaga e uiga i le Malo o le Atua ua taʻua i le Tanielu 2:44?

¹⁶ Ia tagaʻi i le valoaga o loo i le Tanielu 2:44: “O aso o ia tupu, o le a faatūina ai e le Atua o le lagi o le malo e lē faaumatia lava. O lea malo foʻi e lē tuuina atu i se isi nuu. O le a ia tuʻimomomoina ma faaumatia malo uma, ae e tumau lea malo e faavavau.” O ā faamatalaga ua taʻua i lenei mau e uiga i le Malo o le Atua?

¹⁷ Muamua lava, ua taʻua ai na faatūina le Malo o le Atua i “aso o ia tupu,” pe a o iai pea isi malo. Lona lua, ua taʻua ai e tumau e faavavau le Malo. E lē faatoʻilaloina ma suia e se isi lava malo. Lona tolu, ua tatou iloa ai o le a tau le Malo o le Atua ma isi malo o le lalolagi. O le a manumalo le Malo o le Atua. Mulimuli ane, ona pau lea o le malo o le a pulea tagata. Ona olioli ai lea o tagata i se pulega e silisili ona lelei.

18. O le ā le igoa o le taua faaiʻu i le va o le Malo o le Atua ma malo o lenei lalolagi?

¹⁸ E tele mau o le Tusi Paia e uiga i le taua faaiʻu i le va o le Malo o le Atua ma malo o lenei lalolagi. O se faaaʻoaʻoga, ua taʻua i le Tusi Paia, a o lata mai le iʻuga, o le a faasalalau atu e agaga leaga talapepelo e faasesē ai “tupu o le lalolagi uma.” Aiseā? “E faapotopoto i latou [tupu] i le taua o le aso tele o le Atua o Lē e ona le malosi uma lava.” O le a faapotopotoina tupu o le lalolagi “i le mea ua igoa i le upu Eperu o Amaketo.” (Faaaliga 16:14, 16)  Ona o mea o loo taʻua i fuaiupu nei e lua, o le igoa la o le taua faaiʻu i le va o malo o tagata ma le Malo o le Atua, o Amaketo.

19, 20. Aiseā ua lē o faia ai le finagalo o le Atua i le lalolagi i le taimi nei?

¹⁹ O ā mea o le a faia e le Malo o le Atua e ala i le taua o Amaketo? Ia toe manatu i le finagalo o le Atua mo le lalolagi. Na finagalo Ieova le Atua ia faatumulia le lalolagi i tagata amiotonu e lelei atoatoa e auauna iā te ia i le Parataiso. Aiseā ua lē taunuu ai i le taimi nei? Muamua lava, o i tatou o tagata agasala e ola matutua ma feoti. Ae na tatou iloa mai le Mataupu e 5, na maliu Iesu mo i tatou ina ia tatou ola e faavavau. Atonu o loo e manatuaina upu a le aposetolo o Ioane: “O le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.”—Ioane 3:16.

²⁰ O se isi faafitauli ona o loo faia e le toʻatele o tagata mea leaga. Latou te pepelo, taufaaʻoleʻole, faitaaga ma mulilua. Latou te lē mananaʻo e fai le finagalo o le Atua. O le a faaumatia tagata amio leaga i le taua a le Atua o Amaketo. (Faitau le Salamo 37:10.) O se isi māfuaaga, ona e lē o uunaʻia tagata e malo ia fai le finagalo o le Atua. E lē lelei, sauā pe faapiʻopiʻo foʻi le tele o malo. Ua moni ai le tala a le Tusi Paia: ʻUa pule le tagata i le isi tagata ma ua matuā afāina ai o ia.’—Failauga 8:9.

21. E faapefea ona faia le finagalo o le Atua i le lalolagi e ala i le Malo?

²¹ A mavae Amaketo, e na o le Malo lava o le Atua o le a pulea tagata. O le a faia e lenā Malo le finagalo o le Atua ma faaoo mai le ʻoa o faamanuiaga. O se faaaʻoaʻoga, o le a aveesea Satani ma ana temoni. (Faaaliga 20:1-3) O le a faatatauina aogā o le taulaga a Iesu auā e lē  toe mamaʻi ma feoti tagata faamaoni. O le a latou ola e faavavau i le pulega a le Malo. (Faitau le Faaaliga 22:1-3.) O le a avea le lalolagi ma parataiso. O lea la, o le a faia e le Malo le finagalo o le Atua i le lalolagi ma faapaia lona suafa. O le ā le uiga o lenei mea? O lona uiga, o i latou uma o ē o le a soifua i le pulega a le Malo o le Atua, o le a faaneenee i le suafa o Ieova.

22. Aiseā e iloa ai e leʻi oo mai le Malo o le Atua a o soifua Iesu i le lalolagi ma ina ua faatoʻā mavae foʻi lona toe tū?

²² Ina ua fetalai Iesu i ona soo e tatalo, “Ia oo mai lou malo,” e manino mai e leʻi oo mai le malo i le taimi lenā. Pe na oo mai ina ua afio aʻe Iesu i le lagi? E leai, talu ai na taʻua e Peteru ma Paulo, ina ua mavae le toe tū o Iesu, na faataunuuina iā te ia le Salamo 110:1: “Ua fetalai mai Ieova i loʻu Alii: ʻIa e nofo i loʻu itu taumatau seʻia ou faia ou fili ma mea e tū ai ou vae.’” (Galuega 2:32-35; Eperu 10:12, 13) Sa tatau ona faatalitali Iesu.

23. (a) O anafea na amata ai ona pule le Malo o le Atua? (e) O le ā o le a iloiloina i le mataupu o sosoo mai?

²³ I le ā le umi? I senituri lona 19 ma le 20, na faasolosolo ai ona iloa e tagata aʻoga faamaoni o le Tusi Paia, o le 1914 e māeʻa ai le faatalitali o Iesu. (E tusa ai o lenā tausaga, tagaʻi i le Faaopoopoga “O le 1914, o se Tausaga Iloga i Valoaga o le Tusi Paia.”) O  mea na tutupu i le lalolagi e amata mai i le 1914, ua faamaonia ai le saʻo o le malamalamaga o nei tagata aʻoga o le Tusi Paia. O le faataunuuga o valoaga o le Tusi Paia ua faaalia ai, o le 1914 na avea ai Keriso ma Tupu, ma amata ai ona pule le Malo o le lagi. O lea la, o le taimi lenei ua tatou ola ai, ʻua puupuu le taimi’ o Satani. (Faaaliga 12:12; Salamo 110:2) E mafai foʻi ona tatou fai atu ma le mautinoa, ua toeitiiti ona gaoioi lea o le Malo o le Atua ina ia fai le finagalo o le Atua i le lalolagi. Pe e logolelei lenei tala i lau faafofoga? Pe e te talitonu i ai? I le mataupu o sosoo mai, o le a iloa ai o mea na o loo aʻoaʻoina e le Tusi Paia.