UA FAATUSAINA e Ieova o ia i se leoleo mamoe faapena. Ua ia faamautinoa mai i lana Afioga: “O aʻu lava, o le a ou saʻili i aʻu mamoe ma tausia i latou.”—Esekielu 34:11, 12.

O ai mamoe a Ieova? O tagata uma e alolofa ma tapuaʻi iā te ia. Ua faapea mai le Tusi Paia: “Seʻi o tatou tapuaʻi ma ifo atu; ia tatou tootutuli atu i luma o Ieova o Lē na faia i tatou. Auā o lo tatou Atua o ia, o i tatou foʻi o le nuu na ia fafagaina ma le lafu mamoe o loo i lona aao.” (Salamo 95:6, 7) E pei o mamoe o loo mulimuli i se leoleo mamoe, ua naunau foʻi tagata tapuaʻi o Ieova e mulimuli i lo latou Leoleo Mamoe. Ae pe e faapea ai ua latou lelei i taimi uma? E leai. E iai taimi e pei ai auauna a Ieova o ni “mamoe ua taapeape solo,” o ni ʻmamoe ua leiloloa,’ ma e ʻfaapei o mamoe ua sē.’ (Esekielu 34:12; Mataio 15:24; 1 Peteru 2:25) E ui i lea, pe a sē ese se tasi, e lē faapea ai ua tuulafoaʻia o ia e Ieova e aunoa ma se faamoemoe.

 Pe e te manatu o loo avea pea Ieova ma ou Leoleo Mamoe? Ua faapefea ona avea Ieova ma Leoleo Mamoe i aso nei? Seʻi o tatou iloiloina ni auala se tolu:

Ua ia fafagaina i tatou faaleagaga. Ua fetalai mai Ieova: ʻO le a ou fafagaina i latou i laufanua lauolaola. O le a latou taooto ai i nofoaga lelei, ma o le a latou aai ai i laufanua lauusiusi.’ (Esekielu 34:14) E leai se taimi ua lē taulau ai ona aumai e Ieova le anoanoaʻi o meaʻai faaleagaga e faafouina ai i le taimi tatau. Pe e mafai ona e mafaufau i se mataupu, lauga, po o se vitiō na taliina ai sau tatalo mo se fesoasoani? Pe e lē o faamautinoa atu ai le manatu mamafa moni o Ieova iā te oe?

Ua ia puipuia ma lagolagoina i tatou. Ua folafola mai e Ieova: “Ou te toe aumaia lē ua tulia, ou te fusifusia i se ʻie lē ua gau, o le a ou faamalosia lē ua maʻi.” (Esekielu 34:16) Ua faamalosia e Ieova i latou ua vaivai pe lofitūina i popolega. Ua ia fusifusia ana mamoe, ma fesoasoani e togafitia i latou pe afai ua manunuʻa, atonu na faamanuʻalia o latou faalogona ona o uso talitonu. E na te toe aumaia i latou ua sē ese, o ē atonu o loo tauivi ma faalogona lē lelei.

E na te tausia i tatou. Ua fetalai mai Ieova: ʻO le a ou laveaʻiina i latou mai i mea uma ua faataapeapeina i ai. O le a ou saʻilia lē ua sē.’ (Esekielu 34:12, 16) E lē manatu Ieova ua leai se faamoemoe o se mamoe ua sē. E na te silafia le taimi e leiloa ai se mamoe, ona ia saʻilia lea, ma fiafia pe a toe maua mai. (Mataio 18:12-14) Ua ia taʻua ona tagata tapuaʻi “o aʻu mamoe, o mamoe o loo oʻu leoleoina ma fafagaina.” (Esekielu 34:31) O oe o se tasi o ana mamoe.

Aiseā ua saʻilia ai oe e Ieova ma valaaulia oe ina ia toe foʻi atu iā te ia? Talu ai e finagalo o ia ina ia e fiafia. Ua ia folafola mai “o le a iai timuga o faamanuiaga” mo ana mamoe. (Esekielu 34:26) E mautinoa le taunuu o lenā folafolaga, ma na e vaai moni i ona faamaoniga.

Seʻi mafaufau i le taimi na e iloaina ai Ieova. O se faaaʻoaʻoga, o ā ni ou faalogona ina ua e aʻoaʻoina upu moni e faatatau i le suafa o le Atua ma lona finagalo mo tagata? Pe e te manatua lou faafouina mai i le aufaatasi ma isi Kerisiano i taimi o fonotaga ma tauaofiaga? I le taimi na e faailoa atu ai le tala lelei i sē na faaalia le fiafia moni, pe e te leʻi foʻi i le fale i lenā aso ma le fiafia ma le faamalieina moni?

E mafai ona e toe maua lenā fiafia. Na tatalo auauna anamua a le Atua: “Ieova e, ia e toe faafoʻi atu i matou iā te oe, ona matou foʻi atu lea ma le lotoatoa. Ia e foaʻi mai ni aso fou mo i matou, e pei o aso anamua.” (Auega 5:21) Na tali Ieova i lenā tatalo, ma na toe foʻi atu ona tagata ma toe auauna iā te ia ma le fiafia. (Neemia 8:17) O le mea foʻi lenā o le a faia e Ieova mo oe.

E ui i lea, e lē faigofie le toe foʻi iā Ieova. Seʻi o tatou iloiloina nisi o luʻi pe a toe foʻi iā Ieova, ma auala e foʻia ai.