A Mekiman gi wi wan kado di e tan fu têgo

YU NO feni en kefalek moi taki a fosi kapitel fu Bijbel e taki fu den sani di sabiman e si leki prenspari sani di de fanowdu fu man tan na libi na tapu wan planeiti? San na den sani disi?

Soleki fa Genesis 1:2 e taki, dan bun furu watra de fanowdu so taki libisani kan tan na libi. A planeiti no musu kowru tumusi èn a no musu waran tumusi so taki watra kan de na tapu. Fu dati ede a planeiti no musu de tumusi fara èn a no musu de tumusi krosibei fu a son fu en. A tori fu Genesis e taki furu leisi fu a son èn fu a krakti di a son abi tapu grontapu.

Wan planeiti musu abi spesrutu sortu gas na ini a loktu fu en so taki libisma man libi na tapu. Genesis 1:6-8 e taki fu a tumusi prenspari sani disi. Den prani di e gro na tapu a planeiti, soleki fa Genesis 1:11, 12 e taki, e meki taki bun furu zuurstof de. Soleki fa Genesis 1:9-12 e taki, dan wan planeiti musu abi bigi pisi drei gron pe prani man gro bun, so taki furu difrenti sortu meti man libi na tapu. Te fu kaba, a planeiti musu tan tanapu na a yoisti fasi so taki a no e kowru èn a no e waran tumusi. A krakti di a mun abi, e yepi tu fu meki taki grontapu e tan tanapu na a yoisti fasi. Genesis 1:14, 16 e taki fu a mun disi èn a e taki fu wan tu tra sani di a mun e du.

Fa na owruten skrifiman Moses ben man poti prakseri na den sani di kari na fesi, sondro taki a ben abi sabi fu sabidensi tori? A de so taki Moses ben abi a koni fu frustan o prenspari den sani disi de, aladi den sma fu a ten fu en no ben abi a koni dati? We, fu taki en leti, na a Mekiman fu hemel nanga grontapu meki Moses skrifi den sani dati. A sani disi prenspari srefisrefi, te wi e luku fa a tori fu Genesis e kruderi nanga san sabiman e taki.

Bijbel e taki dati den wondru sani di wi e si na ini na universum na wi lontu, meki nanga wan marki. Psalm 115:16 e taki: „Den hemel na fu Yehovah, ma grontapu a gi na den manpikin fu libisma.” Wan tra psalm e taki: „A seti grontapu na tapu den fasti presi fu en; te ten di no skotu, noso fu têgo, a no sa degedege” (Psalm 104:5). Efu na wan Mekiman meki na universum nanga a tumusi moi planeiti fu wi, dan a no de fu taki dati wi kan bribi taki a man sorgu taki den sani disi e tan fu têgo. Disi wani taki dati yu kan abi ala frutrow taki a tumusi moi pramisi disi sa kon tru: „Den regtfardikisma srefi sa abi grontapu leki a gudu fu den, èn den sa libi na tapu fu têgo” (Psalm 37:29). A de sondro tweifri taki Gado „no meki [grontapu] fu soso”, ma a „ben seti en fu sma libi na tapu” fu têgo. Iya, Gado ben meki a grontapu disi gi sma di abi warderi gi den sani di a e du.—Yesaya 45:18.

Soleki fa den Buku fu Bijbel e sori, dan Yesus ben kon na grontapu fu gi wi leri fu Gado èn fu a prakseri di Gado abi fu gi têgo libi na den sma di e gi yesi na en (Yohanes 3:16). Wi e kisi a dyaranti taki heri esi Gado sa „tyari wan pori kon na tapu den wan di e pori grontapu”, aladi safri-atisma di komoto fu ala kondre e kisi frulusu fu di den e warderi den sani di a seti fu kisi frulusu (Openbaring 7:9, 14; 11:18). A libi o switi srefisrefi te libisma sa kon sabi moro nanga moro fu den tumusi moi sani di Gado meki, èn den sa nyan bun fu den sani dati fu têgo!—Preikiman 3:11; Romesma 8:21.

[Sma di abi a reti fu a prenki na tapu bladzijde 8]

NASA photo