Tra fasi leki iniwan libisma, Yesus ben e libi leki wan yeye na ini hemel bifo a gebore na grontapu (Yohanes 8:23). Yesus na a fosi sma di Gado meki èn nanga yepi fu en, Gado meki ala tra sani. En na a wan-enkri sma di Yehovah meki langalanga sondro fu wan tra sma yepi en èn fu dati ede Bijbel e kari en „a wan-enkri” Manpikin fu Gado. Yesus ben de leki a sma di e taki gi Gado, èn fu dati ede Bijbel e kari en „a Wortu”.​—Yohanes 1:1-3, 14; leisi Odo 8:22, 23, 30; Kolosesma 1:15, 16.

Gado ben seni en Manpikin kon na grontapu fu di a teki a libi fu en Manpikin na ini hemel, èn a poti en na ini a muru fu wan Dyu nyunwenke di ben nen Maria. Sobun, Yesus no ben abi wan libisma papa (Lukas 1:30-35). Yesus ben kon na grontapu (1) fu leri sma den tru tori fu Gado, (2) fu gi sma na eksempre fa fu du a wani fu Gado, èn (3) fu gi a libi fu en di ben de sondro sondu, leki „wan lusu-paiman”.​—Leisi Mateyus 20:28; Yohanes 18:37.

Wan lusu-paiman na a moni di wan sma e pai fu frulusu wan tra sma fu katibo. Gado no ben abi na prakseri taki libisma kon owru èn taki den dede. Fa wi sabi dati? Gado ben taigi a fosi man, Adam, taki efu a no ben o gi yesi na En, noso efu a ben o sondu soleki fa Bijbel e taki, dan dati ben o meki a dede. Efu Adam no ben sondu, dan a no ben o dede noiti. Aladi Adam dede hondrohondro yari baka di a sondu, toku a bigin dede na a dei di a trangayesi Gado (Genesis 2:16, 17; 5:5). Adam gi ala den bakapikin fu en sondu èn dati tyari dede kon fu di dede na a pai di sma e kisi gi sondu. Na so Adam ’meki dede kon’ na grontapu. Dati meki wi abi wan lusu-paiman fanowdu.​—Leisi Romesma 5:12; 6:23.

Suma ben o man pai a lusu-paiman fu frulusu wi fu dede? Te wi dede, dan wi e pai soso gi wi eigi sondu. Nowan sondu libisma man pai gi den sondu fu trawan.​—Leisi Psalm 49:7-9.

Fu di Yesus en papa no ben de wan libisma, meki a no kisi sondu. Sobun, di a dede, dan a no dede fu di a ben du sondu, ma a dede gi den sondu fu tra sma. Gado seni en Manpikin fu dede gi wi fu di A wani sori wi taki a lobi libisma srefisrefi. Yesus sori lobi gi wi tu fu di a gi yesi na en Papa èn fu di a gi en libi gi den sondu fu wi.​—Leisi Yohanes 3:16; Romesma 5:18, 19.

Yesus ben e dresi siki sma, a ben gi dedesma wan opobaka èn a gi en libi fu frulusu sma fu sondu nanga dede. Na so a sori san a ben o du te fu kaba gi ala libisma di e gi yesi na Gado (Lukas 18:35-42; Yohanes 5:28, 29). Baka di Yesus dede, Gado gi en wan opobaka leki wan yeye (1 Petrus 3:18). Baka dati, Yesus ben e wakti na a reti-anusei fu Gado, teleki Yehovah gi en makti fu tiri leki Kownu fu heri grontapu (Hebrewsma 10:12, 13). Now Yesus e tiri leki Kownu na ini hemel, èn den bakaman fu en na grontapu e meki a bun nyunsu bekènti na heri grontapu.​—Leisi Danièl 7:13, 14; Mateyus 24:14.

Heri esi, Yesus o gebroiki a makti di a abi leki Kownu, fu tyari wan kaba kon na ala pina di sma e pina èn sosrefi na den sma di e pina trawan. Milyunmilyun sma di e poti bribi na ini Yesus èn di e gi yesi na en, o nyan bun fu a libi na ini wan paradijs na grontapu.—Leisi Psalm 37:9-11.