„Wan ten de fu lobi èn wan ten de fu no lobi”

„GADO na lobi.” Na ini son kondre, sma e meki prenki pe den wortu disi skrifi na tapu, èn den e anga den na ini den oso. A tru taki den wortu dati na heri moi wortu di e sori suma na Gado. Iya, en na a moro bun eksempre fu lobi.

Ma furu sma no sabi taki den wortu dati komoto fu Bijbel. Na apostel Yohanes ben skrifi: „A sma di no lobi trawan, no kon sabi Gado, bika Gado na lobi” (1 Yohanes 4:8). Luku san Yohanes ben skrifi tu fu a lobi di Gado abi gi libisma di kan kisi frulusu: „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi.”​—Yohanes 3:16.

Gi son sma, den wortu disi wani taki dati Gado de klariklari ala ten fu gi wi pardon, awansi sortu sondu wi e du. A fasi fa furu sma e libi, e sori taki den e denki taki awinsi fa den e tyari densrefi, Gado no o aksi den frantwortu. Ma a sani dati tru? A de so taki Gado lobi bun sma nanga takru sma? Oiti a e pasa taki Gado no lobi wan sma?

Den sani di Gado lobi èn den sani di a no lobi

A koni Kownu Salomo ben taki a sani disi: „Gi ala sani wan ten de, iya, wan ten de gi ibri sani di sma e du na grontapu . . . wan ten de fu lobi èn wan ten de fu no lobi” (Preikiman 3:1, 8). Soleki fa a gronprakseri disi e sori, dan aladi Gado abi furu lobi nanga switifasi, toku son sani de di a no lobi kwetikweti.

Ma san a wani taki te Bijbel e sori taki wan sma „no lobi” wan sma noso wan sani? Wan buku e taki: „Na ini Bijbel, a wortu di wani taki dati wan sma no lobi wan sma noso wan sani, kan abi fu du nanga difrenti sani. A kan abi fu du nanga a bita-ati di wan sma abi gi wan trawan, èn a sma dati de nomonomo fu du en ogri. Kande a sma di abi bita-ati no o man basi a firi dati moro èn a o suku fu du wan ogri nanga a sma di a no lobi.” Na disi wi e prakseri nofo tron te wi e yere taki wan sma no lobi wan trawan kwetikweti, èn wi e si sortu takru bakapisi a e tyari kon na heri grontapu. Ma a srefi buku e taki moro fara: „’Te wan sma no lobi wan sani kwetikweti’ dan a kan de so tu taki a e teige a sani dati trutru, aladi a no e prakseri fu du a sani dati ogri.”

Na fu a sani dati wi o taki na ini na artikel disi. Te wan sma no lobi wan sani na a fasi disi, dan a e teige a sani dati trutru, ma a no e suku fu du ogri nanga a sani. Yu denki taki Gado e firi so tu? Luku san skrifi na Odo 6:16-19: „Siksi sani de di Yehovah no lobi kwetikweti, iya, seibi sani de di de wan tegu sani gi en. Dati na: sma di e luku na wan heimemre fasi, sma di e lei, sma di e kiri trawan di no du nowan ogri, wan ati di e prakseri fa a kan du trawan ogri, futu di e hasti densrefi fu go du ogri, wan falsi kotoigi di e fruteri soso lei, noso iniwan sma di lobi sutu faya fu meki trobi kon de na mindri brada.”

Soleki fa wi kan si, dan wan tu sani de di Gado no lobi kwetikweti. Ma toku a no abi fu  de so taki a no lobi den sma di e du den sortu sani dati. A e poti prakseri na a situwâsi fu a sma, soleki den swakifasi fu en, a presi pe a e libi, a fasi fa a kweki, èn a sabi di a no ben sabi moro bun (Genesis 8:21; Romesma 5:12). A skrifiman fu Odo e tyari dati kon na krin nanga a moi eksempre disi: „Yehovah e piri-ai gi a sma di a lobi, neleki fa wan papa e du nanga wan manpikin di e gi en prisiri” (Odo 3:12). Te wan pikin trangayesi, dan a kan taki a papa noso mama fu en no lobi den sani di a e du, ma toku a lobi a pikin disi. Dati meki a e gi a pikin trangaleri fu di a wani du ala san a man fu yepi en fu no du den sani dati moro. Fu di Yehovah lobi wi, meki a e du wan srefi sortu sani te howpu de ete gi wan sma di e du sondu.

Te Gado abi leti fu no lobi wan sma

Ma fa a de te wan sma e kon sabi a wani fu Gado ma e weigri fu du dati? We, Gado no o feni a sma dati bun. Te a sma de nomonomo fu du den sani di Yehovah no feni bun, dan Gado no o lobi en. Fu eksempre, Bijbel e taki: „Yehovah srefi e ondrosuku den reti-ati sma nanga den ogri sma èn efu wan sma lobi ogridu, dan Gado no lobi en kwetikweti” (Psalm 11:5). A sma dati di e weigri fu sori berow no sa kisi pardon, soleki fa na apostel Paulus e sori krin na ini a brifi di a skrifi gi den Hebrewsma: „Efu wi tan du sondu fu espresi, baka di wi kon sabi a tru leri finifini kaba, dan nowan srakti-ofrandi no de moro fu tapu den sondu fu wi. Na presi fu dati wi kan fruwakti taki wi o kisi krutu na wan fasi di takru srefisrefi èn taki nanga bigi atibron Gado o kiri den wan di e gens en” (Hebrewsma 10:26, 27). Fu san ede wan Gado fu lobi o du dati?

Te wan sma e du wan seryusu sondu fu espresi, dan a sondu dati kan rutu so dipi na ini en ati taki a sma en ati e kon takru dorodoro. Kande a e du bun bigi sondu, kande a no abi bisi nanga noti, èn kande a e weigri fu kenki. Bijbel e agersi a sma dati nanga wan penitigri di no man kenki den flaka na en skin (Yeremia 13:23). Fu di a sma dati no e sori berow, meki Bijbel e taki dati „a sondu fu en e tan na en tapu fu têgo”, èn a no sa kisi pardon gi dati.​—Markus 3:29.

Na so a ben de nanga Adam nanga Eva, èn nanga Yudas Iskariot. Boiti taki Adam nanga Eva ben meki sondro sondu, Gado ben taigi den krin san den ben musu du, èn den ben frustan bun tu san a ben taigi den. Dati meki a de krin taki den ben sondu fu espresi. Fu dati ede Gado no ben kan gi den pardon gi a sondu di den du. Den sani di Gado taigi den bakaten e sori taki den no ben kisi okasi fu sori berow (Genesis 3:16-24). Yudas ben abi sondu, ma a ben abi furu demakandra nanga Yesus, èn toku a tori en. Yesus srefi ben kari en „a manpikin di o kisi têgo pori” (Yohanes 17:12). Bijbel e sori tu taki Didibri sondu dorodoro èn fu dati ede a  musu kisi pori (1 Yohanes 3:8; Openbaring 12:12). Den sani di den sma disi du meki taki Gado no lobi den kwetikweti.

Ma a e gi deki-ati fu sabi taki a no ala ten te sma sondu, dan dati wani taki dati den no man kenki. Yehovah abi furu pasensi èn a no e angri fu strafu den wan di du sondu fu di den no ben sabi moro bun (Esekièl 33:11). A e gi den deki-ati fu sori berow so taki a kan gi den pardon. Bijbel e taki: „Meki den ogri sma libi den pasi fu den èn meki den sma di e du ogri, puru den takru prakseri fu den na den ede. Meki den drai go baka na Yehovah di o sori den sari-ati. Meki den drai go baka na wi Gado, bika a o gi den pardon nanga en heri ati.”​—Yesaya 55:7.

O ten a fiti fu lobi trawan?

A no de fu taki dati leki sma di e teki na eksempre fu Gado, tru Kresten e frustan o ten a fiti fu lobi trawan èn o ten a no fiti fu du dati. Son leisi den firi fu wi kan meki taki wi no e si krin o ten a fiti fu sori lobi nanga sari-ati gi trawan. Ma den wortu fu a disipel Yudas kan yepi wi fu kon sabi o ten a fiti fu sori sari-ati gi sma di du sondu. Yudas e taki: „Tan sori sari-ati gi trawan, ma unu srefi musu luku bun. Srefi a krosi fu den un musu frede fu fasi, fu di den flaka den krosi nanga a sondu libi fu den” (Yudas 22, 23). Fu dati ede wi no musu lobi den takru sani di a sma e du, aladi dati no wani taki dati wi no musu lobi a sma di e du den sani dati.

Kresten e kisi a rai tu fu sori lobi gi den feanti fu den èn fu dati ede den musu du bun gi den. Yesus ben taki: „Tan lobi un feanti èn tan begi gi den sma di e frufolgu unu” (Mateyus 5:44). Na fu dati ede Yehovah Kotoigi e tan preiki a bun nyunsu fu Gado Kownukondre ibri tron baka gi den birtisma fu den, aladi sonwan fu den no e gi yesi na a boskopu dati (Mateyus 24:14). Fu di Yehovah Kotoigi e si sani soleki fa Bijbel e leri wi, meki den e si ibri sma leki wan sma di kan kisi wini fu a lobi nanga a sari-ati fu Yehovah. Te sma no e warderi a muiti di den Kotoigi e du fu yepi den, te sma no lobi den, noso e frufolgu den srefi, dan den Kotoigi e tan gi yesi na a rai disi di na apostel Paulus e gi: „Tan blesi den sma di e frufolgu unu. Blesi sma, no fluku den . . . Te wan sma du unu wan ogri, un no musu du a sma dati ogri baka” (Romesma 12:14, 17). Den e hori na prakseri taki Yehovah srefi o bosroiti suma a lobi èn suma a no lobi. En na a Krutuman di o bosroiti te fu kaba suma o kisi libi èn suma o dede.​—Hebrewsma 10:30.

Iya, „Gado na lobi”. Dati meki wi musu de nanga tangi gi a lobi di a e sori gi wi, wi musu meki muiti fu kon sabi san na a wani fu en èn wi musu du dati tu. Yehovah Kotoigi na ini a kontren fu yu o breiti fu sori yu na ini yu eigi Bijbel san na a wani fu Gado èn fa yu kan gi yesi na en. Te yu e fiti den sani di yu e leri, dan Gado o lobi yu.

[Prenspari pisi na tapu bladzijde 23]

„Siksi sani de di Yehovah no lobi kwetikweti, iya, seibi sani de di de wan tegu sani gi en. Dati na: sma di e luku na wan heimemre fasi, sma di e lei, sma di e kiri trawan di no du nowan ogri, wan ati di e prakseri fa a kan du trawan ogri, futu di e hasti densrefi fu go du ogri, wan falsi kotoigi di e fruteri soso lei, noso iniwan sma di lobi sutu faya fu meki trobi kon de na mindri brada.”​—ODO 6:16-19

[Prenspari pisi na tapu bladzijde 24]

„Efu wi tan du sondu fu espresi, baka di wi kon sabi a tru leri finifini kaba, dan nowan srakti-ofrandi no de moro fu tapu den sondu fu wi. Na presi fu dati wi kan fruwakti taki wi o kisi krutu na wan fasi di takru srefisrefi.”​—HEBREWSMA 10:26, 27

[Prenspari pisi na tapu bladzijde 25]

„Meki den ogri sma libi den pasi fu den èn meki den sma di e du ogri, puru den takru prakseri fu den na den ede. Meki den drai go baka na Yehovah di o sori den sari-ati . . . A o gi den pardon nanga en heri ati.”​—YESAYA 55:7

[Prenki na tapu bladzijde 24]

Wan lobi-ati papa noso mama e gi en pikin trangaleri fu yepi en

[Prenki na tapu bladzijde 25]

Furu sma na strafu-oso kisi wini fu a lobi nanga a sari-ati fu Gado