▪ Wan fu den wèt di Gado gi den Israelsma ben abi fu du nanga den trakondre sma na den lontu. A ben taigi en pipel: „Un no musu trow nanga den. No meki den umapikin fu unu trow nanga den manpikin fu den, èn no meki den manpikin fu unu trow nanga den umapikin fu den” (Deuteronomium 7:3, 4). Fu san ede a ben gi den a wèt dati?

Yehovah ben sabi taki Satan ben wani meki a pipel fu En go anbegi falsi gado fu pori a denki fu den. Dati meki Gado warskow en pipel taki sma di no de na bribi ben ’o meki den pikin fu den drai baka gi Gado èn den ben o go dini tra gado’. Disi ben de wan seryusu warskow. Efu den Israelsma ben o dini tra gado, dan Yehovah no ben o feni den bun moro èn a no ben o kibri den moro. Na so feanti ben o man kiri den makriki. Efu dati ben de so, dan fa a pramisi Mesias ben o gebore leki bakapikin fu den Israelsma? A de krin taki Satan ben sabi fu san ede a ben wani kori den Israelsma fu trow nanga sma di no ben dini Yehovah.

Memre tu taki Gado ben lobi ibriwan fu den Israelsma. A ben sabi taki efu den ben o abi wan bun matifasi nanga en, dan ibriwan fu den ben kan de koloku èn sani ben kan go bun nanga den. Yehovah ben abi leti di a ben taki dati wan trowpatna di no de na bribi kan hari a tra patna puru fu a tru anbegi? Luku na eksempre fu Kownu Salomo. A ben sabi taki Yehovah ben warskow en pipel gi wefi di no de na bribi. Gado ben taki: „Den o meki unu anbegi den gado fu den.” Kande a ben de so taki fu di Salomo ben de wan kefalek koniman, meki a ben kisi a firi taki a no ben abi a rai fu Gado fanowdu. A no ben arki a rai. San ben de a bakapisi? „Te fu kaba den uma disi meki taki Salomo go anbegi . . . tra gado.” Disi ben de wan sari sani trutru. Yehovah no ben feni Salomo bun moro èn a pipel kon prati fu di den ben trangayesi Gado.​—1 Kownu 11:2-4, 9-13.

Son sma kan taki dati a no e pasa so ala ten. Fu eksempre na Israel man Maklon ben trow nanga Rut, wan Moab uma di ben kon bribi tranga na ini Yehovah. Ma a no ben de wan bun sani fu trow nanga wan Moab uma. Bijbel no e prèise Maklon taki a trow nanga wan Moab uma. A dede yonguyongu, kande srefi fosi Rut kari Yehovah en Gado. Maklon en brada Kilion trow nanga Orpa di ben de wan Moab uma tu. Orpa tan dini „den gado fu en”. Ma Boas no du leki Maklon nanga Kilion. A trow nanga Rut wan pisi ten, baka di na uma disi tron wan bribiman. Bakaten den Dyu ben si en leki wan sma di teki a Dyu bribi nanga en heri ati. Rut nanga Boas kisi furu blesi di den trow.​—Rut 1:4, 5, 15-17; 4:13-17.

A ben o bun dan fu taki dati na eksempre fu Maklon nanga Rut no e kruderi nanga den rai fu Yehovah fu trow soso nanga sma di de na bribi? Iya, yu denki taki te wan man di lobi dòbel, wini wan bigi moni, dan yu kan taki dati dòbel na wan bun fasi fu sorgu yusrefi?

Bijbel e gi Kresten na ini a ten disi deki-ati fu trow „soso nanga wan sma di de wan bakaman fu Masra”. A e warskow wi fu „no kon de wán nanga sma di no de na bribi”. A rai disi de spesrutu gi tru Kresten di e suku wan trowpatna. Gi den wan di trow kaba nanga wan sma di no de na bribi, Bijbel e gi rai di kan yepi den, so taki den kan sabi san den musu du te problema miti den na ini a trowlibi (1 Korentesma 7:12-16, 39; 2 Korentesma 6:14). A rai disi e sori taki Yehovah Gado, a sma di seti a trowlibi, wani taki wi musu de koloku leki anbegiman fu en, awinsi wi trow noso awinsi wi no trow.