KON meki wi taki dati yu abi wan mati di yu lobi srefisrefi, ma a e du wan sani di yu no man frustan. Tra sma e krutu yu mati fu a sani dati èn den e taki dati a abi ogri-ati. Yu ben o de gaw fu agri nanga den, noso yu ben o wakti teleki yu mati srefi fruteri yu san pasa? Efu a no ben de drape fu fruteri yu san pasa, dan yu ben o wakti teleki ensrefi fruteri yu?

Fosi yu ben o taki wan sani, yu ben o wani sabi moro fini san pasa. Kande yu ben o aksi yusrefi: ’O bun mi sabi a mati disi èn fu san ede mi lobi en?’ Yu abi leti fu aksi yusrefi den sani disi. Ma luku a tori disi: A no so wi musu luku a tori tu te wi e aksi wisrefi efu Gado abi ogri-ati?

Kande yu no man frustan wan tu fu den sani di Gado du, noso kande yu no e frustan fu san ede a gi pasi taki son sani pasa. Furu sma de di o taigi yu taki Gado abi ogri-ati èn den o gi yu deki-ati fu krutu en na a fasi fa den e krutu en. Fu san ede yu no e kon sabi en moro bun fosi yu bigin denki takru fu en? Aksi yusrefi: ’Sortu mati Gado de gi mi?’

Efu yu abi wan muilek libi, dan kande yu sa taki dati Gado no ben de wan mati gi yu kwetikweti. Ma denki a tori. Gi sortu sani na ini yu libi Gado de frantwortu? Gi den problema noso gi den blesi? Soleki fa wi si, dan na Satan na „a tiriman fu a grontapu disi”, a no Yehovah (Yohanes 12:31). Sobun, na Satan de frantwortu gi ala a sari nanga kruktudu na grontapu. Yu no e agri tu taki wi eigi swakifasi nanga den sani di e pasa sondro taki wi fruwakti dati, e tyari furu problema kon gi wi?

Ma gi sortu sani Gado de frantwortu? Luku san Bijbel e taki: Gado na „a Mekiman fu hemel nanga grontapu”. Den sani di a meki, sosrefi a skin fu wi, meki na „wan tumusi wondru fasi”, èn Yehovah na „a Gado di e meki taki yu man hari bro” (Psalm 124:8; 139:14; Danièl 5:23). San ala den sani dati wani taki?

Den sani disi e sori taki wi de na libi fu di wi Mekiman gi wi libi (Tori fu den apostel 17:28). Sobun, a libi di wi kisi na wan kado fu Gado. Sosrefi a moi grontapu na wi lontu, a wini di wi e kisi fu den lobiwan nanga den mati fu wi, a prisiri di wi e kisi fu di wi man tesi sani, fasi sani, yere sani, èn smeri sani, iya, ala den sani disi wi kisi fu En (Yakobus 1:17). Yu no e agri taki den blesi disi e sori taki a de wan Mati di wi kan lespeki èn frutrow na tapu?

Kande yu feni en muilek fu frutrow tapu Gado. Kande yu feni taki yu no sabi en so bun ete fu man frutrow na en tapu. Wi kan frustan dati. Na ini den syatu artikel disi, wi no man taki fu ala den sani di e meki taki son sma e krutu Gado taki a abi ogri-ati. Ma yu no denki taki a ben o abi wini efu yu ben o kon sabi Gado moro bun? * Te yu e du dati, dan wi de seiker taki yu o kon sabi den tru tori fu Gado. A abi ogri-ati trutru? Kwetikweti. Bijbel e taki: „Gado na lobi.”—1 Yohanes 4:8.