Yehovah Kotoigi no e hori friyaridei fu di den e bribi taki Gado no feni den fesa disi bun. Aladi Bijbel no e taki spesrutu dati wi no musu hori friyaridei, toku a e sori wi prenspari sani di e yepi wi fu frustan fa Gado e denki fu friyaridei. Luku fo prenspari sani nanga Bijbel gronprakseri di kan yepi wi.

1. Friyaridei bigin na sma di ben e anbegi falsi gado. Wan buku e taki dati friyaridei fesa komopo fu sma di ben e bribi taki ogri yeye ben abi na okasi fu du ogri nanga wan sma tapu en friyaridei èn taki den mati fu a sma makandra nanga den bun sani di den ben o winsi en, ben o kibri a sma gi den ogri yeye (Standard Dictionary of Folklore, Mythology, and Legend). Wan tra buku e taki dati na ini owruten a ben prenspari fu sabi sortu dei wan sma gebore fu kan sabi en horoskoop fu di sma ben gwenti luku den stari fu sabi san o pasa nanga a sma. A buku e taki tu dati furu sma ben e bribi tu taki den kandra di den e gebroiki tapu friyaridei ben meki spesrutu fu winsi bun sani gi a sma di friyari (The Lore of Birthdays).

   Bijbel e krutu sma di e go na bonuman nanga lukuman, sma di e du afkodrei noso „tra sani leki den sortu sani disi” (Deuteronomium 18:14; Galasiasma 5:19-21). Fu taki en leti, wan reide fu san ede Gado ben krutu den sma fu owruten Babilon ben de taki den sma dati ben gwenti luku den stari fu sabi san o pasa (Yesaya 47:11-15). Yehovah Kotoigi no e go ondrosuku ala pikinpikin sani fu sabi pe den gwenti di sma abi komopo, ma te Bijbel e sori krin fa Gado e si wan gwenti dan den no e tapu den ai gi dati.

2. Den fosi Kresten no ben e hori friyaridei. Wan buku e taki dati den fosi Kresten „ben e si friyaridei leki wan gwenti fu sma di ben e anbegi falsi gado” (The World Book Encyclopedia). Bijbel e sori taki den apostel nanga tra sma di Yesus ben gi leri ben libi wan eksempre gi ala Kresten so taki den ben o sabi fa den musu tyari densrefi.​—2 Tesalonikasma 3:6.

3. A wan-enkri sani di Kresten musu memre no abi fu du nanga a dei di wan sma gebore, ma nanga a dei di Yesus dede (Lukas 22:17-20). A sani disi no e fruwondru wi, fu di Bijbel e taki dati „a dei di wan sma dede, bun moro a dei di wan sma gebore” (Preikiman 7:1). Na a kaba fu Yesus en libi na grontapu Gado ben prisiri nanga en, èn na so a dei di Yesus dede ben prenspari moro a dei di a gebore.​—Hebrewsma 1:4.

4. Na nowan presi na ini Bijbel wi e leisi taki wan anbegiman fu Gado ben hori friyaridei. Disi a no wan gewoon sani, fu di Bijbel e taki fu tu friyaridei fu sma di no ben de anbegiman fu Gado. Èn tapu den tu friyaridei disi sma ben du sani di no bun.​—Genesis 40:20-22; Markus 6:21-29.

Neleki ala tra papa nanga mama, Yehovah Kotoigi e sori den pikin taki den lobi den a heri yari, den e gi den kado tu èn den e du prisiri sani nanga den makandra nanga trawan. Den e teki a moi eksempre fu Gado. Gado no e suku wan spesrutu dei fu gi en pikin bun sani (Mateyus 7:11). Den pikin fu Yehovah Kotoigi no e firi leki den e misi wan sani. Luku san wan tu fu den taki:

• „Mi e moro prisiri te mi kisi wan kado na wan dei di mi no ben fruwakti en srefisrefi.”​—Tammy, 12 yari

• „Aladi mi no e kisi kado tapu mi friyaridei, toku mi papa nanga mama e bai kado gi mi tapu tra dei ini a yari. Mi lobi en so, fu di mi no e fruwakti en.”​—Gregory, 11 yari

• „Efu yu denki taki yu hori wan fesa te yu nyan wan tu kuku èn yu singi wan singi wan tin miniti so, dan yu musu kon na mi oso. Dan fosi yu o si san na wan echte fesa!”​—Eric, 6 yari