Njengobe siBoFakazi BaJehova, siyakutsandza kucoca nalabanye bantfu ngetindzaba tekukholwa, kodvwa asitihlanganisi naletinye tinkholo letikholelwa kulokwehlukile kuloko lesikukholelwako kuze sikhonte kanye nato. LiBhayibheli liveta kutsi emaKhristu eliciniso ‘ahlanganiswe ngekuvumelana,’ futsi lokubalulekile kulokuvumelana kutsi sibe nebunye etintfweni lesitikholelwako. (Kubase-Efesu 4:16; 1 KubaseKhorinte 1:10; KubaseFiliphi 2:2) Loku kusho lokungetulu kwekumane nje sivumelane ngebuntfu lobunjengelutsandvo, luvelo kanye nekutsetselela. Lesikukholelwako kusekelwe elwatini lolunembile loluvela eBhayibhelini, loko kukholwa kwetfu lebekutawuba lite kube besite lona.​—KubaseRoma 10:2, 3.

 LiBhayibheli lifananisa kukhonta ndzawonye kwebantfu labakholelwa tintfo letingafani nekuboshelwa ejokeni kwetilwane letingafani futsi lokungalimata kukholwa kwemKhristu. (2 KubaseKhorinte 6:14-17) Kungako Jesu angazange avumele bafundzi bakhe kutsi batihlanganise naletinye tinkholo. (Matewu 12:30; Johane 14:6) Ngendlela lefanako, uMtsetfo Nkulunkulu lawuniketa ema-Israyeli asebentisa Mosi wawalela ema-Israyeli asendvulo kutsi atihlanganise ekukhonteni netive letibomakhelwane. (Eksodusi 34:11-14) Ngekuhamba kwesikhatsi ema-Israyeli letsembekile awazange aluvume lusito lebelutawenta kutsi atihlanganise naletinye tinkholo.​—Ezra 4:1-3.

 Yebo. Ecinisweni, 2022 sacitsa ema-awa 1 501 797 703 sicoca nebantfu labakuletinye tinkholo. Njengemphostoli Pawula, sifuna kucondza indlela bantfu “labanyenti” labacabanga ngayo kanye naloko labakukholelwako nasenta umsebenti wekushumayela. (1 KubaseKhorinte 9:19-22) Nasicoca nabo, sizama ngebucotfo kusebentisa seluleko seliBhayibheli ‘sekubahlonipha kakhulu.’​—1 Phetro 3:15.