LIVANGELI laMatewu litsi: “Jesu wangena ethempelini wacosha bonkhe lebebatsengisa nalabebatsenga, waketula nematafula alabo lebebantjintja timali kanye netitulo talabo lebebatsengisa ematuba. Wase utsi kubo: “Kubhaliwe kutsi: ‘Indlu yami kutawutsiwa yindlu yemthantazo,’ kodvwa nine niyenta umhume wetigelekece.’”​—Mat. 21:12, 13.

Ngekusho kwemlandvo wemaJuda, labatsengisi basethempelini bebadoja emakhasimende abo ngekutsi bababite imali lesetulu kakhulu. Sibonelo saloku kutsi iMishnah (Keritot 1:7) yabika kutsi ngelikhulu lekucala intsengo yemavukutfu lamabili ekwenta umnikelo yakhula yaba ngudenariyu weligolide. Lentsengo beyilingana nemholo wesisebenti lesivamile wemalanga langu-25. Emavukutfu noma ematuba bekamukelekile kutsi bantfu labaphuyile bebanganikela ngawo, kodvwa lentsengo yato letinyoni beseyibita kakhulu. (Lev. 1:14; 5:7; 12:6-8) Rabi longuSimeon ben Gamaliel atfukutseliswe ngulesento, wanciphisa linani lemihlatjelo lobekufanele yentiwe, lokwenta kutsi intsengo yalamavukutfu lamabili yehle kakhulu, kangangekutsi sisebenti lesivamile besekudzingeka sisebente ema-awa lamatsatfu nje kuphela kute sikhone kuwatsenga.

Ngesizatfu saloku lesisandza kukusho, bekufanele kutsi Jesu abite labatsengisi basethempelini ngekutsi “tigelekece” ngobe bebadoja bantfu futsi baticabangela bona.