1. Yini leyenta umshayeli wendiza ayihlolisise ngembikwekutsi ihambe?

BASHAYELI betindiza letisezingeni lelisetulu, bahlolisisa tintfo letingetulu kwa-30 kuyo ngembikwekutsi indiza labayishayelako ihambe. Nabangatihlolisisi letintfo ngembikwekutsi indiza ihambe, ayakhula ematfuba ekutsi itfole ingoti. Uyati yini kutsi ngumshayeli lonjani lokhutsatwa kutsi ngaso sonkhe sikhatsi ente loluhlolo kulendiza? Ngumshayeli losanesikhatsi lesidze ashayela. Lomshayeli losanesikhatsi lesidze ashayela angase atetsembe kakhulu bese angasalwenti kahle loluhlolo kulendiza.

2. Ngukuphi kutihlola emaKhristu lakhutsatwa kutsi akwente?

² Njengemshayeli wendiza locinisekako kutsi iphephile, nawe ungatihlola kute uciniseke kutsi kukholwa kwakho akutsikameteki ngesikhatsi lokudzinga ngaso. Ngisho nobe usandza kubhajatiswa nobe sewuneminyaka leminyenti ukhonta Nkulunkulu, kuchubeka uhlola kukholwa nekutinikela kwakho kuNkulunkulu Jehova kubalulekile. Nawehluleka kukuhlola loku ngekucophelela kungenteka bonakale buhlobo bakho naNkulunkulu. LiBhayibheli liyasiyala: “Lotsi umile, akacaphele kutsi angawi.”—1 Khor. 10:12.

3. EmaKhristu aseGalathiya bekudzingeka enteni?

³ EmaKhristu aseGalathiya bekudzingeka ahlole kutsi kujule kangakanani kukholwa kwawo futsi akujabulele kukhonta Nkulunkulu. Ngemhlatjelo wakhe, Jesu wavula indlela yalabo lababonisa kukholwa kuye kutsi bati Nkulunkulu ngendlela lebanti—bebangaba ngemadvodzana aNkulunkulu. (Gal. 4:9) Kute babe kulobo budlelwane lobubusisekile, baseGalathiya bekufanele batale timfundziso temaJuda labetitjela kutsi agcina uMtsetfo waMosi. BeTive labebangakasoki labebasemabandleni bebangazange babe ngephansi kweMtsetfo. EmaJuda nebeTive bekudzingeka batfutfukise indlela yekukhonta Nkulunkulu. Loku bekufaka ekhatsi kwati  kutsi angeke kusatsiwa balungile ngekugcina uMtsetfo waMosi.

4, 5. Ngusiphi seluleko Pawula lasiniketa baseGalathiya, futsi sibaluleke ngani kitsi?

⁴ Seluleko semphostoli Pawula lesiya kubaseGalathiya sasibhalelwe injongo: kute sivikele emaKhristu eliciniso angashiyi umcebo wemaciniso laseBhayibhelini bese abuyela etintfweni labekatenta esikhatsini lesendlulile. Jehova waphefumulela lomphostoli kutsi angagcini ngekukhutsata labo labasemabandleni aseGalathiya kuphela, kodvwa akhutsate bonkhe bakhulekeli baKhe kute bahlale bacinile.

⁵ Sonkhe senta kahle ngekukhumbula kutsi sakhululeka njani ebugcilini bekungamati Nkulunkulu saba boFakazi BaJehova. Kute sikwente ngemphumelelo loko, ase sicabangele nayi imibuto lemibili: Usatikhumbula yini tinyatselo lowatitsatsa kute kukufanele kubhajatiswa? Usakhumbula yini kutsi wamati njani Nkulunkulu futsi watiwa nguYe, wase ujabulela kuba sikhonti sakhe?

6. Ngukuphi kutihlola lesitawucoca ngako?

⁶ Sonkhe kwadzingeka kutsi sitsatse tinyatselo letiyimfica. Leto tinyatselo, letifanana nekuhlola simo sebuhlobo betfu naNkulunkulu, tibhalwe ebhokisini lelinesihloko lesitsi  “Tinyatselo Letenta Ulungele Kubhajatiswa Nekuchubeka Utfutfuka.” Kuchubeka sitikhumbuta ngaletinyatselo letiyimfica kutawusicinisa kutsi singagucuki sente tintfo talelive. Njengemshayeli wendiza losanesikhatsi lesidze ashayela, luhambo lwakhe luyaphepha ngesizatfu sekutsi ucale ayihlole ngembikwekutsi ihambe, ngako-ke, nawe utawusitwa kutsi uchubeke ukhonta Nkulunkulu ngekwetsembeka ngekutsi utihlole kutsi bunjani buhlobo bakho naye.

7. Ngusiphi simiso lokufanele sisilandzele, futsi yini lesenta sisilandzele?

⁷ Tintfo lokufanele tihlolwe ngumshayeli wendiza tiyamkhumbuta kutsi kunendlela lokufanele ayilandzele ngekucophelela ngembikwekutsi indiza ihambe. Natsi sidzinga kutihlola ngaso sonkhe sikhatsi, sihlole nendlela lebesisolo sihamba kuyo kusukela sabhajatiswa. Pawula wabhalela Thimothi watsi: “Hamba ngekukholwa nangelutsandvo lolukuKhristu Jesu. Ulandzele etinyatselweni temavi lacinile lengakufundzisa wona.” (2 Thim. 1:13) ‘Lamavi laphilile’ atfolakala eVini laNkulunkulu. (1 Thim. 6:3) Njengobe umdvwebo wemdvwebi lonelikhono usikhombisa sitfombe saloko lakudvwebile, ‘simiso seliciniso’ singasisita sicondze futsi sente loko Jehova lakufuna kitsi. Ngako-ke, nyalo asihlole tinyatselo letasenta salungela kubhajatiswa kute sibone kutsi sisilandzela ngelizinga lelingakanani simiso seliciniso.

8, 9. (a) Yini leyenta kubaluleke kuchubeka sikhula elwatini nasekukholweni? (b) Fanekisa kutsi kubaluleke ngani kuchubeka sikhula ebuhlotjeni betfu naNkulunkulu nekutsi yini lekwenta loko kube yintfo lechubekako.

⁸ Intfo yekucala lokufanele siyihlole sidzingo sekungenisa lwati. Ngemuva kwaloko, sitawuba nekukholwa. Kodvwa kufanele sichubeke sikhula kuko kokubili loku. (2 Thes. 1:3) Kukhula kuhlanganisa kwenta tingucuko letinyenti. ‘Kukhula’ kusho kutfutfuka. Ngako-ke, nasesibhajatisiwe kudzingeka sichubeke sitfutfukisa buhlobo betfu naNkulunkulu kute kukhula kwetfu kungemi ndzawonye.

⁹ Singafananisa kukhula kwebuhlobo betfu naNkulunkulu nekukhula kwesihlahla. Sihlahla singase sikhule kakhulu ngalokuvamile nangabe timphandze taso tingene tajula emhlabatsini. Nasi sibonelo: Leminye imisedari yaseLebanoni ingakhula ibe ngemamitha langu-37, ibe netimphandze leticinile letingene tajula emhlabatsini bese iba nesicu lesingemamitha langu-12. (Ngo. 5:15) Ekucaleni sihlahla sikhula masinyane, ngemuva kwaloko bese sikhula kancane kancane kodvwa kunganakeki. Umnyaka nemnyaka, sicu saso siyandza  netimphandze taso tingena tijule emhlabatsini tiphindze tisabalale, tente lesihlahla sisime kahle. Kungashiwo lokufanako ngekukhula kwemKhristu ebuhlotjeni bakhe naNkulunkulu. Singase sikhule masinyane ebuhlotjeni betfu naye nasisafundzelwa liBhayibheli sidzimate sibhajatiswe. Labo labasebandleni, ngenjabulo bangayicaphela intfutfuko lesiyentako. Kungase kusifanele kuba ngemahlahlandlela nobe sente leminye imisebenti ebandleni. Ngemuva kweminyaka letsite, kukhula ebuhlotjeni betfu naNkulunkulu kungase kunganakeki kangako. Nobe kunjalo, sisuke sisadzinga kutfutfuka ekukholweni naselwatini site sifinyelele “ebudvodzeni lobuphelele kuKhristu.” (Ef. 4:13) Kuba shengatsi siyakhula kusukela ekuhlumeni sidzimate sibe ngemaKhristu lavutsiwe, sifanane nesihlahla lesikhule kahle.

10. Yini leyenta kukhula kubaluleke ngisho nakumaKhristu lavutsiwe?

¹⁰ Kodvwa intfutfuko yetfu akukafaneli igcine lapho. Lwati lwetfu kufanele lukhule nekukholwa kwetfu kufanele kujule. Nasenta njalo sitawungena sijule emhlabatsini loliVi laNkulunkulu. (Taga 12:3) Ebandleni lebuKhristu, banyenti bazalwane nabodzadze labente njalo. Sibonelo saloku kutsi lomunye umzalwane losabe ngulomdzala iminyaka lengetulu kwa-30 watsi solo uyakhula ebuhlotjeni bakhe naNkulunkulu. Watsi: “Kujabulela kwami liBhayibheli kukhule kakhulu. Ngitfola ematfuba lamanyenti ekusebentisa timiso teliBhayibheli nemitsetfo yalo ngetindlela letinyenti. Kujabulela kwami umsebenti wekushumayela nako kuyachubeka kukhula.”

11. Singamati njani Jehova kancono njengobe sikhatsi sichubeka?

¹¹ Kukhula kwetfu kuhlanganisa nekutsi sisondzele kuJehova longuMngani neYise wetfu. Ufuna sitive semukelekile kuye. Ufuna sati kutsi siyatsandvwa futsi sivikelekile njengobe nemntfwana ativa atsandvwa futsi avikelekile nakaphetfwe ngumtali wakhe lonakekelako, nobe ngendlela lesitiva ngayo nasinemngani weliciniso lesimetsembako. Njengobe ubujabulela bungani lobunjalo, budlelwane betfu naJehova abumane nje bakheke ngesikhatsi lesincane. Kudzingeka kwendlule sikhatsi lesitsite kute sikwati kumati siphindze simtsandze. Ngako-ke, kute sati Jehova kahle kufanele sitimisele kutinika sikhatsi sekufundza liVi lakhe onkhe emalanga. Kufanele futsi sifundze bomagazini be-Sicongosekulindza ne-“Phaphama!” naletinye tincwadzi letisekelwe eBhayibhelini.

12. Yini ledzingekako kitsi kute satiwe nguJehova?

¹² Bangani baNkulunkulu bayakhula ebuhlotjeni babo naye ngekutsi bathantaze  futsi babe nebudlelwane lobuhle. (Fundza Malakhi 3:16.) ‘Tindlebe taJehova tiyayiva imithantazo yabo.’ (1 Phet. 3:12) Njengemtali lonelutsandvo, Jehova uyayilalelisisa imithantazo yetfu nasicela kuye lusito. Kungako-ke kudzingeka kutsi ‘sicinisele njalo emthandazweni.’ (Rom. 12:12) Angeke sihlale singemaKhristu lavutsiwe ngaphandle kwelusito lwaNkulunkulu. Tinkinga letikulelive lelibuswa nguSathane angeke sikhone kulwisana nato ngemandla etfu. Nangabe singathantazi njalo, sitinciphisela ematfuba ekutsi Nkulunkulu asinikete emandla lanesifiso sekusiniketa wona. Uyenetiseka yini ngemithantazo yakho, nobe ubona kunesidzingo sekuyitfutfukisa?—Jer. 16:19.

13. Yini leyenta kutihlanganisa nalamanye emaKhristu kube yintfo lebalulekile kute ukhule ebuhlotjeni bakho naNkulunkulu?

¹³ Jehova uyabajabulela bonkhe “labakhosela kuye”; kungako-ke, ngisho sesimati, sifuna kuchubeka sitihlanganisa nelibandla lebantfu labamatiko. (Nah. 1:7) Eveni leligcwele kudvumateka, senta kahle ngekutsi sitihlanganise nebazalwane betfu nabodzadze labatasikhutsata. Iyini imiphumela yekwenta njalo? Ebandleni utawutfola bantfu labatakukhutsata “elutsandvweni nasemisebentini lemihle.” (Heb. 10:24, 25) Lutsandvo Pawula labhala ngalo nakakhuluma nebaseHebheru belusho kutsi babe nebudlelwane nalamanye emaKhristu, babe nebunye njengetikhonti taNkulunkulu ebandleni. Kukhombisa lutsandvo lolunjalo kufaka ekhatsi kucocisana nalamanye emaKhristu. Bani khona njalo emihlanganweni yelibandla uphindze uhlanganyele kuyo ngekutsi uphendvule.

14. Yini leyenta kuphendvuka nekugucuka kube tintfo lokufanele utente ngalokuchubekako?

¹⁴ Kute ube ngumKhristu kudzingeka kutsi uphendvuke futsi ugucuke, nobe utishiye tono lobowutenta. Nobe kunjalo, kuphendvuka, kuyintfo lechubekako. Njengobe sibantfu labanesono, sinesono lesikitsi lesifanana nenyoka letigocile lelungele kuluma. (Rom. 3:9, 10; 6:12-14) Asihlale sivule emehlo, singatitseli ngalabandzako bese asisawanaki emaphutsa etfu. Siyajabula kwati kutsi Jehova uyasibeketelela njengobe sitimisela kulwisana nebutsakatsaka betfu futsi senta lushintjo loludzingekako. (Fil. 2:12; 2 Phet. 3:9) Singatfola lusito ngekutsi sitigadze endleleni lesisebentisa ngayo sikhatsi setfu netintfo tetfu, sikubalekele kugijimisa tifiso tetfu. Lomunye dzadze wabhala: “Ngakhuliswa emndenini waboFakazi, nobe kunjalo, ngakhula nginembono lowehlukile ngaJehova kunalebengihlala nabo. Ngangifundziswe kutsi kufanele esatjwe, futsi bengitiva shengatsi angeke ngikhone kumjabulisa.” Ngekuhamba kwesikhatsi, lodzadze watikhandza asaphelelwe buhlobo naNkulunkulu ngesizatfu semaphutsa lamanyenti lawenta. Uchubeka atsi: “Loku bekungabangelwa kutsi bengingamtsandzi Jehova, kodvwa bekubangelwa kutsi bengingakamati kahle. Nobe kunjalo, ngemuva kwemithantazo leminyenti lejulile, ngacala kushintja. Ngabona kutsi Jehova uyangihola njengemntfwanakhe, uyangisita kutsi ngilwisane netinkinga lengibhekana nato, uyangikhatsalela futsi uyangikhombisa loko lokufanele ngikwente.”

15. Yini Jesu kanye neYise labayibonako?

¹⁵ ‘Tjelani bantfu bonkhe’ ngetindzaba letimnandzi. Ingilosi yaNkulunkulu yasho lamavi kuPhetro nakulabanye baphostoli ngemuva kwekuba bakhululwe ngalokusimangaliso ejele. (Imis. 5:19-21) Kuba khona maviki onkhe emsebentini wekushumayela ngulesinye sici lokufanele sitihlole kuso. Jesu kanye neYise bayakunaka kukholwa kwetfu naloko lesikwentako emsebentini wetfu wekushumayela. (Semb. 2:19) Kunjengobe lona lomdzala lokukhulunywe ngaye etigabeni letendlulile asho kutsi: “Umsebenti wekushumayela uyincenye yekuphila kwetfu.”

16. Yini leyenta kubaluleke kucabanga ngekutinikela kwakho kuJehova?

¹⁶ Cabanga ngekutinikela kwakho. Intfo leligugu kakhulu lesinayo budlelwane betfu naJehova. Uyabati labo labaseluhlangotsini  lwakhe. (Fundza Isaya 44:5.) Ngemthantazo, tihlole kutsi budlelwane bakho naye bujule kangakanani. Cabangisisa ngaloko, ukhumbule nelilanga lelibalulekile lowabhajatiswa ngalo. Loko kungakusita ukhumbule kutsi kubhajatiswa kwakho kukhombisa sincumo lesibaluleke kakhulu loke wasenta.

17. Yini leyenta kudzingeke sibeketele kute sihlale sisondzelene naJehova?

¹⁷ Nakabhalela baseGalathiya, Pawula wagcizelela sidzingo sekubeketela. (Gal. 6:9) Kuyintfo lebalulekile kumaKhristu kwenta njalo lamuhla. Utawuhlangabetana netilingo, kodvwa Jehova utakusita. Chubeka uthantazela umoya longcwele. Utativa ukhululekile nakagucula lusizi lwakho lube yinjabulo, nebuhlungu bakho bube kuthula. (Mat. 7:7-11) Cabanga ngaloku: Nangabe Jehova anakekela tinyoni, ukukhatsalela kangakanani-ke wena ngobe uyamtsandza futsi utinikele kuye? (Mat. 10:29-31) Nobe ngabe ngubuphi bumatima lobukuvelelako, ungabuyeli emuva, futsi ungapheli emandla. Kunetibusiso letinyenti lesitatitfola ngesizatfu sekutsi satiwa nguJehova.

18. Njengobe ‘sewumati Nkulunkulu,’ yini lofuna kuyenta nyalo?

¹⁸ Ngako-ke, nangabe usandza kumati Nkulunkulu futsi ubhajatisiwe, yini lokufanele uyente nyalo? Chubeka umati kakhulu Jehova, futsi uchubeke utfutfuka ekumkhonteni. Nangabe sekuphele iminyaka ubhajatisiwe, yini lokufanele uyente nyalo? Nawe kufanele uchubeke ukhulisa uphindze ujulisa lwati lwakho ngaJehova. Shengatsi singakubalekela kutitjela kutsi sesimati kahle Nkulunkulu. Esikhundleni saloko, kufanele sonkhe sitihlole ngaso sonkhe sikhatsi kute siciniseke kutsi siyachubeka sikhula ebuhlotjeni betfu naBabe wetfu lonelutsandvo, longuMngani futsi longuNkulunkulu wetfu—Jehova.—Fundza 2 Khorinte 13:5, 6.