Nyalo Sengiyamati Nkulunkulu Lengimkhontako

Njengobe ilandziswa ngu-Marieta Manuel Bacudio

Umvangeli longumPhentekhoste lebekatiwa ngekutsi unemandla ekwelapha, wefika atosivakashela. Watsi nakangitsintsa ngacaleka, “ngavukwa ngumoya”. Ngatsi nangiphaphama ngabona shengatsi ngikutfolile loko bengikufuna, lokungemandla ekwelapha. Yini leyangiholela kuloko futsi kwakutsintsa njani kuphila kwami? Ngisengakakucoceli ngaloko, ase ngikutjele ngendlela lengikhule ngayo.

NGATALELWA e-Ilocos Norte, ePhilippines nga-December 10, 1968. Ngiwesikhombisa kubantfwana labalishumi. Njengelinyenti lebantfu ePhilippines, sakhula singemaKatolika. Ngacedza sikolwa nga-1986, sifiso sami besikutsi ngibe linesi, kodvwa-ke lelophupho alizange lifezeke ngobe ngagula kakhulu. Ecinisweni bengicabanga kutsi ngitakufa. Kucindzeteleka lokwabangelwa ngulokugula, kwangenta ngacela lusito kuNkulunkulu ngatsi nangabe ngingasindza kulokugula, ngitamkhonta kuphila kwami konkhe.

Ngemuva kwesikhatsi lesidze ngisindzile ekuguleni ngakhumbula setsembiso lengasenta kuNkulunkulu. Ngako, nga-June 1991 ngangena esikolweni sasePhentekhoste sekufundzela bufundisi. Lebesikufundza kulesikolwa bekufaka ekhatsi kucela “sipho samahhala semoya longcwele.” Bengifuna kuba nemandla ekwelapha. Kulesikolwa safundziswa kutsi lesipho sitasitfola nasizila kudla futsi sithandaza. Ngalelinye lilanga ngifuna kubonakale shengatsi sengisitfolile “lesipho,” ngalalela lomunye lebesifundza naye athandaza ekoneni ngesikhatsi semthandazo angangiboni. Nase acedza, ngekushesha ngabuyela endzaweni lebengiguce kuyo. Ngemuva kwaloko, ngamtjela konkhe lakucelile emthandazweni wakhe, wakholwa kutsi nyalo sengisitfolile “sipho samahhala.”

Njengobe ngichubeka netifundvo tami, ngaba nemibuto leminyenti. Njengobe Matewu 6:9 akhuluma ‘ngaBabe nangelibito lakhe,’ ngatibuta imibuto lenjengaletsi “Ngubani loBabe Jesu lakhuluma ngaye lapha?” futsi “Labani lelibito lokufanele lingcweliswe?” Timphendvulo bothishela bami lebebanginika tona betingacaci kahle futsi tingangenetisi. Bebakhuluma ngaMtsatfu Amunye batsi uyimfihlakalo. Bekungidida loko. Nobe kunjalo, ngachubeka netifundvo tami tebufundisi.

Kwati NgaboFakazi BaJehova

Esikolweni safundziswa kutsi boFakazi BaJehova bayinkholo yemanga letendlula tonkhe futsi bekutsiwa babaphikikhristu. Ngayenyanya kakhulu lenkholo yaboFakazi.

Ngemnyaka wami wesibili ngikulesikolwa, satsi nasivala ngaya ekhaya ngiyewuvakashela batali bami. Dzadzewetfu lomdzala Carmen, weva kutsi ngisekhaya naye weta watovakasha. Besekavele anguFakazi WaJehova lobhajatisiwe locitsa sikhatsi lesinyenti ashumayela. Watsi naketama kungifundzisa ngaNkulunkulu ngamphendvula ngekucansuka ngatsi: “Ngiyamati mine Nkulunkulu lengimkhontako!” Ngametfuka, ngamfucela le khashane futsi angizange ngiphindze ngimnike litfuba lekukhuluma nami.

 Nasengibuyile esikolweni seliBhayibheli, Carmen wangitfumelela incwajana letsi “Ingabe Kufanele Ukholelwe Kuziqu zintathu?” a Ngayitsatsa ngayishisa ngaso leso sikhatsi. Bengisolo ngimtfukutselele.

Kutfola Ticu Tebufundisi

Njengobe bengichubeka netifundvo tami esikolweni sekufundzela bufundisi, bengikhona kugucula labanye bantfu kutsi bangene enkholweni yami. Ngajabula kakhulu ngalesikhatsi make nemnaketfu bangijoyina esontfweni lasePhentekhoste.

Nga-March 1994 ngetfweswa ticu esikolweni sekufundzela bufundisi sasePhentekhoste. Njengobe ngishito ekucaleni, umvangeli lebekasivakashele abekhona ngalesikhatsi setfweswa ticu. Sonkhe besifuna kuba naye ngobe besikholelwa kutsi unesipho sekwelapha. Samjoyina esiteji sigcumagcuma sishaya tandla sihambisana naye njengobe bekukhala ibhendi. Ngemuva kwaloko, wonkhe umuntfu lebemtsintsa bekawa, “avukwe ngumoya.” b Watsi nakangitsintsa nami ngawa ngacaleka. Ngatsi nangiphaphama, ngesaba kodvwa bengitiva kutsi nyalo senginawo emandla ekwelapha, ngako ngativa ngijabula.

Ngekushesha ngemuva kwaloko, ngasebentisa lamandla ami ngelapha umntfwana lebekagula kakhulu aphetfwe ngumkhuhlane. Ngatsi nangithandaza, lomntfwana wacala kujuluka wase uyaphela umkhuhlane. Ekugcineni, ngabona kutsi ngingakhona kufeza setsembiso sami kuNkulunkulu. Lebekumangalisa kutsi bengiva shengatsi kukhona lokushodako. Ekujuleni kwenhlitiyo yami bengikholelwa kutsi munye Nkulunkulu kepha ngingati kutsi mbambambamba ungubani. Bengitingabata timfundziso letinyenti tasesontfweni.

Tintfo Letashintja Kucabanga Kwami

Ngemuva kwekutsi sekwenteke konkhe loku, ngabazonda kakhulu boFakazi BaJehova. Nome nini nangitfola tincwadzi taboFakazi BaJehova bengitishisa. Ngalelinye lilanga, kwenteka intfo lebengingakayilindzeli. Ngetfuka nangiva make atsi akasayifuni inkholo yetfu yebuPhentekhoste. Carmen abefundza naye liBhayibheli. Ngamtfukutselela kakhulu dzadzewetfu, Carmen.

Ngemuva kwaloko, ngatfola magazini i-“Phaphama!” endlini yamake. Njengenhlala yenta bekufanele ngiyishise nayo. Ngesizatfu sekutsi benginesifiso sekutfola kutsi yini lena make layifundzako, ngayiphenya. Ngadvonswa sihloko lebesikhuluma ngemuntfu lotsite lobekakukholelwa lokufundziswa esontfweni lakhe. Nobe kunjalo, watsi nakacala kufundza tincwadzi taboFakazi BaJehova neliBhayibheli, wakholiseka kutsi imfundziso yaMtsatfu Amunye, yesihogo neyekungafi kwemphefumulo atikho eBhayibhelini. Inhlitiyo yami yatsintseka. Ngito kanye leto tintfo lebengivele ngifisa kutati. Kusukela ngifundze lesihloko, ngalangetelela sikhatsi lapho bengingacondza khona emaciniso eliBhayibheli.

Ngemuva kwekufundza lesinye sihloko kumagazini i-“Phaphama!” lesikhuluma ngemlandvo wekuphila walotsite lobekasidzakwa  adla tidzakamiva, lowenta tingucuko letinkhulu ekuphileni kwakhe ngenca yekufundza liBhayibheli ngacala kufundza tincwadzi letinyenti taboFakazi BaJehova. Ngatfola incwajana letsi “Igama Laphezulu Eliyohlala Phakade.” c Ngekufundza lencwajana ngabona kutsi libito laNkulunkulu nguJehova. Kwangijabulisa kakhulu kutfola emaciniso ngaNkulunkulu weliciniso.—Dutheronomi 4:39; Jeremiya 10:10.

Ngachubeka ngitifundzela letincwadzi ngifihla futsi ngafundza emaciniso lamanyenti eliBhayibheli. Esikolweni sasePhentekhoste ngafundziswa kutsi Jesu unguNkulunkulu kodvwa nyalo sengifundze eBhayibhelini kutsi ‘uyiNdvodzana yaNkulunkulu lophilako.’—Matewu 16:15, 16.

Kushintja Kwami

Ngatsi nangiphindze ngibona Carmen, wamangala nangimcela incwajana letsi “Igama Laphezulu Eliyohlala Phakade” naletinye tincwadzi. Bengicitse iminyaka leminyenti esikolweni sekufundzela bufundisi kodvwa abazange bangifundzise liciniso, esikhundleni saloko bangivala emehlo. Nyalo ngijabula kakhulu enhlitiyweni yami ngalamaciniso lesengiwafundze eBhayibhelini. Ngabona kuba liciniso kwemavi aJesu latsi: “Niyawulati liciniso, neliciniso liyawunikhulula.” (Johane 8:32) Lamaciniso bese acalile kushintja imphilo yami.

Sikhatsi lesitsite, bengicabanga kutsi ngingakhona kukhonta Nkulunkulu Jehova futsi ngichubeke nekuba ngumfundisi. Ngekushesha ngabona kutsi ngeke ngisakhona kufundzisa timfundziso letinyenti tasesontfweni. Nobe kunjalo, bengesaba. Ngatibuta kutsi ngitatiphilisa ngani nangiyekela kuba ngumfundisi. Lisontfo litawuhlazeka nangabe lomunye webafundisi balo aba nguFakazi WaJehova. Ngako ngachubeka nekuba ngumfundisi kodvwa bengingasatifundzisi timfundziso letingemanga tasesontfweni.

Ngatsi nangiphindze ngibonana naCarmen, wangimemela emhlanganweni waboFakazi BaJehova. Njengobe ngaletinye tikhatsi bengike ngiye esontfweni lelisiphetse leliseLaoag City, ngafuna indzawo boFakazi BaJehova lababambela kuyo imihlangano yabo lebitwa ngekutsi liHholwa LeMbuso, kungati muntfu. Kulelobandla, Alma Preciosa Villarin losebentisa sikhatsi lesinyenti ekushumayeleni watetfula kimi, libito lakhe lekuteketisa ngu-“Precious”. Nanobe bengisolo ngingabatsandzisisi boFakazi, ngasemukela sicelo sakhe sekufundza nami liBhayibheli.

Dzadzewetfu bekanesineke sekungicocela emaciniso eliBhayibheli. Ngaphindze ngabona sineke lesifana nesakhe kuPrecious. Wangisita kakhulu kutsi ngicondze liBhayibheli ngisho nobe bengicasuka, ngimphikise ngaletinye tikhatsi ngiphakamise livi futsi ngiphocelele letinye tintfo lengafundziswa tona esontfweni.  Kunginaka, kutfobeka nebumnene lobavetwa nguPrecious nalabanye boFakazi kwangitsintsa inhlitiyo. Loko kwangenta ngafuna kukhonta Jehova.

Nga-July 1995, ngabona kutsi nangabe ngifuna kukhonta Nkulunkulu kufanele ngisishiye sikhundla sami sebufundisi. Ngasiphi sizatfu? Sembulo 18:4 nasikhuluma ngenkholo yemanga sitsi: “Sive sami, phumani kuyo, ningahlanganyeli nayo etonweni tayo, funa nehlelwe kuhlushwa kanye nayo.” Besengitawuphila ngani? EmaHebheru 13:5 angifundzisa kutsi nasenta intsandvo yaNkulunkulu, usetsembisa kutsi: “Ngingeke ngikuyekele, ngingeke ngikushiye.”

Nanobe babe nemnaketfu lengikhulume ngaye ekucaleni bangiphikisa kakhulu, kwatsi nasekusele emaviki lamabili kutsi ngibhajatiswe ngaba nesibindzi sekubuyela ekhaya ngiyoshisa tonkhe timphahla lebengitisebentisa emsebentini wami webufundisi. Ngemuva kwekutishisa, ngeva kutsi emandla ami lakhetsekile lebenginawo awasekho. Ngalesikhatsi ngisengumfundisi bekutsi njalo nangilele ngive shengatsi kunalokutsite lokungicindzetela phansi. Naloko kwaphela. Titfunti lebengivamise kutibona efasitelweni lelikamelo lami nato angizange ngiphindze ngitibone. Kufundza kwami liBhayibheli kungifundzise kutsi konkhe lokubitwa ngekutsi tiphiwo, njengemandla ekwelapha, akuveli kuNkulunkulu kodvwa kuvela emimoyeni lemibi. Ngijabula kakhulu ngekutsi sengiphumile ekulawulweni ngulemimoya lemibi njengentfombatane lebeyisigcila, boPawula naBhanabasi labayikhulula ‘emoyeni wekuphengula.’—Imisebenti 16:16-18.

Kwangijabulisa kakhulu kuba kanye naMake nasiyobhajatiswa sikhombisa kutsi sesiboFakazi BaJehova nga-September 1996. Ngemuva kwekubhajatiswa, ngacitsa sikhatsi lesinyenti ngishumayela futsi loko ngikwente iminyaka leminyenti.

Nyalo ngishade naSilver. Sobabili, sisebenta kamatima kuze sifundzise indvodzakati yetfu emaciniso eliBhayibheli. Labanye bantfwabakitsi lababili nabo sebakhonta Jehova kanye natsi. Nanobe ngitisola ngekutsi kwendlule iminyaka leminyenti ngingamati Nkulunkulu, kodvwa nyalo ngijabula kakhulu ngekutsi sengiyamati Nkulunkulu lengimkhontako.

[Imibhalo lengentansi]

[Emavi lacashuniwe lasekhasini 27]

Ngasebentisa lamandla kuze ngelaphe umntfwana lobekagula kakhulu aphetfwe ngumkhuhlane

[Emavi lacashuniwe lasekhasini 28]

Lamaciniso besacalile kushintja kuphila kwami

[Emavi lacashuniwe lasekhasini 29]

Kungijabulisa kakhulu kufundza ngaNkulunkulu weliciniso

[Sitfombe ekhasini 27]

Ngalesikhatsi ngetfweswa ticu tebufundisi

[Sitfombe ekhasini 28, 29]

Precious wafundza nami liBhayibheli

[Sitfombe ekhasini 29]

Ngalesikhatsi mine namake sibhajatiswa

[Sitfombe ekhasini 29]

NginguFakazi WaJehova locitsa sikhatsi lesinyenti ashumayela

[Sitfombe ekhasini 29]

Mine nemyeni wami, indvodzakati yetfu netihlobo tami letinyenti lesikanye nato ekukhonteni kweliciniso