Incwadzi leya KubaseKholose 3:1-25
3 Nangabe-ke navuswa naKhristu,+ chubekani nifuna tintfo letisezulwini, lapho Khristu ahleti khona ngesekudla saNkulunkulu.+
2 Tingcondvo tenu atihlale tinake tintfo letisezulwini,+ hhayi letisemhlabeni.+
3 Ngobe nafa, futsi kuphila kwenu kukuKhristu ebunyeni naNkulunkulu.
4 Kutawutsi lapho Khristu, lokuphila kwetfu,+ entiwa abonakale, nani-ke nitawentiwa nibonakale kanye naye enkhatimulweni.+
5 Bulalani emalunga emitimba yenu+ asemhlabeni kuze ningaweli ebugwadleni,* ekungcoleni, enkhanukweni lengalawuleki,+ esifisweni lesibi, kanye nasekubeni bukhali, lokukukhonta tithico.
6 Lulaka lwaNkulunkulu lutawufika ngenca yetintfo letinjalo.
7 Nani benitiphatsa* kanjalo ekucaleni.*+
8 Kodvwa nyalo kufanele nikulahle konkhe loku: lulaka, intfukutselo, bubi,+ kuhlambalata+ nenkhulumo leyenyanyekako.+
9 Ningakhulumi emanga kulomunye nalomunye.+ Khumulani buntfu* lobudzala+ kanye nemikhuba yabo,
10 nigcoke buntfu lobusha,+ lokutsi ngelwati lolungulonalona bentiwe bube busha ngekwemfanekiso waLoyo lowabudala,+
11 futsi kuba bete umehluko kumGriki nobe kumJuda, kulosokile nome kulongakasoki, kumuntfu wetive, kumSikithi,* kulosigcili, nome kumuntfu lokhululekile; kodvwa Khristu ungito tonkhe tintfo futsi ukubo bonkhe.+
12 Ngako-ke, njengobe nibantfu baNkulunkulu labakhetsiwe,+ labangcwele nalabatsandzekako, gcokani luvelo,+ umusa, kutfobeka,+ umoya lophansi,*+ nekubeketela.+
13 Chubekani nibeketelelana futsi nitsetselelana ngekukhululeka+ ngisho nobe umuntfu anesizatfu sekukhonona ngalomunye.+ Njengobe nje Jehova* anitsetselele ngekukhululeka, nani yentani kanjalo.+
14 Kodvwa ngetulu kwato tonkhe letintfo, gcokani lutsandvo+ ngobe lusibopho lesiphelele sebunye.+
15 Vumelani kuthula kwaKhristu kubuse* tinhlitiyo tenu,+ ngobe ecinisweni nabitelwa kulokuthula emtimbeni munye, futsi banini ngulababongako.
16 Livi laKhristu aliphuphume kini futsi linente nihlakaniphe. Chubekani nifundzisana futsi nikhutsatana* ngetingoma,+ nihlabele tingoma tekudvumisa, netingoma tekukhonta Nkulunkulu letihlatjelwa ngekubonga, futsi nihlabelele Jehova* etinhlitiyweni tenu.+
17 Nobe yini leniyikhulumako nobe leniyentako, konkhe kwenteni egameni leNkhosi Jesu, ngayo nibonge Nkulunkulu longuBabe.+
18 Bafati, tfobelani emadvodza enu+ ngobe loku kuhle eNkhosini.
19 Madvodza, chubekani nitsandza bafati benu+ futsi ningabatfukutseleli kakhulu.*+
20 Bantfwana, lalelani batali benu kuto tonkhe tintfo,+ ngobe loku kuyayijabulisa iNkhosi.
21 Bobabe, ningabatfukutselisi* bantfwana benu+ kuze bangapheli emandla.
22 Tigcili, balaleleni kuto tonkhe tintfo labo labaniphetse emhlabeni,+ hhayi kuphela nabanibukile kuze nje nijabulise bantfu,* kodvwa nibalalele ngenhlitiyo lecotfo nangekwesaba Jehova.*
23 Konkhe lenikwentako kwenteni ngemphefumulo* wonkhe kube shengatsi nentela Jehova,*+ hhayi bantfu,
24 ngobe niyati kutsi lifa lelingumvuzo wenu nitalitfola kuJehova.*+ Sebentelani iNkhosi, lenguKhristu.
25 Loyo lowenta lokubi utawutfola umvuzo walokubi lakwentile,+ ngobe Nkulunkulu akakhetsi.+
Imibhalo lengentansi
^ Ligama lesiGriki lelihunyushwe ngekutsi “bugwadla,” lifaka ekhatsi tonkhe tinhlobo tekulalana letingemukeleki kuNkulunkulu. NgesiGriki kutsi por·neiʹa. Fundza Tinchazelo Temagama.
^ Nobe “benihamba.”
^ Nobe “ngesikhatsi nisaphila ngaleyo ndlela.”
^ NgesiGriki kutsi, “umuntfu.”
^ Leligama lisho bantfu lebebabukelwa phansi ngenca yemasiko abo nendlela lebebaphila ngayo.
^ Nobe “bumnene.”
^ Fundza Sandzisanchazo A5.
^ Nobe “kucondzise.”
^ Nobe “niyalana.”
^ Fundza Sandzisanchazo A5.
^ Nobe “ningabaphatsi ngeludlame.”
^ Nobe “ningabasukeli; ningabacansuli.”
^ NgesiGriki kutsi, “ningakwenti ngekutsenga emehlo njengalabajabulisa bantfu.”
^ Fundza Sandzisanchazo A5.
^ Fundza Tinchazelo Temagama, ubuke ligama lelitsi “Umphefumulo.”
^ Fundza Sandzisanchazo A5.
^ Fundza Sandzisanchazo A5.
